Kau atu Katinali Mafi ki he ouau fili Tu'i Tapu hoko
23 'Epeleli 2025. 'Oku 'amanaki kau atu 'a e ongo Katinali 'e ua ke fakafofonga'i 'a e tukuifonua 'o e Pasifiki ki hono teu fili 'o e Tu'i Tapu kene fetongi 'a e Tu'i Tapu kuo hala Pope Francis.
Ko Katinali Mafi 'o Tonga pea mo Katinali Ribat 'o Papua New Guinea kuo fakapapau'i tena me'a atu ke kau ki he ouau fakahisitolia ni 'a ia 'oku 'amanaki ke fakahoko 'i he Vatikani 'i Loma.
'Oku lolotonga fakahoko foki 'i he taimi ni 'a e taimi fakamamahi pea koe kau Katinali 'oku si'i hifo honau ta'u 'i he ta'u 80 tenau fakataha ki he Vatikani ke fakakakato 'a e ouau ni.
'Oku fe'unga katoa 'a e tokolahi 'o e kau Katinali mo e toko 252 pea koe toko 138 ai koe kau katinali tenau fakahoko 'a e fili (cardinal electors) 'a ia ko kinautolu ia 'oku si'i hifo 'i he ta'u 80 pea koe kau atu 'a Katinali Mafi 'o Tonga kuo 'osi fakapapau'i mai ia mei he Vatikani fakatatau ki he fakamatala kuo a'utaki mai ki he ngaahi kautaha ongoongo.
Ko e taimi tatau kuo fakaha faka'ofisiale mei he 'Ulu'i 'Ofisi 'o e Siasi Katolika 'i Papua New Guinea 'a e kau atu mo Katinali Ribal ki he ouau ni.
Ko hono fili 'o ha Tu'i Tapu 'oku fakahoko ia 'i he founga koe paloti fakapulipuli pea 'oku hahoko ia 'i loto he 'aho 'e 15 ki he 20 hili 'a e 'ataa 'a e lakanga ni 'i ha hala pe ko e fakafisi 'a ha Tu'i Tapu mei he lakanga toputapu ni.
Na'e hala foki 'a Tu'i Tapu Francis 'i he 'aho 21 'o 'Epeleli 'o e ta'u ni pea koe 'aho pe 'eni 'e 2 mei ai ka kuo kamata atu hono fokotu'utu'u 'o e ouau toputapu mo tukufakaholo ni pea 'oku fakaongo ki ai 'a mamani kae tautautefito ki he Siasi Katolika Loma.
