Fakaivia ngaahi ngaue ki he fakalakalaka tu'uloa
22 Sepitema 2024. Na’e fakafofonga’i atu ‘a Tonga ‘e he Minisita Fefakatau'aki mo e Langa Fakalakalaka Faka'ikonomika pea mo e Minisita ki he Takimamata Hon. Dr. Viliami Uasike Latu, ki he fakataha mau’olunga ‘a e kau pule e ngaahi pangike fakalakalaka fakamamani lahi (MDBs) mo e ngaahi fonua memipa e Pule’anga Fakatahataha.
Ko e fakataha 'eni na'e fakahoko ki he 'Ulu'i 'Ofisi 'o e Pule'anga Fakatahataha (United Nations) 'i Niu 'Ioke ki hono alea'i 'a e founga mo e halafononga ki hono fakaivia fakapa’anga e ngaue ki he ngaahi Taumu’a Fakalakalaka Tu’uloa.
Na’e fokotu’utu’u e fakataha ni ‘e Jamaica pea mo Canada, ko e ongo Sea e Kulupu Tokoni ki he fakapa’anga e Ngaahi Taumu’a Fakalakalaka Tu’uloa fakataha pea mo Spain, ‘a ia ‘oku fakahoko ki ai e Konifelenisi Fakavaha’apule’anga ki he Fakapa’anga e Fakalakalaka (FFD4).
Na’e me’a he fakataha ni ‘a e Tokoni Sekelitali Seniale e Pule’anga Fakatahataha, H.E. Amina J. Mohammed, kau Pule e ngaahi Pangike MDBs mo e ngaahi fonua memipa.
Ko e taumu’a e fakataha ni ke fakahoko 'a e fevahevahe'aki ki he ki he tu’unga ’oku ‘i ai 'a e ngaue fakataha mo e ngaahi pangike tenau fakapa'anga 'a e ngahai fakalakalaka 'a e ngaahi fonua 'oku kau mai ki he polokalama ko'eni.
Ko e konga foki 'eni 'a e ngaahi fakataha 'oku taki atu ai 'a e 'Eiki Palemia Hon. Hu'akavameiliku mo e 'Eiki Minisita Minisita Fefakatau'aki mo e Langa Fakalakalaka Faka'ikonomika pea mo e Minisita ki he Takimamata Hon. Dr. Viliami Uasike Latu pehe ki he 'Eiki Minisita MEIDECC Hon. Fekitamoeloa 'Utoikamanu mo e ni'ihi kehe ki he 'Ulu'i 'Ofisi 'o e Pule'anga Fakatahataha 'i Niu 'Ioke.
Na’e ‘i he fakataha ni ‘a Hon. Dulcie Tei koe Fakafofonga Fale Alea Tongatapu 6, H.E. Va’inga Tone 'Amipasitoa 'a Tonga ki he UN pea mo ‘Olita Tupou ko e Tokoni Sekelitali mei he 'Ofisi 'o e Palemia.
