Kei Puli Pē Pa'anga Tokoni Fale Alea ki Vava'u 2008-2010 ^Featured

Na’a ku fanongo tonu ‘i hono ‘eke ‘e he’emau Fakafofonga Fale Alea tutuku ko Lisiate ‘Akolo ‘i he to’u Fale Alea kuo ‘osi pea na’e toutou ‘eke foki ‘e he Fakafofonga Fika 1 ‘o Tongatapu 'Akilisi POhiva ‘a ia ‘oku Palēmia ‘i he ‘aho ni ‘a e me’a tatau. Na’e toe ha foki ‘i he taha 'o e ngaahi lipooti ‘a’ahi faka Fale Alea ‘a Vava’u 'i he 2011-2014 'a hono fehu’ia ‘a e ngaue pango ko'eni.

‘Oku ou ‘oatu ‘a e tohi ni mo ‘eku faka’amu ke ongona homau le’o he koe Fakafofonga na’e puli ai ‘a e pa’anga ko’eni ‘Etuate Sungalu Lavulavu kuo toe hūmai ki he Fale Alea pea kuo hoko ‘o Minisitā. ‘Oku ‘i ai ‘a e ongo’i loto si’i ‘iate kimautolu kainga mei he Lolo pē ‘e toe hoko atu koaa ha ngāue ki he tu’unga ‘oku ‘i ai ‘a e pa’anga ko’eni pe ‘oku kau ia hono fakamolemole’i ‘e he Palemia hili ‘ene heka ki he Sea. ‘Oku mahino na’e fai ‘a e ngāue kiai ‘a e komiti ‘a e Fale Alea pea ‘oku mau fie’ilo ki hono ola.

‘Oku ‘i ai ‘a ‘emau totonu ki he pa’anga ko’eni pea ‘oku ‘ikai koha me’a si’i ‘eni ke tanu ‘a e ngaahi ngāue ta’efakapotopoto ko’eni. ‘Oku mau tali ke fakaava ‘a e Fale Alea kae fakahū kiai ‘a ‘emau tohi tangi fekau’aki mo e kaveinga ni ka ‘oku mahu’inga ke ‘oatu ‘a e tohi ni heni ‘Etita ke ‘ilo ‘e he kakai ‘o e fonua ‘oku lolotonga puli ‘a e pa’anga ko’eni pea ‘oku te’eki ‘omai ha tali kiai.

‘Oku ‘Afio hifo ‘a Sihova pea ‘oku ‘ikai ha me’a ‘e puli he koe fonua ‘eni ne “Tuku Ki Langi” pea na’e fakahoko ia ‘i Vava’u Lahi.

Faka’apa’apa Atu,

Lopaukamea

'Otu Motu Lalo