Kamata 'a e feme'a'aki fekau'aki mo e patiseti ta'u faka-pa'anga 2024/25

16 Sune 2024. Kuo kamata 'a e feme'a'aki fekau'aki mo e patiseti 'a e fonua 'i he Fale Alea 'o Tonga 'i he uike ni peakamata ai pea lava ai pe moe malanga 'a e 'Eiki Minisita Pa'anga mo e Palani Fakafonua Hon. Tiofilusi Tiueti ''o fakamatala 'a e tu'unga 'o e patiseti.

 

‘Oku fakakaveinga ‘aki e patiseti 2024/25 ˊ ke “Langa e ngaahi makatu’unga ke paotoloaki e tupulaki faka’ekonomika ˊ”, ke tokoni ki hono fakamalohia ‘a e tukupā ‘a e pule’anga ˊ ki hono langa hake e tuʻunga malu fakaʻekonomika ‘a e fonuaˊ, fakasōsialeˊ, mo a’usia e langa fakalakalaka ‘oku tuʻuloaˊ.

 

Ko e patiseti ki he 2024/25ˊ ‘oku palanisi, ‘a ia ko e fakahoa eni ki he patiseti fakamuimui taha na’e fokotu’u ‘e he pule’angaˊ ‘oku palanisi ki Fale Alea ˊ na’e ‘i he 2019/20.

 

‘Oku ho’ata mai heni ‘a e mahu’inga’ia ‘a e pule’anga lolotongaˊ ‘i hono tokangaekina e tu’unga malu fakapa’anga mo faka’ekonomika ‘a e fonuaˊ.

 

‘Oku fakapa’anga ‘a e patiseti 2024/25 ‘aki e $452.3m mei he pa’anga ‘a e pule’anga ˊ, pea $446.9m mei he pa’anga tokoni mei muliˊ. ‘E ‘ikai ha toe tukuhau fakalotofonua fo’ou ‘e fokotu’u ki he ta’u fakapa’anga 2024/25.

 

Tukukehe ‘a e pa’anga ‘i he Potungaue Pa’angaˊ ki he ngaahi fakamole fakalukufua ‘a e pule’angaˊ, ko e potungaue ‘oku vahe’i lahi taha hono fakapa’anga ‘i he patisetiˊ ko e Potungaue Akoˊ mo e Potungaue Mo’uiˊ ‘a ia ‘oku to e hiki foki ‘a hono fakapa’angaˊ ‘i he 2024/25ˊ, ko e taha ‘o e ongo Potungaue mahu’inga ‘a e Pule’anga.

 

Ko e konga ‘o e ngaahi polokalama ‘oku palani ke fakahoko ‘i he tau’u fakapa’anga 2025 ‘i he ongo sekitoa ko ‘eni, hange koe: hoko atu ki he ngaahi ‘otumotu ‘a e polokalama ako kaukatoa, poloseki ako ki he poto’i ngaue moe akongaue, langa ‘o e falemahaki fo’ou ‘i Vava’u, ko hono fakalelei’i ‘o e ‘Apiako Ako’anga Neesi ko Kuini Salote, pea moe Misiume Fakafonua ‘a Tonga ma’ae ‘Univesiti Fakafonua ‘o Tonga (TNU), moe ngaahi polokalama kehe pe.

 

Ke fakafenāpasi mo e taumu’a tefito ‘o e patiseti΄ ki hono tokangaekina e kakai ‘o e fonua΄, ʻoku fokotuʻu ʻe he puleʻanga´ ‘a e ngaahi ngaue kehekehe ‘o kau ai ki hono fakalahi ʻa e tokoni ki he ngaahi ʻapiako ʻoku ʻikai fakapuleʻanga´, ‘i he levolo akoʻanga maʻolunga, pea pehe ki he fakatekinikale mo e vokāsio΄.

 

ʻIkai ngata ai΄, ‘oku fokotuʻu ʻe he puleʻanga΄ ke fakalahi ʻa e monū’ia ki he kau toulekeleka΄ mo e kau faingata’a’ia´ ʻo kau ai e hiki ‘i he tokolahi ‘o kinautolu ‘i he polokalama monū’ia΄ni ‘aki hono fakakau e kau toulekeleka mei he ta’u motu’a 67 (holo eni mei he ta’u 70), ta’u 65 ‘i he ta’u fakapa’anga 2026 pea ta’u 63 ‘i he 2027.

 

Ka e pehe foki ki he palani ‘a e pule’anga´ ki hono fakalelei’i ‘a e vahenga ‘a e kaungaue fakapule’anga´ koe’uhi´ ko e hikihiki ‘a e totongi koloa´, ‘aki e 5% ‘o kamata ‘i Siulai 2024 (makehe mei he 5% ‘i Sanuali 2024), fakataha mo e ngaahi vahenga monu’ia kehe tautautefito ki hono fakatokanga’i makehe ange ‘a e ngaahi fakahoko fatongia ‘a e kau faiako´, neesi´ mo e toketā´ ‘i he 2024/25.

 

‘Oku hokohoko atu hono fakapa’anga ‘e he pule’anga´ ‘a e $5m ‘i he ta’u ki hono fakafepaki’i’aki e ngaahi faito’o ta’efakalao´.

 

‘Oku tokanga ‘a e Patiseti 2025, ki hono tokonia ‘a e ngaahi ngāue langa faka’ekonōmiká, fengāue’aki mo e sekitoa taautaha ‘o kamata ‘aki e $9.1m ko e fakapa’anga ‘e he pule’anga, ke hokoatu e ngaahi ngaue fakalakalaka lolotongá, tokangaekina e malu ‘a e fonuá, pea mo e tūkunga lelei e mo’ui ‘a e kakai΄.