Tu'unga ma'ulalo a'u kiai feme'a'aki Fale Alea 'o Tonga

'Oku mole ke mama'o hano tukuaki'i heni 'a e Fale Alea 'o Tonga ka koe to'onga 'a ha ni'ihi 'a ia 'oku toutou hoko pea 'oku faingata'a ke ta'ofi ka 'oku ne 'ave 'a e fotunga 'oku ta'efe'unga 'o e Fale Alea 'o Tonga ki he kakai mo e fonua pea 'oku a'u ki Tu'apule'anga.

'Oku ho'ata mai 'oku mole 'a e ngeia 'o e Fale Alea pea molia mo e molumolu mo e tu'unga faka'ei'eiki 'o e Fale Alea 'o Tonga koe Pule Tolu 'o e fonua 'i he to'onga 'a e ni'ihi ko'eni pea 'oku totonu mo taau ke fakahoko leva ha ngaue ki he kaveinga ni.

Ko e fonua 'a Tonga 'oku tau laukau 'aki hotau tukufakaholo mo hotau 'ulungaanga feveitokai'aki, faka'apa'apa mo tauhi vaha'a ka 'oku hoko 'a e ngaahi sipinga mo e to'onga 'oku ho'ata mai mei he Fale Alea 'o Tonga ke toe fehu'ia pe 'oku hu'u koaa 'a e Fale Alea 'o Tonga ki fe'ia.

'Oku 'i ai 'a e Fakafofonga 'oku toutou tuku fakataimi ki tu'a pea kuo 'i ai mo e ni'ihi 'o e Hou'eiki Fakafofonga 'o tatau he tepile 'a e Hou'eiki mo e Kakai kuo 'osi tu'o taha hono tuku fakataimi ki tu'a makatu'unga 'i hono maumau'i 'a e tu'utu'uni ngaue 'a e Fale Alea.

Kuo 'i ai foki moe Fakafofonga Fale Alea kuo ta tu'o lahi hono launga'i ki he 'Eiki Sea 'o e Fale Alea pea 'oku lolotonga fakahoko 'a e ngaue kiai 'a e Komiti ki he Ngaahi Totonu 'a e Fale Alea.

'I he taimi tatau 'oku 'i he 'Eiki Sea 'o e Fale Alea 'a e mafai 'oku ma'olunga pea 'oku fakalao kene me'angaue 'aki ke ta'ofi 'a e toutou hoko 'a e fa'ahinga palopalema ko'eni 'i he Fale Alea 'o Tonga pea koe mafai ko'eni 'oku malava kene fakangata 'a e fa'ahinga to'onga mo e 'ulungaanga ko'eni 'oku toutou hoko ka 'oku ha mahino mai 'oku 'ikai malohi fe'unga hono ngaue'aki.

'Oku taupotu 'a e mafai ko'eni 'o fakatatau ki he Tu'utu'uni Ngaue 'a e Fale Alea 'i he 'Eiki Sea 'o e Fale Alea pea 'oku 'i ai mo e mafai 'i he 'Eiki Sea 'o e Komiti Kakato.

'Oku mahino 'a e toka'i mo e tauhi vaha'a pehe ki he fakaalaala 'a e ongo mafai ko'eni ke ngaue'aki hona mafai 'oku tu'utu'uni 'e he Tu'utu'uni Ngaue 'a e Fale Alea 'i he taimi lahi ka 'oku hoko foki ia kene faka'ai'ai ke toutou hoko 'a e palopalema 'oku lave'i atu 'i 'olunga pea 'oku fakamo'oni kiai 'a e kakai 'oku nau fanongo ki hono fakamafola mai 'a e feme'a'aki 'a e Fale Alea 'oku toutou hoko.

Kuo fakaha 'ehe tokolahi tatau 'i he mitia fakasosiale mo e ngaahi feohi'anga 'i he sosaieti 'a 'enau fakame'apango'ia 'i he toutou hoko 'a  e fehulunaki mo e ngaahi to'onga ta'efe'unga ko'eni 'i he Fale Alea 'o Tonga pea 'oku ne tukuhifo ai pe foki 'a e molumalu mo hono faka'apa'apa'ia 'e he kakai 'o e fonua 'a e Pule Tolu 'i hotau fa'unga pule kuo tu'utu'uni 'e he Konisitutone 'o Tonga.

'Oku matu'aki mahino mei he vakai 'a e tokolahi 'a e fiema'u ke ngaue'aki 'e he 'Eiki Sea 'o e Fale Alea hono mafai taupotu kei taimi ke kei pukepuke 'a e molumalu 'o e Fale Alea 'o Tonga pea ke kei hoko koha sino 'oku sio 'olunga kiai 'a e kakai 'o e fonua.

Fakatatau ki he ngaahi laaulea 'i he mitia fakasosiale fekau'aki mo e kaveinga ni 'oku mahino 'a e tui 'a e tokolahi 'oku me'a va'inga 'aki 'e he ni'ihi 'oku nau toutou fakahoko 'a e to'onga ni 'a e vaivai hono ngau'aki 'a e mafai 'oku 'i he Sea kenau va'inga'aki 'a e Fale Alea 'o Tonga.

'Oku tui foki mo e tokolahi ia ko e to'u Fale Alea ma'ulalo taha 'eni 'a e to'onga mo e fakafotunga 'a e ni'ihi ko'eni 'o e Hou'eiki Fakafofonga Fale Alea pea neongo 'oku fakahoko 'a e to'onga ko'eni 'e he ni'ihi tokosi'i ka 'oku tuhu fakalukufua mai 'a e tukuaki'i ki he Fale Alea 'o Tonga.