Ola lelei fakataha kau Taki Pasifiki fakahoko 'i Tonga

Ko e fakataha ko'eni na'e lele mei he 'aho 26 ki he 30 'o 'Akosi pea 'oku mahino mai he fakamatala mei he kau taki pehe ki he kau folau mei he ngaaai fonua hili hono faka'eke'eke kinautolu 'e he ngaahi kautaha ongoongo 'a e makehe ange pe 'a e founga talitali kakai pehe ki he 'ulungaanga, founga mo e fakahoko fatongia 'a Tonga.

Na'e fakahoko foki mo e retreat pea koe fakataha 'a e kau taki pe 'iate kinautolu ki he Lolo 'A Halaevalu ki Vava'u pea na'e mahino 'a e mafana moe toe makehe ange 'a e talitali ia na'e fakahoko 'e he kainga mei he Fatafata Mafana.

'I he tu'uta 'a e kau taki 'i Vava'u na'e tu'u laine pe 'a e fanauako mo e kakai mei he Mala'evakapuna Lupepau'u 'o a'u ki he Hotele Puataukanave 'a ia na'e fakahoko kiai 'a e fakataha.

'I hono faka'eke'eke 'a e taha 'o e kau taki na'a ne fakaha ai 'a e mahino 'oku kehe pe 'a Tonga ia pea koe tumutumu 'eni ia kuo a'u kiai hono talitali mo fakalele 'a e ngaahi fakataha 'a e kau taki 'o e Pasifiki.

Na'e fakaha 'e he taha 'o e kau folau 'e 'ikai toe lava 'eha fonua 'a e mafana me founga 'a Tonga pea 'oku ne tala mahino 'a e kei fe'ofa'aki faka-Pasifiki.

Na'e tuku mai foki 'a e ola 'o e ngaahi fealelea 'aki 'a e kau taki pea na'e mahino 'a hono tokangaekina 'o e Feliuliuaki 'a e 'Ea, Ma'olunga 'o e levolo 'o e tahi, Langa Fakalakalaka mo e fefakatau'aki mo e ngaahi kaveinga kehe 'oku matu'aki mahu'inga ki he Pasifiki.