'Aho Maloloo Faka Pule'anga Monite 2 Ma'asi 2015 Fakalangilangi'i Fakanofo Katinali 'Eminani Katinali Soane Patita Mafi Featured
Nuku'alofa. 25 Fepueli, 2015.
Kuo tali lelei 'e he Kapineti 'A 'Ene 'Afio ke hoko 'a e 'aho Monite 2 'o Ma'asi 2015 koe 'aho malolooo faka Pule'anga pea fakahoko kakato ai 'a e ouau anga maheni 'o ha 'aho maloloo faka Pule'anga. 'Oku makatu'unga 'eni 'i he fiefia moe hounga'ia 'a e fonua 'i hono fakanofo 'o e tangata'i fonua Tonga 'i he fungavaka 'o e Siasi Katolika Loma koe fuofua Katinali ma'ae fonua.
Ko hono fakanofo ko'eni 'o 'Eminani Katinali Soane Patita Katinali Mafi 'oku faka hisitolia ki Tonga kotoa pea 'ikai ngata 'i he mala'e 'o e lotu ka 'oku mahino ai koe fonua Kalisitiane 'a Tonga ni. 'Ikai ngata ai ka 'oku 'ave ai 'a e hingoa 'o e fonua 'i mamani pea 'oku laukau ai 'a e Tonga kotoa.
Na'e fakaha mei he 'Ofisi 'o e Palemia 'oku tu'otaha pe hono fakahoko 'o e 'aho maloloo ni 'a ia koe ta'u ni pe pea 'oku fakatokanga'i 'e he Pule'anga 'a e lava me'a 'a hono kakai. Kuo tu'uta foki 'a 'Eminani Katinali Soane Patita Katinali Mafi 'i Tonga ni hili ha'ane me'a folau atu ki hono fakanofo.
'Oku fakahoko foki 'i he efiafi ni 'a e Misa 'a e Katinali 'i he Falelotu Malia Tupu 'i Makulata 'i Ma'ufanga pea 'oku me'a ai 'a e Tama Pilinisi Kalauni pehe ki he Kuini Fehuhu.
