Fiema’u ke ‘ata ki tu’a ngāue ‘a e Pule’anga: Tala e mo’oni ki he kakai Featured
Lau 'a e 'Etita
Fiema’u ke ‘ata ki tu’a ngāue ‘a e Pule’anga: Tala e mo’oni ki he kakai
‘Oku matu’aki fiema’u ke ‘ata kitu’a (transparency) ‘a e ngāue ‘a e Pule’anga mo ‘ene ngaahi fokotu’utu’u pea ke ‘ilo kiai ‘a e kakai ‘o e fonua he koe taha ia ‘o e ngaahi ‘ulungaanga tefito ‘o e temokalati.
‘Oku tautautefito ‘eni ki he ngaahi kaveinga mahu’inga ‘oku ne uesia ‘a e totonu mo e tau’atāina ‘a e kakai ‘o e fonua ‘o kau kiai mo ‘enau koloa.
‘I he tafa’aki ‘e taha koe fatongia ia ‘o e Pule’anga ke faka’ilo ki he kakai ‘o e fonua ‘a e taumu’a ngāue mo e ngaahi ngāue kuo fakahoko pea koe taimi ‘eni ‘oku mahu’inga ai ‘a e va’a fakamatala ‘a e Pule’anga.
‘Oku fa’a toki hahaka hake pe ‘a e kakai ‘o e fonua kuo ‘osi fakahoko ha ngaahi tu’utu’uni ia ‘oku te’eki ke ‘ilo kiai ‘a e kakai pea ‘oku matu’aki fakamamahi ‘eni.
Ko e founga ngāue fakamamani lahi foki pea angamaheni ‘aki ‘i he ngaahi fonua Temokalati ke ‘ave ‘a e ngaahi kaveinga ‘oku kaunga tonu ki he totonu mo e tau’atāina ‘a e kakai ke ‘uluaki ‘omai e loto ‘o e kakai pea toki fakahoko ( public consultation).
Na’e toki fakahū atu ki he ‘Ofisi ‘o e Palasi ‘a e tohi tangi ‘a e kakai na’e tataki ‘e he Komiti Fakafonua ki hono Fakafepaki’i ‘a e Faihala (KFFF) pea poupou kiai mo e tohi tangi ‘a e Hou’eiki Nōpele mo e tohi tangi ‘a e kau Fale Alea mo Minisitā malōlō fekau’aki mo e ta’efiemalie ki he founga ngāue a e Pule’anga ‘o kau ai ‘a e tukuaki’i ki he ngaahi faihala mo e ‘ikai ke fakahoko ki he kakai ‘a e me’a totonu.
‘Oku fakamahino mai mei he tokolahi ‘o e kakai na’e fakamo’oni ki he tohi tangi ko’eni ‘a ia na’e laka he mano ‘oku ‘i ai ‘a e hoha’a ‘a e kakai ‘o e fonua ki he founga ngāue ‘a e Pule’anga ‘a ia ‘oku mahino mai ‘oku ‘ikai ‘ata ki tu’a pea lahi mo hono faka’ikai’i ‘a e ngaahi tukuaki’i kae hili koia ‘oku toki fakamo’oni’i ki mui ‘oku mo’oni ‘a e ngaahi tukuaki’i.
‘Oku fai hono fakamālō’ia ‘a e ngaahi kautaha mītia ‘o kau kiai mo e mītia faka-sōsiale pehe ki he kau fakaanga ‘o e Pule’anga ‘o malava ke ‘ilo ai ‘a e kakai ki he ngaahi kaveinga mahuinga na’e totonu ke mu’aki fakahā ki he kakai pea neongo hono fa’a faka’ikai’i mei he Pule’anga ka ‘oku iku pe ‘o mahino ‘oku mo’oni pea ‘oku fakaloloma ‘a hono fa’a lohiaki’i ‘a e fonua.
‘Oku mahu’inga foki heni ‘a e fatongia ‘o e mītia pehe ki he mahu’inga ‘o e fatongia faka-temokalati koe fakaanga ‘a ia ‘oku makatu’unga mei ai hono ma’u ‘o e mo’oni pea tene fakatupunga ‘a e feinga ‘a e Pule’anga ke ‘ata ki tu’a ‘ene ngāue.
