Fakahoko ki Tonga ni 'a e Sipoti 'a e Pasifiki 2031
5 'Okatopa 2024. 'Oku 'amanaki fakahoko mai ki Tonga ni 'a e Sipoti 'a e Pasifiki 2031 hili 'eni 'a e ikuna 'a e pole 'a Tonga ke fakahoko mai kiai 'a e Sipoti 'i he fakataha na'e fakahoko ki Palau 'i he faka'osinga 'o e uike ni.
Ko hono fakaha faka'ofisiale 'eni 'a e ola 'o e fili 'a e ngaahi fonua memipa 'a ia na'e fakafofonga 'a Tonga ni 'e he 'Eiki Palemia Hon. Hu'akavameiliku, 'Eiki Minisita Sipoti Lord Vaea pehe ki he kau fakafofonga mei he TASANOC mo Tonga ni foki.
'Eiki Palemia Hon. Hu'akavameiliku pehe kia Maikolo Bloomfield mei he TASANOC
Ko Fisi mo Tonga 'a e ongo fonua nae taaimu'a 'i he fepolepolei ko'eni ke fakahoko ange 'a e sipoti ki hona fonua pea na'e ikuna 'e Tonga 'a e paloti 'aki 'a e fili kiai 'a e fonua 'e 12 kae fili 'a e fonua 'e 9 ki Fisi.
Ko e ongoongo fakafiefia 'eni ki he fonua pea ko e tapuaki ki Tonga 'a ia tene 'omai 'a e ngaahi faingamalie pea langa ai mo e ngaahi mala'e sipoti, ngaahi naunau sipoti, nofo'anga, mo e ngaahi faingamalie kehe 'e taa'imalie ai 'a e fonua.
Na'e 'amanaki foki ke fakahoko 'a e Sipoti 'a e Pasifiki ki Tonga 'i he ta'u 2019 ka na'e holomui 'a e Pule'anga 'o e 'aho koia 'o 'ikai ke poupou ke fakahoko mai 'a e sipoti ki Tonga ni.
