Fokotu'utu'u ki he me'afaka'eiki 'o Sione Tu'itupu Lauaki ^Featured

 Pea ‘oku ou kole ke u fakatapu ki he ngaahi tu‘unga kotoa ‘oku totonu ke fakatapua kae ‘ataa ke u fakafofonga‘i atu ‘a e famili Lauaki ke fakahoko atu ‘a e fokotu‘utu‘u ki he fakamavae mo si‘i Sione Tu‘itupu Lauaki, ko e koloa ‘a e famili na‘e foaki ‘ehe ‘Otua pea kuo ne toe ui atu.

‘Oku ‘amanaki ke fakahoko ‘a Malanga Fakamavae ‘a e famili, kainga, ngaahi kaungame‘a, siasi, mo e famili ‘akapulu ‘o Sione Lauaki ‘i he pongipongi Tokonaki, 18 ‘o Fepueli, 2017 ‘i he taimi 10.00 pongipongi, ‘i he falelotu Church Unlimited, 3 Te Atatu Road, Glendene, ‘Aokalani, Nu‘u Sila.

Ko e fangimalie eni ke mou omi ke tau lotu mo fakafeta’ia ‘a e ngaahi Tapuaki meihe ‘Otua na’e fakafou ki he famili, ‘i he foha, ko e husepaniti ‘ofa‘anga, ko e tamai ‘ofa, pea ko e ta’okete mo e tounga’ane tonunga.

Na’e ngāue‘aki ‘e Sione hono taleniti ‘akapulu ke hapai pea hakeaki‘i ‘a e ki’i famili masivaˊ ni, koe’uhi pe ko ‘ene ‘ofa famili mo ‘ene manatu ki hono ki‘i tupu‘anga masiva ‘i Tonga.

Hili ‘a e Malangaˊ ‘e fakakakato ‘a e ouau fakamavae ki he Mala’e Waikumete, ‘i Waitakere, ‘Aokalani, Nu’u Sila. 

‘Oku ‘oatu ‘a e kole meihe famili Lauaki ke tuku ange pe mu‘a hamau ki‘i taimi ke mau feohi faka‘osi mo Sione koe’uhi ko e peau tupukoso kuo fakafakafokifā ‘ene ‘ahia homau lotofale, pea tau toki kau fakataha ‘o fakakakato ‘a e ouau fakamavae ‘i he ‘aho Tokonaki ko hono 18 ‘o Fepueli, 2017.

‘Oku mau hounga’i ‘i he ngaahi lotu, popoaki ‘ofa mo fiekaunga mamahi mo e ngaahi tokoni kotoa pe kuo mau ta‘imalie ai ‘i taimi faingata‘a’ ni.

Tauange mo e Kelesi ‘a e ‘Otua ke ne fakaivia kitautolu ke tau malava ‘o tali’aki ‘a e taufa kafakafa kuo tō takutaku homau ki‘i lotofale masiva.

‘I he Loto Faka‘apa‘apa & Lotu
Dr ‘Ana Hau‘alofa‘ia Koloto
Fakafofonga ‘o e Famili Lauaki ki he Fetu‘utaki mo e Metia.
Phone: 021 120 3864