Longolongo Kātoanga ‘a e ‘Otu Felenite ^Featured

‘Oku hā mahino mai foki kuo kamata ‘a hono fakaa’u ‘o e ngaahi hala faka Ha’a pehē ki he Hala fakataautaha ‘o e Hou’eiki Nōpele, Kau Matāpule Ma’u Tofi’a, Kau Tauhifonua, Ngaahi Siasi, Ngaahi Kautaha,  pehē ki he ngaahi fetu’utaki faka tukufakaholo anga maheni.

Ko e taimi foki ‘eni ‘oku mālie ai ‘a e anga ‘etau sio ki he fa’unga ‘o ‘etau nofo mo e malu mo hao ‘a e ngaahi ngaahi tukituki tupu’a ‘o e fonua mo e tufunga fonua ne fai ‘e Lo’au mei ono’aho. ‘Ikai ngata ai ka ‘oku talamai mahino ‘i he fakaofi mai ‘a e ngaahi ‘aho pehe ni ‘oku kei Tonga pe ‘a Tonga neongo ‘oku ‘i ai ‘a e ngaahi peau tā ‘o e liliu ‘oku ‘ikai lava ‘o ta’ofi ka ‘oku mahu’inga heni ‘a ‘etau monu’ia ‘oku kei ‘i ai hotau tala (identity) pea ‘oku lava ke makehe ai ‘a e Piliote mei he toenga ‘o e Pasifiki mo māmāni foki.

‘Oku ‘ikai foki ke puli ‘eni ia ‘i he kakai 'o e fonua pea ‘oku feongo’aki pe foki ‘a e ngaahi ako faiva faka kolo, ngaahi koka’anga mo e lalanga fakafonua, ngaahi polokalama teuteu ‘a e Pule’anga pea ‘ikai fai ha lau ia ki he ngaahi ako, siasi pehe ki he ngaahi ha’a mo e kau tautonu ‘oku nau fakanimamaka 'i he teuteu lahi ki he ‘aho 'o e Tama.

Kuo kamata foki ke tautuku mai mo e kau folau mei Tokelau mama’o mei Vava’u, Ha’apai mo e Ongo Niua ke kau mai ki hono katoanag’i hono fakahoko ki he Taloni ‘a e Tu’i ‘oku nau polepole mo laukau’aki.

‘I he tu’unga ko’eni ‘oku ‘i ai ‘a e ‘amanaki lelei kiha kātoanga māfana mo fiefia pea ‘e tokoni lahi ke fakatahataha’i ‘a e fonua mo toe fakafo’ou ‘enau ongo mo ‘enau ‘ofa ki honau Tu’i kae pehe ki he ngaahi tala tkufakahoko tupu’a ‘o e fonua.

‘Oku toe mahu’inga foki ‘a e kātoanga ko’eni he koe taimi ‘eni ‘oku fakahoko ai ‘a e ngaahi ouau tupu’a ‘a ia ‘oku toki fakahoko pe ‘i ha ‘aho lahi hangē koe taumafa kava mo hono ouau kakato, tau’a’alo ‘a e ngaahi kolo angamaheni, ngaahi faiva faka Tonga, ngaahi ouau ‘o e Hilifaki Kalauni mo e ngaahi ouau ‘oku tātātaha ke hoko ‘i he fonua.

Ko e faingamalie ‘eni ki he kau ako ‘o e fonua pehe ki he kakai kenau mamata mo taukei’i tonu ‘a e ngaahi tala tukufakaholo hotau fonua ni pea ‘e tokoni ki he’enau ako mo e fakatotolo ka koe me’a tepū ‘a ‘enau ‘ilo tonu mo tali ‘a e ngaahi momona ‘o ‘etau sivilaise ‘a ia ‘oku lahi pe ‘a e fanongo talanoa mo e ako kiai.

‘Oku toe hoko foki ‘a e mateuteu ko’eni ‘a e fonua kene tohoaki’i mai ha kakai tokolahi ‘o kau ai ‘a e kau folau ‘eve’eva tenau folau mai ke matā ‘a e kātoanga ni mo tu’uaki atu foki 'a e fonua ki Tu’apule’anga. ‘Oku ‘ave ai pe foki heni ‘a e ngaahi ongoongo lelei ‘o e fonua pea tala ai pe ko Tonga koe Pule’anga Tu’i pe ia ‘e taha ‘oku kei tu’uloa mai he Tahi Saute.

'Oku 'i ai 'a e fakatauange mo e talamonū 'e tokalingolingo 'a e melino mo e fiefia 'i he'etau kātonga fakafonua 'oku tau 'amanaki lelei kiai.