Mahu’inga ange mo’ui he pa’anga: Palesiteni SUTT Dr. Ahio ^Featured

Neongo koe folau ‘eni na’e fehangahangi mo e palopalema ta’e’amanekina pea na’e hoko ai ‘a e pekia ‘e 3 mo e ngaahi lavelavea lalahi pea ‘oku kei ‘i Nu’usila ai ‘a e toko 11 ‘o e kau folau ni fakakakato honau faito’o mei fakatu’utamaki na’e hoko.

Kuo mahino mai foki he foki mai ko’eni ‘a e kau folau ‘a e mo’oni ‘o e ngaahi fehu’i na’e ‘ohake ‘e he ngaahi mitia pea kuo ‘omai mo e ngaahi fakamo’oni faka saikolosia mei he kau mataotao he tafa’aki ki he ‘atamai ‘o fakamahino ‘e ‘i ai ‘a e useia ‘i he fanau ko’eni makatu’unga ‘i he’enau taukei mo ‘enau sio totonu mo kaunga tonu ki he fakatu’utamaki na’e hoko.

Na’e talitali foki ‘a e kau folau ki he Senita Dr. Molitoni pea na’e me’a ai ‘a e Palesiteni ‘o e Siasi Faifekau Dr. ‘Ahio, Sekelitali Lahi Faifekau Dr. Tevita Koloa’ia Havea, Tokoni Palesiteni Ako Faifekau Dr. Teviat Hala Palefau ke talitali mo fakahoko ha talatalaifale ki he kau folau.

Na’e fakahoko foki ha me’a ‘a e kau taki ko’eni ‘o e Siasi ki he kau folau ni pea na’e mahino mai foki mei heni na’e ‘i ai ‘a e ‘amanaki ‘a e kau taki ni ke foki mai pe ‘a e folau hili ‘a e fakatu’utamaki na’e hoko.

‘I he me’a ‘a e Palesiteni ‘o e Siasi Fafekau Dr. ‘Ahio na’a ne fakamamafa’i ai neongo ‘oku mahu’inga ‘a e pa’anga ki he fiema’u fakamatelia ‘a e Ako’anga ka koe taimi ‘oku hoko ai ha fakatamaki pehe ni pea ’oku mahu’inga ange leva ‘a e mo’ui ia.

Na’e ‘i ai foki moe faka’amu ‘a e Tokoni Palemia ia Hon. Siaosi Sovaleni ‘i hano faka’eke’eki ia ‘e he ngaahi kautaha mitia ‘i he’ene ‘a’ahi atu ki he fanau ni hili ‘a e fakatamaki kenau foki mai leva ki Tonga ni ka na’e ‘ikai hoko ‘eni makatu’unga he faitu’utu’u ni ‘a e Kolisi Tutuku ‘a e ako’anga ni ‘i Nu’usila pehe ki he kau taki ‘i he folau.

Kuo ha mai foki ‘a e kau mataotao ‘i he saikolosia pe koe ‘atamai ‘o kau ai ‘a Dr. Mapa Puloka pehe kia Alo Foliaki ‘i Nu’usila ‘o fakamahino ‘e ‘i ai ‘a e uesia ‘i he fanau ko’eni makatu’unga ‘i he ngahi a’usia na’a nau fetualaki mo ia ‘i he hoko ‘a e fakatu’utamaki ko’eni.

Na’e hoha’a foki ‘a Alo Foliaki ki he ‘ikai ke tokangaekina pe fakahoko ha ngaahi fale’i (counselling) faka’atamai moha ngaahi talatalaifale ke malava ke tokonia ‘a e fanau mo kinautolu na’e hoko kiai ‘a e fakatu’utamaki ‘o mahu’inga ange ia he hoko atu ‘a feinga pa’anga.

‘I ha fakamatala ‘a Dr. Mapa Puloka ki he Letio Tonga na’a ne fakamahino ai ‘e ‘ikai fuoloa mei heni kuo ‘asi mai ‘a e ola ‘o e fakatu’utamaki ko’eni he tu’unga faka’atamai ‘o e fanau he kuopau ke ‘i ai ‘a e uesia pea ‘oku hoko foki ‘eni fakamamani lahi ‘eni ‘o tautautefito kiate kinautolu na’e foki mei he tau ‘o kau kiai mo e kakai na’e kaungatonu mo sio ‘i he ngaahi fakatu’utamaki lalahi ‘oku mole ai ‘a e ngaahi mo’ui.

Na’e fehu’ia foki ‘e he ngaahi mitia ‘a e faitu’utu’uni ko’eni ke hoko atu ‘a e feinga pa’anga pea kau atu kiai mo hono fehu’ia pe ‘oku ‘i fe ‘a e puleako ka kuo fakamahino mei he kau taki ‘o e Siasi na’e ‘i ai ‘a e ‘amanaki mo e faka’amu ia kenau foki mai ki Tonga ni hili pe ‘a e fakatu’utamaki na’e hoko ‘o hange koe me’a ‘a e Palesiteni ‘oku mahu’inga ange ‘a e mo’ui ‘a e fanau he pa’anga.

Kuo tuku mai foki he mitia fakasosiale ‘a e ngaahi fakamatala fakamo’oni kuo kamata ke ‘asi ‘a e ngaahi faka’ilonga ‘oku fakamatala ki ai ‘a e ongo mataotao ‘i he saikolosia ki he ni’ihi ‘o e fanau na’e kau atu ki he fakatu’utamaki ko’eni kae tautautefito ki he fanau ‘oku nau ta’u iiki ange.

‘I he taimi tatau kuio ma’u ha fakamatala mei he taha ‘o e kau matu’a tauhi fanau mei Vava’u ‘oku tatau moe ha enau fiefia he foki mai ‘enau fanau pea ‘oku ‘i ai foki ‘i he taimi tatau mo e fiekaunga mamahi mo e ngaahi famili ‘o kinautolu na’e si’i pekia.