“Tuku ā e tutu he kuo lava hotau loto pea kuo fakamo’oni e palemia ke tali e liliu, mālō e ngaue lahi” ^Featured

Ko e lea ko’eni he’ikai toe ngalo ia ‘i he’eku mo’ui mo e kakai tokolahi ‘o e fonua ni. Ko e ‘aho ni ‘oku ha’u māmālie ki he’eku fakakaukau ‘a e lea ko’eni ‘i he’eku fanongo ki hono fakahā mai kuo vela ‘a si’i ‘api nofo’anga ‘o e Palēmia.

‘Oku ‘ikai foki koha ongoongo fakafiefia ‘eni pea ‘oku tau fakamālō pe koe ‘ikai ha mo’ui ‘e mole ka ‘oku hoko ‘eni ‘i he’eku vakai ‘o hangē kuo kamata ke foki māmālie mai ‘a e nunu’a ‘o e ngāue pango na’e fakahoko ‘i he ‘aho 16 ‘o Nōvema ‘o e ta’u 2006. ‘Oku ‘i ai foki ‘a e lau ‘a e tohi himi ‘a e SUTT ‘o hā ai ‘a e konga ‘oku pehē “ko hono ‘ā’ālonga pe ‘e toki hā kotoa ‘a mui” ‘a ia koe kamata ‘eni ke tautautuku mai ‘a hono ngaahi ha’aha’a.

Neongo ‘oku ‘ikai mole ha mo’ui he fakatamaki ko’eni kuo hoko ki he ‘api ‘o e Palēmia ka kuo tohi tongi ‘i he hisitolia ‘o e fonua ni ‘a e mo’ui ‘e valu na’e mole ‘i he 16/11 ‘a ia ‘oku fehu’ia ‘e he tokolahi pē ‘e ‘eke honau toto kia hai?. ‘Oku kei faingata’a’ia ni ai si’i kau pisinisi tokolahi ‘o e fonua ni pea kuo kuo mole mo e totonu ‘a e kakai tokolahi ‘i he ‘aho fakamamahi taha kuo hoko ‘i he hisitōlia ‘o e ‘Otu Anga’ofa.

‘Oku ‘ikai koha palōfita au ka koe fonua lotu ‘a Tonga ni pea na’e tuku ki Langi pea ‘oku ‘ikai toe loi ‘a e hoko ‘o mo’oni ‘a e ngaahi ngāue ‘oku taku ‘e he folofola ‘o pehē ki he tukufakaholo ‘o e fonua ni tene ‘omai ha mala ki he hako mo e hako ‘o laui to’u tangata.

‘Oku ‘ikai tetau loto ke hoko ha fakatamaki ki ha taha ‘i hotau kaungā fononga neongo ‘a e kehekehe ‘etau tui fakapolitikale kā he’ikai ke tau lava ‘o ta’ofi ‘a e ha’u mamalie ‘a e fakamaau totonu. Kuo kamata hā sino pe ia ‘i he tatūsia faka’ikonomika ‘i he ‘amanaki ke totongi fakafoki ‘a e nō mei Siaina na’e fakahoko ke langa’aki ‘a Nuku’alofa hili hono tutu.

‘Oku kei faingata’a’ia ni si’i kau pisinisi ‘o kau ai ‘a e pisinisi ‘a e kakai ‘iloa hangā koe Palēmia Mālōlō ‘o e fonua Dr. Feleti Sevele, Fale ‘o e SUTT pehe ki he pisinisi ‘a e ongo tautehina Ramanlal mo e ngaahi pisinisi lalahi ‘i he fonua. ‘E malava nai ke mahua atu ‘a e fu’u kato fakamolemole ‘a e Palemia ‘o e ‘aho ni ke fakamolemole’i ‘a si’i kau pisinisi ko’eni ke tuku ā ‘enau totongi nō kae totongi mamalie pe ā ‘e he Pule’anga he kuo lava e ngaue lahi pea kuo heka ‘i he sea ‘a e Palemia na’a ne teke ‘a e liliu. ‘E malava pe foki mo hono kole ki he Pule’anga Siaina ke fakamolemole’i ‘a e totongi nō.

‘Oku mea’i lelei pe foki ‘e he Palemia ‘a e ngaahi me’a ni he na’e kau tonu ki he ngaahi hopo ‘i he hili ‘a e 16/11 pea na’a ne ‘ilo lelei ki he faingata’a’ia ‘a e kau pisinisi ‘i he ‘auha mo mole ‘enau koloa mo e faingata’a ke ma’u ha pa’anga ke toe fakakake ‘aki ‘enau ngaahi pisinisi. Ko e ha kuo fakamolemole’i ai ‘a e kuohili ia ‘o e kau Minisitā ‘o e ‘aho ni?.

‘Oku tau faka’amu pē ke ngata heni pea ke vete hia ‘a e fa’ahinga na’a nau kaungatonu ki heni mo fakatomala he neongo kuo nau hao ‘i he Fakamaau’anga ‘a e fonua ka ‘oku talitali mai ‘a e Fakamaau’anga Ma’olunga taha mei ‘Olunga.

‘Oku ou tui ta’e toe veiveiua ‘oku ‘i ai ‘a e kakai tokolahi ‘i he fonua ni ‘oku foki ‘enau manatu ki he 2006 pea ‘oku vanavanaiki mai he ngalu’ea ‘a e lea ‘o pehe: “Tuku ā e tutu he kuo lava hotau loto pea kuo fakamo’oni e palemia ke tali e liliu, malo e ngaue lahi”

Faka'apa'apa Atu,

'Eliesa Fifita