Tō Folofola ‘Ene ‘Afio Tupou VI ki he Fakataha’anga Pule’anga Fakatahataha Featured
Tama Tu'i Tupou VI lolotonga 'Ene Tō Folofola
26 Sepitema, 2017. Na’e fakahoko ‘a e Tō Folofola ‘a e Tama Tu’i Tupou VI ‘i he Fakataha’anga ‘a e Pule’anga Fakatahataha (United Nations General Assembly) ‘i he ‘aho 22 ‘o Sepitema ‘a ia koe ‘aho Falaite ia ‘o e uike kuo ‘osi ‘i he taimi ‘a Tonga ni.
Na’e kau ‘a hono tokangaekina ‘o e feliuliuaki ‘a e ‘ea ‘i he taumu’a tefito ‘o e Tō Folofola ko’eni ‘a e Tama Tu’i mo e mahu’inga ke mateuteu ‘a Tonga mo e Pasifiki ke talia ‘a hono ngaahi pole.
Na’e ‘i ai foki mo e tokanga mavahe ‘a e Tama Tu’i ki he ma’uanga ivi ‘oku malava ke fakafo’ou pehe ki hono fokotu’u ‘a e senitā ki he ma’u’anga ivi ‘a e Pasifiki (Pacific Centre for Renewable Energy and Energy Efficiency (PCREEE)) kene fakamalohi’i ‘a e fengāue’aki faka-vahenga ‘a e Pasifiki ke tulia ‘a e ‘asenita ki he fakalakalaka fakapotopoto (2030 Agenda for Sustainable Development).
Na’e fakamamafa’i foki ‘e he Tō Folofola ko’eni ‘a e mahu’inga ke ma’u ha ma’u’anga ivi ‘oku ma’a mo tokoni ki he ‘atakai pea ke tokoni ki he kaha’u ‘o e fakalakalaka.
‘Ikai ngata ai ka ke fakasi’isi’i ‘a e ma’u’anga ivi mei he lolo ‘a ia ‘oku ne uesia ‘a e ‘atakai.
Na’e hā foki ‘i he Tō Folofola ko’eni ‘a hono fokotu’u ‘e Tonga ‘ene me’a fua faka-fonua (National Monitoring Mechanism) ‘i he tokoni mo e poupou ‘a e Pule’anga Fakatahataha ‘i he’ene polokalama fakalakalaka (United Nations Development Programme).
Na’e toe fakamamafa’i foki ‘i he Tō Folofola ‘a hono ta’ofi hono toutai’i ‘o e tofua’a mo hono ta’ofi ‘i he potutahi ‘o Tonga ni talu mei he 1978 lolotonga ‘a e ‘i he Taloni ‘a e La’a kuo unga fonua Taufa’ahau Tupou VI.
Na’e fakapapau’i foki ‘eni ‘i he Konifelenisi Fakavaha’a Pule’anga ki he Tofua’a mo e Feliuliuaki ‘a e ‘oseni na’e fakahoko ‘i he mahina ko ‘Epeleli ‘o e ta’u ni.
Na’e toe fakamamafa foki ‘i he Tō Folofola ‘a e mahu’inga ke tokangaekina ‘e he kau taki faka-politikale ‘a e mahu’inga ‘o e feliuliuaki ‘a e ‘Ea, Tofua’a, mo e ‘oseni.
Na’e faka’osi ‘aki ‘a e Tō Folofola ‘a e tapou mei he Tama Tu’i kiha tu’utu’uni fakapotopoto ke solova ‘aki ‘a e ngaahi ngāngā’ehu ‘i he ongo Kōlea.
