Ta’ofi ‘Ofisi Palasi Teu Langa Mala'e Tāpulu ‘a e Palēmia 'i Tufumahina Featured
Tofi'a Tama Tu'i 'i Tufumahina
Nuku’alofa, 25 Sanuali 2016. Na’e ta’ofi ‘e he ‘Ofisi Palasi ‘a e ‘amanaki ke fakahoko ‘e he Potungāue Ngaahi Ngāue Lalahi hono teke ‘a e konga ‘o Tufumahina koe teu langa mala’e tāpulu ‘a e Palēmia mo e Pule’anga tokua ko e teuteu ki he Sipoti ‘a e Pasifiki ‘oku ‘amanaki ke fakahoko mai ki Tonga ni ‘i he 2019.
Ko e tofi’a foki ‘eni ‘o e Tama Tu’i pea fakatatau ki he fakamatala mei he ‘Ofisi ‘o e Palasi na’e te’eki tu’o taha ke fakahoko ha femahino’aki mo e Palēmia pe koe Pule’anga ‘e fakahoko ha langa ha mala’e tāpulu ‘i he ‘elia ko’eni. ‘I he’ene pehe foki ‘oku ‘i ai hono fehu’ia lahi ‘a e fa’ahinga tu’utu’uni pehe ni kuo fakahoko ‘e he Palēmia ‘o e fonua ka e pehe ki hono tu’unga fakalao mo e femahino’aki mo e ngaahi mafai.
‘I he fakamatala mei he ‘Ofisi ‘o e Palasi na’e ma’u ha fakahā fekau’aki mo e me’a ni pea na’e fakavave ‘a hono fakahoko ‘a e tu’utu’uni ke ta’ofi ‘a e ngāue ko’eni he na’e ‘ikai ha alea pehe pea ‘oku kei fai e talafili pe koe hā ‘a e ‘uhinga ‘oku hoko ai ‘a e fa’ahinga founga ni ‘i he ngaahi ‘aho ni.
‘Oku ‘i ai foki mo e fakamatala falala’anga mei he kau fale’i faka-Tofi’a ‘a ‘Ene ‘Afio na’e fakahoko 'a e femahino’aki mo e Palēmia ki he feitu’u kehe ke fakahoko ai ‘a e fakakaukau ki he mala’e tapulu ka na'e faka’ohovale ‘a e vivili mai pe ‘a e Palēmia ia ki he tofi’a ‘i Tufumahina.
‘Oku hoko foki ‘a e ngaahi fai tu’utu’uni pehe ni ‘a e Palēmia kene fakae’a mai ‘a e vaivai ‘a e tu’unga ‘oku ‘i ai ‘a e kau fale’i pea kuo toutou hoko ‘a ia ‘oku fehu’ia lahi ‘i he taimi tatau ‘a e tu’unga mo’ui lelei ‘oku ‘i ai kae pehe ki he ngaahi fale’i ‘oku fakahoko kiate ia. Ko e 'isiuu foki 'e taha ke fai ha vakai kiai pe 'oku fakahoko pe 'e he kau fale'i honau fatongia ka 'oku 'ikai fa'a fakakaukau kiai 'a e Taki ia.
Ko e Palēmia ‘eni ‘o e fonua pea ‘oku ‘i ai ‘a e totonu ‘a e kakai ‘o e ke ‘ilo ki he tu’unga ‘oku ‘i ai ‘ene fakahoko fatongia mo ‘ene mo’ui mo e fiema’u ‘a e kakai lelei, lotu mo taukei ke ofi kiate ia mo fale’i. ‘Oku makatu’unga ‘eni he ‘ikai ke hokohoko lelei ‘ene fai tu’utu’uni pea ‘oku ne ‘ave ‘a e ‘ata ‘oku fehu’ia lahi ‘e he fonua kae pehe ki Tu’apule’anga.
14 comments
-
Oku ikai ke fu'u mahino mai e me'ani he oku hange oku fai e fetukuaki pe ko hai Na'ane kamata e me'ani ka ku fai e tuhu ki he palemia koe uhiaa pe koe taki ia he taimini ka I he eku lave'i oku I ai pe komiti ki he kelekele moe potungaue a e pule'anga ki ai pea toe maau moe komiti kelekele ia fakaTu'i ....oku faingofua pe me'ani kapau e fou pe he me'a totonu ,,,,,kapau koe tofi'a eni ia o e Tu'i kuopau ke finangalo ia ki ai fefe e tu'u a e lao ki he tofi'a o e Tu'i moe kelekele pule'anga ?oku ma'u inasi nai e Tu'i mei he tukuhau o e kelekele fakapule'anga?oku I ai pe uhinga ne fai ai e me'ani ,,,,,,ikai ke fu'u mama'o eni moe fetukuaki I patangata
-
Fo'i fkkaukau lelei ia, he 'e lava 'o kosi mo fakam'a'a atu ai pe 'a e 'elia ko ia ki he lelei mo manakoa ki he takimamata, pea hao mo e $ 'a e 'ofisi Palasi ki ha to e fatongia e taha.
-
Vakai'i na ko ha mala'e tapulu ena ne fokotu'utu'u 'e Piveni P mo Siaosi P ko e komiti fale'i 'a e PM... kuo mei e'a kau me'a ni ko e komiti sipoti fo'ou ki hono teuteu'i a Tonga ki he SPG
-
Ki he Tama ko Tupou VI, fai aa mo veteki e ki'i Pule'anga koeni, he 'oku 'ikai tokanga e Palemia ia ki he Lao ku tokanga ia ke langa hono hisitolia ko e siana ta'eufi ia. Pea tokanga'i atu na kuo maau mo ha project ia ki mala'ekula.
Kuo te ofo'ia kita pe 'oku konisenisi fefee 'a e kau Kapineti 'enau faka'ataa e fa'ahinga tu'utu'u ni koeni, ka me'a pea mou fakafisi kotoa moutolu kau Kapineti he temou ngalivale kotoa, ha e 'aonga ho'o mou kei nofo atu ki he vahe lahi ka mou ngalivale mo hange 'oku mou haa fakasesele mai ki he kakai, pea toe taha 'e mahino leva ku mou poupou'i e kovi mo e tu'utu'uni fa'efakalao kotoa koeni 'osi ange ku mou FIE TU'I KOTOA HOU'EIKI KAPINETI.