Foaki 'e 'Aositelelia Pa'anga 120 Miliona tokoni ki he Patiseti 'a e fonua
27 Ma'asi 2025. Ko e ongoongo lelei ia ki he kakai 'o e fonua 'a e fakamo’oni ‘a ‘Aositelelia mo Tonga ki he pa'anga lahitaha ‘i he hisitolia ‘o e fengaue’aki 'a e ongo fonua kuo foaki 'e 'Aositelelia ki Tonga.
Ko hono fakamo'oni'i 'eni 'e he Palemia Hon. Dr. 'Aisake Valu Eke mo e Tokoni Pule 'a e 'Ofisi 'o 'Aositelelia ki he Pasifiki Craig Chittick 'a hono foaki 'o e pa'anga AUD 85miliona (TOP125 miliona) ke tokoni ki he patiseti ‘a e pule’anga Tonga pe e ngāue’aki ‘i he ta’u ‘e 4 ka hokó ki hono fakamālohia ‘a e tu’unga faka‘ekonōmiká mo e patiseti fakafonuá.
‘Oku kau heni ‘a e ngaahi fiema’u ki he fakalakalaka ‘a e ngaahi fatongia faka’ofisi ‘a e pule’anga ki he kakai ko ha taumu’a ngaue 'eni kuo fai e felotoi ki ai mo e ngaahi kaveinga mahu'inga kehe pe.
'Oku mahino 'a e faka'amu mo e taumu'a 'a 'Aositelelia ki he tokoni ko'eni pea koe fatongia 'o e Pule'anga ke 'ave 'a e tokoni ko'eni ki he ta'umu'a koia pea ke ola lelei ki he fonua mo e kakai.
Na'e fakamamafa 'e he Pule'anga 'Aositelelia 'a e mahu’inga 'o e fengaue'aki vaofi mo e poupou ki he langa fakalakalaka fakalukufua 'i he tapa kehekehe 'o e mo'ui.
