“Talitali lelei ‘e he kainga Tonga ‘i Siapani ‘a e ‘Eiki Palēmia, Hon. Samuela ‘Akilisi Pohiva” Featured
To’ohema ki Mata’u he ‘otu mu’a: Katoni Otukolo, Alisi Kawashimura, Setsuko Takeifanga, Faifekau Vanisi Takeifanga, ‘Eiki Palemia, Hon. Samuela ‘Akilisi Pohiva, Sinali Latu, Uatesoni Namoa, Lasini Takei, La’a Hopo He Lotu Takai Palei Silia Holani, Leveni Aho, ‘Amelia Latu, Lani Ahokava, Telusila Ishikawa, Sekelitali ki Muli. Va’inga Tone, Pelinita Yamaga, Feleti Ma’u, Filipe Finau, Siaosi Tuitupou, Sekelitali Pule & Sekelitali ki he Kapineti, Dr Palenitina Langa’oi, mo ‘Amipasitoa Tania Tupou. Ta ‘a e ‘Ofisi Faka’amipasitoa ‘o Tonga ‘i Siapani
Nuku'alofa, 22 Me, 2015. Na’e talitali lelei ‘e he kainga Tonga nofo Siapani, ‘a e ‘Eiki Palēmia, Hon. Samuela ‘Akilisi Pohiva mo ‘ene kau muimui folau ‘i he Hotele New Otani ‘i he efiafi Pulelulu ko hono 20 ‘o Me 2015.
Ko e me’a ‘a’ahi eni ‘a e ‘Eiki Palemia ke ne kau atu ki he fakataha hono fitu ‘a e kau Taki ‘o e Ngaahi Fonua Pasifiki (PALM7-Pacific Island Leaders Meeting) ‘oku fakahoko ‘i Siapani.
Na’e fakahoko ‘e he ‘Amipasitoa ‘o Tonga ki Siapani, HE.Tania Tupou ‘a e lea talitali pea hoko atu ki he lotu na’e tataki ‘e Faifekau Vanisi Takeifanga, mo e setuata, Uatesoni Namoa pehe kia Feleti Ma’u. Na’e hoko atu ki hono fakafe’iloaki ‘o e kainga Tonga na’a nau lavaange ki he fakataha ‘e he Tokoni Palesiteni ‘o e Komiuniti ‘a e Kainga Tonga, Sinali Latu kae’uma’ā ‘a e Sekelitali ‘o e Kominiuti Tonga, La’a Hopo He Lotu (Takai Pale).
Na’e me’a ‘a e ‘Eiki Palemia ‘o fakamalo’ia’i ‘a e si’i kainga Tonga ne nau lavaange ki he fakataha. ‘Oku fakafuofua ki he toko teau ‘a e kainga Tonga ‘oku nau nofo ‘i Siapani ‘ikai ngata pe ‘i Tokiō ka ‘i he tapa kehekehe ‘o Siapani foki, ‘i he ngaahi faingamalie sipoti tautefito ki he ‘akapulu.
Na’e kau fakataha mai foki mei he kominiuini ‘a e fanau ‘akapulu Tonga, ko Katoni ‘Otukolo mo Filipe Finau mei he timi ‘akapulu Kubota, ‘o kau ai ‘a Siaosi Tu’itupou, mo e fanauako Tonga ‘oku lolotonga ‘i Siapani. Pea na’e kau atu foki mo e kau Tonga ma’uhoa mo nofo ‘i Siapani he ta’u ‘e meimei fangofulu, ‘a ia ko Lasini Takei, Alisi Kawashimura, Telusila Ishikawa mo Pelenita Yamaga.
Ne ‘i he fakataha ni foki ‘a e kau muimuifolau ki he ‘Eiki Palemia Dr Palenitina Langa’oi, ko e Sekeleitali Pule mo e Sekelitali ki he Kapineti, Va’inga Tone, ko e Sekelitali ki he Potungaue ki Muli mo Fefakatau’aki pehe kia Leveni ‘Aho, Talekita ki he Ngaahi Fakatamaki Fakaenatula.
NGATA’ANGA
Tuku atu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.