Ko e fakatātā mahino ‘oku hoko ‘i he ‘aho ni ko hono tuku atu ‘i he mītia ‘a hono tali ‘e he Kapineti ke foaki ‘a e totonu ki hono tauhi ‘a e ngaahi lekooti ‘a e fonua (vital statistics) ‘a ia na’e ‘i he malumalu ‘o e Potungāue Lao ki he Siasi ‘o Sisū Kalaisi mo e Kau Ma’onu’oni ‘o e ngaahi ‘aho ki mui ni (LDS).
'Oku 'ikai ke tukuaki'i 'a e Siasi he 'oku fakahoko pe honau fatongia 'i he taumu'a lelei pe ka 'oku fehu'ia 'a e tu;unga fakalao ia 'o e tu'utu'uni ko'eni 'a e Kapineti mo e 'ikai ke fakaha mai ki he kakai 'a ia 'oku 'i ai enau totonu ki honau ngaahi lekooti.
Na’e toe lele mai foki mo e polokalama ‘a e Komiti Fakafonua ki hono Fakafepaki’i ‘o e Faihala ‘i hono fakahoko mai ‘e Sione Teisina Fuko mo William Clive Edwards ‘i he ngaahi Letiō ‘i he fonua ‘o ‘ohake ‘a e kaveinga ko’eni pea na’e faka’ohovale lahi ki he fonua.
Na’e faka’ikai’i mamafa mei he Pule’anga ‘oku ‘ikai ke mo’oni ‘a e tukuaki’i ko’eni ka ‘oku tau fakamālō ki he Minisitā Lao Sione Vuna Faka’otusia ‘ene tala ‘a e mo’oni ki he kakai ‘o e fonua lolotonga ‘a e feme’a’aki ‘a e Fale Alea ‘aneafi ‘aho 19 ‘o Fepueli 2019 ‘o fakahā koe mo’oni kuo ‘osi tali ‘eni ‘e he Kapineti ‘a e tu’utu’uni ko’eni ‘i he ta’u 2017.
Kapau na’e ‘ikai tuku atu ‘e he ngaahi mītia mo e kau fakaanga ‘a e kaveinga mafatukituki ko’eni pea iku ke ‘ilo mo fehu’i ‘e he Kau Memipa ‘o e Fale Alea ‘e ‘ikai fakahoko mai ‘e he Pule’anga ia ki he kakai ha fakamatala fekau’aki mo e kaveinga lahi mo mafatukituki ko;eni ki he totonu mo e tau’atāina ‘a e kakai ki honau ngaahi lekooti.
Ko e kaveinga talanoa’i lahi ia ‘e he kakai ‘i he ngaahi ‘aho ni pea ‘oku ho’ata mei ai ‘a e fiema’u ke ‘ata ki tu’a ‘a e ngāue ‘a e Pule’anga pea ‘omai ‘a e mo’oni ki he kakai.
‘Oku ‘ikai foki koha toki hoko ‘eni ‘a hono lohiaki’i ‘e he Pule’anga ‘a e kakai ‘o e fonua mo hono faka’ikai’i ‘a e ngaahi tukuaki’i mo e ngaahi fakamatala ‘oku tuku mai ‘e he ngaahi kautaha mītīa, mitia faka-sōsiale mo e kau fakaanga pea iku ange pe koe mo’oni.
‘Oku tau fiema’u ha Pule’anga ‘oku ‘ata ki tu’a ‘ene ngāue pea ‘omai ‘a e fakamatala ‘oku mo’oni ki he kakai ‘o e fonua he ‘oku mo’oni ‘a e lau ‘a e himi ‘a e SUTT “Ko hono ‘a’alonga pe ‘e hā kotoa ‘amui”.
5 comments
-
Malo mu'a fkmata lelei. 'Oku ou poupo'ui ho'o observations. Ka kia teau, 'i he 'eku lau 'ae ngaahi tohi kehe kehe 'i he social media 'oku 'ikai pe tete 'ilo 'ae mo'oni. Kuo pau pe kete fili pe koe ha me'a tete tui ki ai. 'I he 'osi 'eku lau e ngaahi unsubstantiated comments, na'aku arrive at my own conclusion. Ko e pule'anga 'oku fklele pe hange ha kautaha. Pea 'i he 'eku vakai, 'oku asi mai 'ae ngaahi me'a 'oku totonu ke fktonutonu moe ngaahi me'a ke fokotu'u. Pea ko 'eku lisi 'eni -
1. Standard Operating Procedures thru' out the organization all way down to the truck drivers. Make sure he can't drive that truck to do personal things.
2. Policies - same policy across the potungaue. It means that you can't fill up the government vehicle without writing the mileage, how many liters of petrol, distance you drove and get a receipt/voucher(?)
