Toe tuku ki tu'a mei Fale Alea Fakafofonga Tongatapu 7
Fakafofonga Fale Alea Tongatapu 7 Paula Piveni Piukala
9 'Okatopa 2024. Kuo toe tu'utu'uni 'a e 'Eiki Sea 'o e Fale Alea Lord Fakafanua 'i he efiafi 'aneafi ke tuku faka taimi 'a e Fakafofonga 'o Tongatapu 7 Paula Piveni Piukala mei he Fale Alea 'o Tonga koe anga ta'e faka'apa'apa.
Kuo ta tu'o lahi hono fakatokanga 'i he Fale Alea tatau pe 'i he taimi 'oku Fale Alea ai 'a e Fale mo Komiti Kakato 'a Piukala makatu'unga 'i he'ene to'onga 'oku 'ikai hoa mo taau mo e ngaahi tu'utu'uni ngaue 'a e Fale Alea 'o Tonga.
Na'e tu'utu'uni ai 'e he Sea Lord Fakafanua ke tuku 'a Piukala ki tu'a 'i ha 'aho 'e 2 pea ke 'oua na'a toe tu'u ki he 'inisi kelekele 'o e Fale Alea 'o Tonga pe 'e toe kau atu ki ha fa'ahinga fakataha 'a e Fale Alea.
Na'e makatu'unga 'a e tu'utu'uni ko'eni 'i hono fiu ta'ofi 'i he fakataha 'a e Fale Alea 'a Piukala 'aki 'ene ngaue'aki 'a e ngaahi lea ta'etaau 'o tukuhifo 'aki 'a e Fakafofonga Nopele 'o Vava'u Lord Tu'ilakepa pea 'ikai talangofua ki he ngaahi fakahinohino na'e 'omai mei he 'Eiki Sea 'o e Fale Alea.
Na'e makatu'unga 'eni 'i he fakatonutonu 'ehe Tu'ilakepa 'a e ngaahi poini na'e 'ohake 'e Piukala pea iku ke kaikaila mo pole fuhu heni 'a Piukala ki he 'Eiki Nopele pea ne hu ki tu'a mei he Fale Alea 'o kaila mai ke hu ange 'a e Tu'ilakepa.
'Oku ta tu'o lahi 'a e fai pehe ni 'a Piukala 'i he Fale Alea 'o Tonga pea 'oku lahi hono launga'i ki he Sea 'o e Fale Alea.
Fakatatau ki he ngaahi fakamatala mei he Fale Alea 'oku 'i ai 'a e ngaahi launga 'oku lolotonga 'i he Komiti ki he Ngaahi Totonu 'a e kau Memipa Fale Alea fekua'aki mo Piukala.
