Franz Koenig Tu’uhetoka 'a e CEO fo'ou ma'a e Komisoni ‘a e Kau Ngaue Fakapule’anga
CEO fo'ou 'a e PSC mo e Sea Komisoni PSC Simione Sefanaia 'i hono fakamo'oni 'a e konituleki ngaue fo'ou
28 Ma'asi 2025. Kuo fokotu'u 'a Franz Koenig Tu’uhetoka, ‘oku ‘iloa ko Keni Tu’uhetoka ko e 'Ofisa Pule Ngaue(CEO) fo'ou ia ma'a e Komisoni ‘a e Kau Ngaue Fakapule’anga(PSC), 'o kamata lau mei he 'aho Monite 24 ‘o Ma’asi, 2025.
Ko e lakanga kuo fokotu'u kiai 'a Tu'uhetoka 'oku lele 'a 'ene konituleki ki he ta'u 'e 4 pea 'oku 'ikai foki ke sola 'a e tokotaha ni ki he ngaue'anga ni he koe talu 'ene hu ki he ngaue faka-Pule'anga mo e ngaue he Potungaue tatau neongo 'a e feliuliuaki 'a e hingoa.
Na'a ne fakamo'oni 'a Tu'uhetoka ki he'ene aleapau ngaue 'i he kamata'anga 'o e uike ni pea kamata lau ai pe 'a e taimi 'ene fua fatongia 'i he lakanga ni.
Na'e me'a 'i he ouau ki hono fuakava ki hono lakanga fo'ou, 'a e 'Eiki Palemia, Hon. Dr. 'Aisake Valu Eke, ko e Minisita ki he PSC, pehe ki he ni'ihi hono famili mo e kau Komisiona 'o e 'Ofisi ki he Kau Ngaue Faka-Pule'anga (PSC).
Ko e ta’u eni ‘e 20 tupu ‘o e ngaue fakapule’anga ‘a Tu'uhetoka ma’a e Va’a Komisoni Kau Ngaue Fakapule’anga.
