Fakafisi Palemia 'o Tonga Hon. Hu'akavameiliku
'Eiki Palemia Malolo Hon. Hu'akavameiliku
9 Tisema 2024. Na'e fakafisi 'i he ho'ata 'o e 'aho ni 'a e 'Eiki Palemia 'o Tonga Hon. Hu'akavameiliku mei hono lakanga koe Palemia 'o Tonga hili ia 'ene 'i he fatongia ni 'i ha ta'u 'e tolu.
Ko e fakafisi ko'eni 'a Hu'akavameiliku kimu'a ia 'i hono tepile'i ke lau 'i he Fale Alea ha Fili Fakahaloto ke tukuhifo ia mei hono lakanga 'o taki mai 'e he Fakafofonga Tongatapu 6 Hon. Dr. 'Aisake Eke.
Kimu'a pea lau 'a e fokotu'u mo e tali fekau'aki mo e Fili Fakahaloto ke tukuhifo 'a e Palemia na'e me'a ai 'a e 'Eiki Palemia 'o fakaha ki he Sea 'o e Fale Alea 'a 'ene loto ke fakafisi mei hono lakanga telia 'a e lelei fakalukufua 'a e fonua.
Na'e mahino foki mei he me'a 'a 'Eiki Palemia 'a 'ene loto lelei ke kalusefai hono tu'unga koha me'a ia ke ngaue fakataha ai 'a e Fale Alea ma'a e fonua fakalukufua.
Na'e hoko atu 'a e 'Eiki Palemia ki hono fakamalo'ia 'a e Hou'eiki Nopele na'e tu'u fakataha mo e Kapineti pea 'oku ne mea'i lelei pe 'enau manavahe na'a mole honau tu'unga pea 'oku ne faka'apa'a'apa lahi kiai.
'I he'e hoko atu 'ene me'a na'a ne pehe na'e tui koe fonua ni kuo 'osi foaki mai e tau'ataina ta 'oku kei 'iai pe fakapopula pea mo 'ene tapou ki he Kau Fakafofonga 'o e kakai 'e toko 17 kenau tu'u fakataha he 'oku malava pe 'e he Hou'eiki Nopele ia 'e toko 9 'o tu'u fakataha.
'Oku mahino hono vikia 'e he tokolahi 'o e kakai 'o e fonua pehe ki he ngaahi mitia muli 'a e fakahoko fatongia 'a e 'Eiki Palemia Malolo mo e malavalava 'a e ngaahi fakalakalaka lolotonga 'ene 'i he lakanga ko e Palemia 'o Tonga.
