'E tu’ulahoko ai pe ‘a e Fili Fakahaloto ke tukuhifo ‘a e Palemia ^Featured

‘Oku anga maheni ‘aki pe foki ‘a hono fakakakato ‘a e ngaahi pisinisi angamaheni ‘a e Fale pea ‘oku kau kiai ‘a e ngaahi ngaue na’e toe mai mei he fakataha faka’osi ‘a e Fale Alea he mahina ko ‘Okatopa 2016.

‘E kau kiai mo e ngaahi lao fakaangaanga pehe ki he lipooti mei he Pule’anga ki he tu’unga ‘oku ‘i ai ‘a e Va’a Fakahoko ngaue (Executive) ‘o fakatatau ki he fakamatala mei he Fale Alea ‘o Tonga.

‘Oku mahino foki mei he ongoongo ‘a e Fale Alea ‘o Tonga ‘oku kau ‘a e Sipoti 2019 he kaveinga mahu’inga he ‘asenita ‘a e Fale Alea ‘a ia ‘oku fekau’aki tonu ‘eni moe teuteu ‘a e Pule’anga mo e fonua ki he Sipoti ko’eni.

‘I he taimi tatau ‘oku ‘i ai foki mo e fakamatala falala’anga ‘e kau atu he kamata ko’eni ‘a e Fale Alea ‘a hono fakahu atu ‘a e fokotu’u ke fakahoko ha Fili Fakaha loto ke tukuhifo ‘a e Palemia (Vote of No Confidence).

‘Oku ‘ikai foki koha kaveinga fo’ou ‘eni ia he na’e toutou ‘ohake ‘e he ngaahi mitia ‘i he faka’osinga ‘o e ta’u 2016 pea ‘oku mahino pe foki na’e fakahoko ‘a e ngaue kiai ‘a e fa’ahi fakaanga ka ‘oku mahino mai ‘e kau atu moia ‘i hono tipeiti’i he ta’u ni 2017.

'Oku mahino foki ko hono fakaava 'eni 'a e Fale Alea pea tapuni faka'ofisiale 'a e ta'u 2016/17 kae toki fakaava ai pe he ta'u ni 'a e faha'i ta'u Fale Alea 2017/18.