Tanupou Kingi Tupou VI Poloseki $66 Miliona Uafu Kuini Sālote ^Featured

Ko e poloseki ko’eni ‘oku fakafuofua hono mahu’inga ki he Pa’anga ‘e $66 Miliona pea koe faka-pa’anga foki ‘eni ‘e he tokoni ‘a e Pule’anga Siapani.

Na’e me’a foki ‘a e ‘Amipasitoa Sipani Yukio Numata ‘o fakapapau’i ‘i he polokalama ni ‘a e mahu’inga ‘o e vā fengaue’aki mo e kaume’a fafale ‘a e ongo fonua. Na’a ne toe hoko atu ‘o fakahā ‘oku fakamo’oni ki he vā fengāue’aki fe’ofo’ofani ‘o Tonga mo Siapani ‘a hono faka-pa’anga ‘e he kakai ‘o Siapani ‘a e poloseki ko’eni ke ‘ausia ha uafu ‘oku lelei mo malu ki he fefolau’aki faka-lotofonua.

‘I he me’a ‘a e Palēmia ‘o Tonga ‘Akilisi Pohiva ‘i he’ene talitali na’a ne fakamamafa’i ‘a e hoko ‘a e poloseki ko’eni ko e faka’ilonga mo’oni ‘a hono faitokonia ‘o Tonga ‘e he Pule’anga Siapani. Oku hokohoko lelei mai ‘a e tokoni ‘a Siapani ki Tonga talu ‘a hono kamata ‘o e vā fengāue’aki ‘o e ongo fonua fakatatau ki he me’a ‘a e Palēmia.

Na’e toe fakahā foki ‘e Pohiva ‘oku hanga ‘e he Uafu fo’ou ko’eni ‘oku tanupou ‘o faitokonia ‘a hono langa hake ‘o e Takimamata mo e ngaahi pisinisi ‘e hoko koe ma’u’anga ngāue ki he kakai ‘o e fonua.

Na’e fakahoko ai pe ‘a e ouau tanupou ‘e he Hau ‘o e Fonua Tupou VI pea na’e me’a ai foki mo e Ta'ahine Kuini Nanasipau'u Tuku'aho, Hou’eiki ‘o e Fonua, Hou’eiki Minisitā, Kau Fakafofonga Ngaahi Pule’anga Muli mo e kau Fakaafe tokolahi.