Fu'u Lahi e Folau 'a e Palēmia Featured
'Eliesa Fifita 'o Tufuenga, Kolomotu'a
1 Sune, 2015.
Tangata’eiki,
Kataki mu’a kae tu’u atu ‘eku hoha’a ko’eni ki he fu’u lahi a e folau ‘a e Palēmia lolotonga ia ‘oku lahi ‘a e ngaahi kaveinga mahu’inga ‘i he fonua ni ‘oku totonu ke me’a hifo ‘o tokanga kiai. ‘Oku lolotonga longoa’a ‘a e fonua ‘i he CEDAW pea na’e fai mo e laka fakahā loto 'e ua lolotonga ia ‘oku folau ia ki muli.
‘Oku lolotonga teuteu ‘a e fonua ki he patiseti pea lahi mo e ngaahi kaveinga mafatukituki ‘o kau ai hono ‘eke fakalao ‘e ‘Eiki Nopele Fakafanua ‘a hono tofi mo vahe atu ‘o Patangata pea na’e faka’eke’eke mai ‘i he ongoongo ‘e foki mai ‘o fakahoko e ngāue kiai ka ‘oku te’eki pe ke tau mai kuo toe folau atu ia.
‘Oku mālie he ko e me’a ‘eni na’a ne fakafepaki’i lahi ‘i he ngaahi ta’u kuo maliu atu mo toutou ‘eke ‘a e folau noa’ia mo maumau taimi ‘a e kau Minisitā mo Palēmia ki mu’a atu. Ko ‘eni kuo folau tu’o fā hake pe ia ‘i loto he ngaahi lau uike pea ‘oku hangē ka lahilahi ange ‘a e taimi ia ‘e mavahe ai kae hē takai holo e kau akonga pea koe fielau e lahi 'enau to kehekehe 'i hono faka'eke'eke 'i he mitia 'o ngali vale ai e fonua.
‘Oku fai e hoha’a ki heni lolotonga ‘oku mavaeua ‘a e kakai ‘o e fonua pea ‘ikai ngata ai ‘oku lahi ‘a e hoha’a ‘a e kakai ki he ngaahi kaveinga kehekehe pe ‘oku kamata ke ma’alifekina mai ‘o kau ai ‘a e ngaahi tukuhau ‘oku toitoi mai ‘i he patiseti ‘o e ta’u ni.
Na’e hā ‘i hono faka’eke’eke ‘i he ongoongo ‘a e TNews ‘ene ‘ohovale mo ofo 'i he laka fakahā loto ‘a e kau Taki Lotu mo e kakai ‘o e fonua. ‘Oku ‘uhinga ‘a e ‘ohovale koe ‘ikai ke me’a hifo ‘i Tonga ni ‘o fanongo ki he le’o ‘o e kakai 'o e fonua ‘a ia na’a ne fa’a malanga’i ki mu’a.
‘Oku totonu ke ki’i vakavakai lelei pe ‘a e Palēmia ki he folau he ‘oku fu’u fiema’u hano taimi ke me’a hifo ai ke solova ‘a e fasi tanunu mai ‘a e lāunga mo e ta’efiemalie ki he fakahoko fatongia ‘a e Pule’anga. Me’a koe vave ‘a e ngalo ‘a e ngaahi fakaanga fefeka mo ta’eufi ne fakahoko ki mu’a fekau’aki mo e folau.
Kuo nifi e kae nafa ‘eni.
Faka’apa’apa Atu
‘Eliesa Fifita
Tufuenga
Kolomotu’a
4 comments
-
Na'e ha mai 'i he tipeiti 'i he patiseti 2015/2016 he 'aho ni 'aho 10 'o Siulai 2015 'a e hiki 'i he lahi 'o e pa'anga folau ki tu'apule'anga. Na'e kau foki e palemia e 'aho ni he tangata na'a ne fa'a malanga'i 'a e maumautaimi 'o e folau ki tu'apule'anga. ka kuoha e 'aho ni, mahalo kuo mahino ki hono kiate ia 'a e anga e ngaue 'oku fai. Toki mahino he 'aho ni ki a 'Akilsi 'a ene ta'emahino lahi he ngaahi me'a ku hoko he fonua ni. Ko e 'aho ni na'a ne toutou malanga'i ai e palopalema e kelekele ki he langa fklakalaka pea kau atu kiai moe mo hotau 'ulungaanga fkfonua. Ko e me'a 'oku feinga kiai e siana ni ke veteki hotau 'ulungaanga fkfonua mo 'etau ngaahi me'a fkfonua. Fakapo e
-
manava si'i au na pa kalava ha taha he loki ni he fkanga ki he palemia!!
-
ko e me'a ia 'oku toutou folau ai na'a pa kalava ia he lahilahi e longoa'a. ko 'e ne toki mahino ki ai ko e me'a kovi ko e fakaanga noa'ia, 'o ku sai pe foki hono fakaanga'i 'a e me'a totonu ka 'oku ikai ke 'ai tavale noa'ia.
-
'Oku mahino pe foki koe fatongia ia 'o e Palemia ke folau pea 'oku mo'oni pe ia ka koe poini mahu'inga 'i he tohi 'a e matapule ni koe taimi 'eni 'oku mavae ua ai e kakai pea 'oku totonu ke me'a heni e palemia. Sai pe folau kapau 'oku lelei 'a 'api ka 'oku 'ikai.