3. Business Plan
4. Transparency
5. Mission Statement
6. Understanding the boundary of authority. Ask the Mormon church to explain that if do not understand. But it seem they are in the government, yet they do not understand it. Maybe they are the problems.
7. Position descriptions.
8. Accountability & responsibility.
9. Management skills - I noticed that team building skill does not exist. The top hierarchy enjoy e momona e ngaue kae kei faingata'ai kakai i lao ange.
Ko 'eku fkkaukau fkvale ia. -
Ko e ha Lao kuo Maumau?
Kapau kuo fkmoonii kuo iai ha lao kuo maumaui fokotuu atu ave he vave taha ki he fkmaauanga koe pule 3 ia hotau fonua. Sai pe tohi tangi ka oku ikai hano mafai ona. 'Oku 'iai e tau kau loea mataotao fai mo fakailo e Palemia katau nounou. Pea kapau ko etau mahalo pe fanongo talanoa pe kou tui tau toe kii vakai pe. Pea tuku atu a kenau taki kitautolu koe fili hoko laku kotoa ki tu'a pea fakailo mo enau faihala. Heikai te tau laka ki mua he fakafekiki he koe me'a tau ia e tevolo ke tau ke ai mo femotumotuhi. He koe tokolahi etau tohi tangi oku iai hono ivi he taimi oe fili. Anga pe ia e vakai>
Malo -
Lahi e lau 'oku iai e tohi tangi. Kapu 'oku mo'oni ko e ha hono 'uhing 'oku 'ikai te tau ma'u ha copy 'o e tohi tangi ke tau lau.
-
Malo mua ongoongoleleí pea okú mo‘oní malo ngāué
-
Fakamalo atu 'Etita 'a e fakamaama kuo fai ke maamagia ai 'a e po'ulilolo kuo pulonga ai 'a e fonua (tukukehe pe 'a e vale) he pule kovi mo e taki kovi 'a e palemia mo e pule'anga lolotonga 'oku lau tokua ko e pule'anga fakatemokalati 'a ia 'ape ko e pule lelei 'a e kakai ma'ae kakai 'e he kakai 'o hili ange ko ia ko e pule kovi mo'oni fakatikitato, fakaehaua mo fakaleveleva 'a e palemia mo e pule'anga ma'ae palemia mo e pule'anga 'e he palemia mo e pule'anga!
'Oku fetakai mo mafaifai 'a e palemia he'ene founga ta'efieauna, ta'efaka'apa'apa, kaka mo e loi lahi hono tekefua ta'ekatakata mo ta'efakaongonoa tokua ko e pule 'a e temokalati ka e toitoi mai he PTOA 'o ngaue'aki 'a e kau muimui kuikui ki he mo'oni mo e lelei fakakatoa 'a e fonua he'enau SIOKITA ma'a kinautolu pe he funga 'o e TA'E'OFA he'enau fievaleloi (ka ko e valemo'oni).
Kuo tau tuli telinga mo e pango'ia he kaikaila longoa'a noa'ia mo ta'e'uhinga ('o tukukehe ange 'ae vale) 'a e palemia he ta'u laka hake he 25 'o a'u mai pe ki he'ene kemipeini he ongo fili falealea fakamuimui hono teke 'a e ngaahi fakakaukau muli mohu palopalema ko e 'ata-ki-tu'a mo e tali-ui mo e vahevahe-tatau mo e fakamaau-totonu pea hili ange kotoa kuo ne to e tamalaki mo fakapelepela kotoa ai pea toki ne si kotoa ki he fanga puaka ka e lulu tava ia he koloa 'a e fonua!
'OKU UI 'ENI KO E TIKITATI KA E 'IKAI KO E TEMOKALATI.
'Oku 'oatu 'emau poupou fefeka mo ta'etoeveiveiua ki he Komiti KFFF he ngaahi tohitangi kuo fakahu kihe 'Ofisi Palasi pea 'oku fiema'u ke veteki faka-Tu'i mo faka-Konisitutone 'a e falealea mo e pule'anga he vave taha ka e to e fakalelei mo fakatotolo'i 'a e ngaahi faihala (mo ngaue'aki hala) 'a e mafai mo e koloa 'a e fonua 'e he palemia mo e pule'anga.
'OKU FIEMA'U KE FAI LEVA MO HOKO 'ENI HE VAVE TAHA HE 'OKU MAMA 'A E VAKA 'O E FONUA MO NGOTONGOTO MAMALIE PEA KOE MATE KOTOA KUO PAU!