'E malava ke 'oua paasi patiseti hange koe Fale Alea Ha'amoa

'Oku hoko 'a hono 'ikai ke tali 'e he Fale Alea 'o Ha'amoa 'a e patiseti kuo fokotu'u atu 'e he Pule'anga ke kole ai 'a e Palemia 'o e fonua Hon. Fiame Naomi Mataafa ki he 'Ulu 'o e fonua (Head of State) ke veteki 'a e Fale Alea 'o e fonua kae toe fakahoko ha fili fo'ou.

Ko e hili ia 'a hono paloti'i 'e he Fale Alea 'o Ha'amoa 'a e patiseti 'a e fonua 'i he konga kimu'a 'o e uike ni pea kau fakataha ai 'a e kau memipa ia 'o e fa'ahi Fakaanga Human Rights Protection Party (HRPP) mo e Paati na'e taki 'e he Palemia FAST ke fakafepaki'i 'a e patiseti 'aki 'a e ta'eloto kiai 'a e toko 34 kae loto pe kiai 'a e toko 16.

Ko e fokotu'u 'eni ke toe fili fo'ou 'a e Fale Alea Ha'amoa 'a ia 'oku 'unuaki mai ia 'o vave ange 'i he taimi na'e totonu ke toki fakahoko ai 'enau fili Fale Alea anga maheni.

'Oku 'i ai 'a e hoha'a 'a e tokolahi mo e kau mataotao 'i he Lao mo e Politikale 'i Tonga ni mo muli 'e malava ke fou atu 'a Tonga 'i he halafononga tatau 'okapau 'e 'ikai ke liliu 'a e founga, to'onga, founga tipeiti 'a e Pule'anga lolotonga.

'Oku kau heni moe nofo honau taimi lahi hono toutou tukuaki'i 'ikai ha fakamo'oni 'a e Pule'anga kuo 'osi 'a ia 'oku nau hoko koe fa'ahi Fakaanga ia he 'aho ni 'i he Fale Alea 'o Tonga.

'Oku mahino foki ia mei he ta'au lolotonga 'a e nga'unu 'a e Hou'eiki Nopele ia ke tu'u fakataha mo e Pule'anga motu'a 'o makatu'unga pe ia mei he fakafotunga, 'ulungaanga mo e to'onga 'a e Hou'eiki Memipa 'o e Pule'anga lolotonga.

'Oku ha mahino mai foki 'a e ngaahi tukuaki'i 'oku nau fakahoko 'ikai fakapapau'i ha fakamo'oni mo e ngaahi lea mo e fakafotunga 'oku nau fakalele 'aki 'a e fonua 'o hoa'ata mei ai 'a e 'alu ke movetevete ange 'a e kakai mo faka fa'afa'ahi ange.

'Oku 'ikai ngata heni ka 'oku lahi hono launga'i 'o e kau memipa 'o e Kapineti ki he anga ta'e faka'apa'apa 'i he Fale Alea mo e mahino 'oku nofo taha pe 'enau 'asenita ngaue 'i he tukuaki'i ka e 'ikai fakahoko ha ngaue fakataha koe 'uhi koe kakai 'o e fonua.

Kuo kamata foki ke ho'ata mai ia he ngaahi 'aho ni 'a e kehekehe 'a e me'a 'oku malanga'i tautautefito ki he pule lelei mo e pule 'a e Lao mo e me'a 'oku lolotonga fakahoko 'e he Kapineti 'o e 'aho pea 'oku kau ai 'a e founga fili 'o e kau memipa ki he ngaahi Poate 'a e Pule'anga mo e ngaahi kaveinga kehe pe.

'I hono fakama'opo'opo 'oku tuhu taha pe ki he 'ikai ha taukei fe'unga mo e fakamu'omu'a 'a e ngaahi 'asenita fakafo'ituitui 'a e Hou'eiki memipa 'o e Pule'anga mei he lelei fakalukufua.

'Oku ofongi mai 'e he nganga'ehu 'i Ha'amoa 'e malava ke hoko 'eni 'i Tonga kapau 'e 'ikai ke toe fakalelei ange 'a e founga fakalele 'o e Pule'anga 'o e 'aho pea fakahoko ha ngaue fakataha he 'oku toe pe 'a e lau mahina pea fakahoko 'a e fili Fale Alea 'i Novema pea ke fakahoko aa ha ngaue ke sio kiai mo fakamo'oni kiai 'a e kakai 'o e fonua.