Fakamo'oni'i foaki 'o e St George Palace ki he Pule’anga Tonga Featured
Saint George Palace 'i Panga si'i. Faitaa 'a e Matangitonga
25 Sune, 2017. Kuo kakato 'a e ngāue ki he St George Palace 'i Pangai Si'i 'a ia na'e maau mālie 'a e ngāue ko'eni 'i he 'aho 17 'o e māhina ko Mē 2017.
'Oku mahino foki 'i he taimi tatau 'oku te'eki fakapapau'i ha taimi ke huufi kiai.
Nae fakahoko foki 'a hono foaki faka-'ofisiale (official handover) 'o e koloa ko'eni 'e he 'Amipasitoa fo'ou 'a e Pule'anga Siaina ki Tonga Mr. Wang Baodong ki he Tokoni Palēmia Hon. Siaosi Sovaleni 'i he 'aho Tu'apulelulu 22 'o Sune 'a ia koe uike ia kuo 'osi.
Ko e poloseki ko'eni foki na'e fe'unga hono mahu'inga mo e pa'anga Tonga 'e $28 Miliona pea koe lahi 'o e 'elia 'o e 'ofisi ko'eni ko e mita sikuea 'e 5745 pea 'oku 'i ai 'a e 'Ofisi 'o e Palēmia, Potungāue Ki Muli, Potungāue Pa'anga mo e Palani Fakafonua pea mo e ngaahi 'ofisi kehe pe 'o e Pule'anga.
Kuo lava foki mo hono sivi 'e he ngaahi kupu fekau'aki ki he malu mo taau 'a e fale ni pea kuo fakapapau'i 'ene tu'unga taau mo malu ke ngāue'aki 'e he Pule'anga.
Na'e fakahoko foki 'a e ngāue ko'eni 'ehe Kautaha mei SIaina koe Shanghai Construction Group Company Limited.
