‘Oku ‘i fe nai ‘a e Puleako Kolisi Mailefihi Siu’ilikutapu? ^Featured

Tangata’eiki,

Kataki fakamolemole pe mu’a ka e ‘oatu ‘eku ki’i hoha’a ko’eni fekau’aki moe fetokehekehe’aki ‘i he folau feinga pa’anga ‘a e Kolisi Mailefihi Siu’ilikutapu. ‘Oku kei pulonga ‘a e Ako’anga ni ‘i he hoko ‘a e fakatu’utamaki koia ‘i Nu’usila pea fakaloloma koe hoko moe pekia ‘e tolu.

‘Oku mahino mai foki ‘oku loto ‘a e ni’ihi ke hoko atu pe feinga pa’anga ‘a e Kolisi Mailefihi mo Siu’ilikutapu ‘i Nu’usila pea loto ‘a e ni’ihi kenau foki he kuo tokotolu e kau pekia pea ke fakahoko hano faka’apa’apa’i kinautolu kuo to tau.

‘Oku ‘ikai keu tokanga pe koe fe ‘a e tafa’aki ‘e tu’u ‘enau fakakaukau ka ‘oku ou tokanga atu au pe koe fe ‘a e Puleako ‘o e Kolisi Faifekau Liuaki Fungalei ‘oku te’eki tu’otaha ke fai ha vakai kuo ‘asi kimu’a he koe taimi totonu ‘eni ke ‘asi ai ‘o fakamatala ki he kakai.

‘Oku hoko ‘a e fifili ni he ko Faifekau Mele Suipi Latu ‘a ia koe Palesiteni ‘o e Kolisi Tukutuku ‘a e Ako’anga ni ‘i Nu’usila ‘oku ha mai ‘o fakamatala ki he kau Faiongoongo. ‘Oku kau kiai moe Puleako Maloloo ‘o e Kolisi Faifekau Lopini Filise ‘i hono tuku mai ‘ene vakai ki he me’a ‘oku totonu ke fakahoko ‘e he kau folau ni.

'Oku toe ma'uhala foki 'e he ngaahi Kautaha Ongoongo 'a e puleako 'o kau ai 'enau pehe koe pekia Leotisia Malakai koia 'oku puleako.

‘Oku fehu’ia leva he taimi koia pe koe fe’ia ‘a e Puleako ‘oku te’eki tu’otaha ‘i he ma’u ‘a e motu’a ni ke ‘i ai ha’ane fakamatala talu mei he hoko ‘a e fakatu’utamaki ‘o a’u mai ki he fekihiaki ko’eni pe ‘e hoko atu ‘a e feinga pa’anga.

‘Oku mahu’inga foki he koe taimi ‘oku hoko ai ‘a e ngaahi me’a lalahi pehe ni pea hoko ai moe pekia pea ‘oku totonu ke ‘asi ‘a e kau taki ki mu’a. Fakamolemole’i ange e motu’a ni kapau kuo tuku mai ha fakamatala ‘a e Puleako ka koe anga pe’eni ‘eku ma’u vaivai.

‘Oku ou faka’apa’apa lahi heni ki he Puleako ka koe fifili 'eni pea ‘oku ou tui ‘oku fu’u mahu’inga fau ke ‘ilo ‘a e kakai ‘oe fonua ki he fakakaukau ‘a e taki ni he kuo ongona he mitia moe ngalu’ea ni ‘a e fakatamaki na’e hoko mo e tu’unga ‘oku ‘i ai ‘a e folau pea koe ha 'e hoko atu.

Faka’apa’apa Atu,

Fifili
Vava’u