Kau atu 'a Tonga ki he Fakataha Lahi Faka-Minisita hono 13 'a e WTO
26 Fepueli, 2024. 'Oku taki atu 'ehe 'Eiki Minisitā Fefakatau'aki mo e Langa Fakalakalaka Faka'ikonomika Hon. Dr. Viliami Uasike Latu 'a e kau folau 'a Tonga ke kau atu ki he Fakataha Faka-Minisitā hono 13 'a e Kautaha Fefakatau'aki 'a Mamani (WTO 13 Ministerial Conference) 'a ia 'oku fakahoko ki Abu Dhabi kolomu'a 'o United Arab Emirates (UAE) 'i he Kulifa Pesia.
'Oku kau atu ki he kau folau mei Tonga 'a e CEO 'a e Potungāue Fefakatau'aki mo e Langa Fakalakalaka Faka'ikonomika Distaquaine Tu'ihalamaka pehe ki he ongo 'ofisa ko 'Ikinasio Tautakitaki mo Fonongaola 'Anisi mei he Va'a Fefakatau'aki 'a e Potungāue Fefakatau'aki mo e Langa Fakalakalaka Faka'ikonomika.
'Oku kau atu foki mo e 'Amipasitoa 'a Tonga ki UAE Hon. 'Akau'ola pehe ki he Sekelitali 'Uluaki 'a e 'Ofisi 'Amipasitoa Tonga Sonata Tupou ki he timi 'a Tonga ki he fakataha ni.
Na'e huufi foki 'a e fakataha ko'eni he pongipongi 'o e 'aho ni Mōnite 26 'o Fepueli pea 'e lele 'a e fakataha 'o toki ngata mei he 'aho Tu'apulelulu 29 'a ia koe uike ni ia.
Na'e kamata pe foki he 'aho Tokonaki 24 'a e ngaahi fakataha 'a e ngaahi fonua 'o e Pasifiki pea hoko ki he fakataha mo e ngaahi fonua mei he Kalipiane, 'Afilika mo e Pasifiki (ACP) 'i he 'aho 25 'o toki fakahoko hono huufi 'a e fakataha he 'aho ni.
'Oku mahino foki 'a e tu'u fakataha 'a e ngaahi fonua 'o e Pasifiki he 'oku tatau 'enau ngaahi fiema'u ki he fefakatau'aki 'o tatau 'i he ngoue mo e toutai pehe ki he ngaahi kaveinga fekau'aki mo e fakalakalaka 'a e ngaahi fonua langalanga hake mo iiki ange 'o kau ai 'a e kaveinga ki he fefakatau'aki faka'ilekitulonika (E-Commerce).
'Oku kau 'a e kaveinga fekau'aki mo e toutai he kaveinga 'oku tokanga lahi kiai 'a e Pasifiki tautau tefito ki he lahi hono toutai'i 'e he ngaahi fonua lalahi 'o fu'u hulu 'a e ika mei he 'oseni 'o e Pasifiki pehe ki hono uesia 'o e ngaahi me'a mo'ui mei 'oseni pea 'oku toe fakapa'anga foki 'e he ngaahi fonua hau mo lalahi 'a e toutai 'a e ngaahi vaka toutai ma'a kinautolu he potu tahi Pasifiki.
'Oku hoha'a lahi 'a e Pasifiki ki he kaveinga 'o e toutai pea 'oku tui 'a e ngaahi fonua 'o e Pasifiki 'oku mo'oni pe 'a e pa'anga ka kuopau ke fakapotopoto'i mo malu'i 'a e ngaahi me'a mo'ui mei 'oseni.
'Oku taki 'a e timi mei he Pasifiki 'e he Tokoni Palēmia mo Minisitā Fefakatau'aki 'a Fisi Hon. Manoa Kamikamica pehe ki he Minisitā Fefakatau'aki 'a Ha'amoa, Vanuatu pehe ki Papua New Guinea.
'Oku fakafofonga mai leva 'a e ngaahi fonua kehe 'e honau kau Fakafofonga pehe ki he'enau kau 'Amipasitoa 'oku nau peisi 'i Geneva.
