Kohai ‘Oku Loi?: Laui Miliona kuo Hua’i Mai ki Tonga ni Kau Ai CEDAW ^Featured

Ko e ‘isiu pelepelengesi ‘eni ki he fonua he ngaahi ‘aho ni pea ‘oku toutou faka’ikai’i foki ‘e he ngaahi kautaha ta’e faka pule’anga (NGOs) ko’eni 'i he malumalu 'o e Sosaieti Sivile 'a Tonga ‘a e ngaahi tukuaki’i 'o pehē ‘oku nau poupou ki he konivesio ko’eni ‘oku makatu’unga ‘i he pa’anga. Ko hono fakapapau’i mai ko’eni mei he ‘Eiki Palemia ‘a e mo’oni ‘o e pa’anga tokoni laumiliona ko’eni ‘oku ne ‘ohake ai ‘a hono fehu’ia ‘a e ‘asenita ngāue ‘a e ngaahi kautaha ko’eni fekau’aki mo e CEDAW mo e 'uhinga 'oku nau fufu'i ai 'a e mo'oni.

“Ko e ngaahi tokoni mei muli fekau’aki mo e civil society, lahi foki ‘a e fanga ki’i kulupu ‘a e finemātu’a hangē koe me’a ko’eni ‘a e human rights mo e democracy movement pea ‘oku ‘i ai e me’a ‘e taha ‘oku talekita ai ‘a Drew koe tokoni koia kuo ‘osi laui miliona hono hua’i mai mei muli ke tokoni’i ‘aki ‘a e ngaahi kulupu ‘a e civil society ke fakahoko ‘a e ngaahi fatongia. Na’e kau ‘a e CEDAW, ‘oku ‘i loto ‘a e CEDAW ‘i he tokoni lau miliona ko’eni kuo ‘osi hua’i mai ki Tonga. Teu pehē ‘i he ta’u ‘e hongofulu mā ua nai kuo tau situ’a kiai,” ko e konga ia ‘o e me’a ‘a e ‘Eiki Palēmia ‘i hono faka’eke’eke ‘e he TNews.

‘Oku hulu’i mai ‘i he me’a ‘a e Palēmia ‘a e tōkehekehe lahi mo e fanga ki’i kulupu mei he sosaieti sivile (Civil Society) ‘oku nau teke mui mo poupou ki he Pule’anga he kaveinga ko’eni. ‘Ikai ngata heni ka ‘oku mahino mai ‘oku ‘i ai ‘a e poini mahu’inga heni ‘a ia na’e ‘ohake ‘e he kau Taki Lotu fekau’aki mo ‘enau ta’e tui ki hono teuaki fakatau ‘aki ‘a e pa’aanga ‘a e malu mo e hao faka mōlale/’Efika mo faka Kalisitiane ‘a e fonua ‘o ‘ikai lau kiai ‘a e malu faka Tukufakaholo hangē koe taukave ‘a e tokolahi ‘o e fonua.

Kapau leva koe mo'oni 'eni 'oku me'a 'aki 'e he 'Eiki Palēmia pea 'oku ha mai leva kuo fuoloa 'a e kaimelie 'a e ngaahi kautaha ko'eni (NGos) mei he tokoni ko'eni 'o kau ai 'a e ngaahi kulupu ko'eni mei sosaieti sivile (Civil Society) 'oku nau poupou ki he CEDAW. 'I he'ene pehē leva 'e fakanatula pe ia kenau poupou 'i he 'uhinga koia he 'oku lele 'i matangi ai 'a 'enau fakahoko fatongia mo 'enau taumu'a pea 'oku 'ikai toe hela fakamatala'i.

‘Oku tau’ataina foki ‘a e tokotaha kotoa ki he’ene tui ka ‘oku mahu’inga heni ‘a e ngaahi mo’oni’i me’a ‘oku hoha’a ki ai ‘a e kakai ‘o e fonua pea koe fatongia totonu ‘eni ‘o e mītia ke ‘oatu kotoa pē pea mei ai leva hono fakahoko ‘ehe kakai ‘a ‘enau fakamaau kae tautautefito ki he ngaahi kaveinga pelepelengesi pehe ni.