Pa'anga fe tukuaki'i ki he Pule'anga Malolo 'oku mole ?- Lahi e fakamahamahalo

'Oku malie foki 'a e toutou 'asi mai 'a e kau taki 'o e Pule'anga lolotonga 'o Taki mai ai 'a e Tokoni Palemia mo e 'Eiki Minisita Ki he Ngaahi Pisinisi 'a e Pule'anga 'o tukuaki'i 'oku mole 'a e pa'anga 'a e fonua lolotonga 'a e fakahoko fatongia 'a e Pule'anga Maloloo.

'I he taimi tatau 'oku te'eki pe ke fakahoko ha ngaue fakalao ia pe ko hano faka'ilo 'o ha taha 'i he Pule'anga malolo pe kuo 'ave pe aa ha faka'ilo ki he Komisoni Tau'i 'o e Faihala, Fakamaau'anga pe koe Faka'ilo Faka Fale Alea.

'Oku toe fehu'ia foki hono toutou ngaue'aki 'e he Pule'anga 'o e 'aho 'a e fo'i lea ko e mahamahalo lolotonga ia 'oku nau ma'u 'a e mafai pea ma'u mo e ngaahi lekooti kene fakamo'oni ki he'enau ngaahi tukuaki'i.

Ko e lipooti 'a e 'Atita fekau'aki mo e pa'anga 'e 60 Miliona na'e ngaue 'aki ki he Covid-19 'oku toe fakahoko ai pe hono tukuaki'i na'e mole hili koia 'oku fakamahino mai pe 'e he Lipooti 'Atita na'e 'ikai mole ha pa'anga pea na'e ola lelei 'a e fakahoko fatongia.

'Oku mahino koe performance audit pe koe 'atita'i 'o e ola 'o e fakahoko fatongia he 'e toki ha'u 'a mui 'a e hono 'atita'i 'o e ngaahi 'akauni fakapa'anga (finacial accounts) na'e hu kiai 'a e ngaahi pa'anga ni.

'Oku fakaloloma hono ngaue'aki pea fakapolitikale'i 'a e ngahai fakalea 'a e Lipooti 'Atita ke fakahoko 'aki 'a e ngaahi tukuaki'i 'oku 'ikai hano fakamo'oni pea 'e toki ha'u e mo'oni 'a mui kuo lahi e moveuveu 'a e kakai 'i hono takihala'i pea faka'ofa lahi taha 'a e kakai 'oku si'isi'i 'enau 'ilo ki he ngaahi me'a faka-ngaue.

Ko e fehu'i ia 'oku muimui mai heni pe 'e tukuange pe 'e he Palemia mo e Pule'anga 'a e ngaahi fakamahamahalo ko'eni kene uesia e ma'uma'uluta 'a e fonua kae malava 'enau 'asenita tukuaki'i pe ko hono fakaha 'a e mo'oni ki he kakai mo e fonua.

'Oku mahino koe ta'u Fili Fale Alea 'eni pea 'oku toe mahino 'a e natula taumu'a Kemipeini 'a e 'asenita ngaue ia 'a e Pule'anga 'o e 'aho ka 'oku mahu'inga foki ke 'ave pe 'a e mo'oni ki he fonua mo e kakai.

'Oku toe malie hono 'ave 'a e pa'anga 'e 2 miliona 'i he kole fakalahi patiseti ko'eni ki he Lulutai 'a ia 'oku ne fakamahino mai 'oku nau muimui pe 'i he founga na'e fakahoko 'e he Pule'anga Malolo he 'oku mahu'inga 'a e sevesi ko'eni ki he kakai 'o e fonua.

Ko e faka'ilonga 'e taha 'oku fu'u mahino mai mei he toutou paloti 'a e Fale Alea 'oku tu'u fakataha 'a e Tepile 'a e Hou'eiki Nopele mo e Tepile 'a e Hou'eiki Fakafofonga 'o e kakai 'a ia 'oku ne fehu'ia 'a e tu'unga falala'anga 'a e ngahai tukuaki'i mei he Pule'anga 'o e 'aho.