Fēfē Teuteu ‘Ikale Tahi Ki he Ipu ‘A Mamani? ^Featured

‘Oku fakafuofua foki ke fakahoko ‘a e fe’auhi ko’eni ki he māhina ko Sepitema ki ‘Ingilani pea kuo taimi ke tafunaki atu ‘a e māfana mo teke ‘a e poupou ki he’etau timi ‘Ikale Tahi.

‘Oku te’eki mangalo atu ‘a e Ipu ‘a Mamani ‘o e ta’u 2011 mo e fā’ūtaha ‘a e fonua ‘o poupou ki he ‘Ikale Tahi pea ‘oku fai  e manatu melie ki ai mo e ‘amanaki ‘e toe malava ‘a e fonua ke fakahoko ha poupou tatau he ‘e tokoni lahi ‘eni ki he’etau Poate mo e fānau va’inga. ‘Oku mahino foki ne fu’u poupoua ‘a e Ipu ‘a Mamani 2011 ko hono fakahoko mai ki Nu’usila 'oku tokolahi ai hotau kakai pea ofi foki ki Tonga ni ka ‘oku ‘ikai ‘uhinga ‘eni ke tuku ai ‘etau poupou ha me’a tetau ala malava.

Na’e fakahoko foki hano faka’eke’eke ‘o e Sea ‘o e Poate ‘Akapulu ‘a Tonga ‘Epeli Taione ‘e he Letiō Nu’usila ‘i he ‘aho Tusite 26 ‘o Mē ni pē pea na’a ne fakahā‘a ‘ene fakame’apango’ia ‘i hono puketu’u ‘e he ongo fonua kaunga’api Nu’usila mo ‘Aositelelia ‘a e kau va’inga lelei taha ‘a e Pasifiki ‘o kau ai ‘etau fānau va’inga.

‘Oku ‘uhinga heni ‘a Taione ki hono puke ko’eni kinautolu lolotonga ia ‘oku ‘ikai ke fu’u lahi honau faingāmalie ki he timi ‘a e All Blacks mo e Wallabies pea ‘e hili pe tesi ‘e 1 pe toe lahi si’i ange ai pea tukuange kinautolu. ‘Oku mole leva heni honau faingamalie ke va’inga ma’a honau fonua tupu’anga pea ‘oku ‘ikai ke ‘uhinga pehē ‘a e taumu’a fe’auhi Ipu ‘a Mamani.

Na'e hoko atu foki 'a Taione 'o fakahā 'oku 'i ai pe 'a e ngaahi fe'auhi 'oku kau atu ki ai 'a e 'Ikale Tahi hangē ko e fe'auhi ki he Ipu 'a e Pasifiki pehē ki he va'inga faofao 'a ia 'oku te'eki ke fakapapau'i 'a e ngaahi timi koia kimu'a pea toki fakahoko 'a e folau ki 'Ingilani.

Kaikehe ‘oku mahu’inga foki ‘i he fo’i taimi ofi atu ko’eni he ‘oku toe pe māhina ‘e tolu neongo ‘oku lahilahi ange ‘etau fanongo ki he ngaahi fetōkehekehe’aki he poate ‘akapulu mo e ngaahi laaulea ‘oku ‘ikai fu’u poupou ki he’etau ‘akapulu ke tau tu’u fakataha ‘o poupou he koe ivi lahi ia ki he’etau fānau va’inga.

‘Oku ‘ikai puli ‘a e malava ‘e he faiva ni ke fakatahataha’i ‘a e kakai ‘o e fonua mei he tapa kotoa ‘o e mo’ui ‘o hangē koia na’a tau sio mata ai ‘i he ta’u 2011. ‘Oku ‘ikai koha taimi ‘eni ke toe fai ai ha fetuhuaki ka ketau tu’u ‘o poupou ki he teuteu ‘oku fakahoko mo e ‘amanaki ‘e toe fakahoko ‘e he ‘Ikale Tahi ha me’a fakafiefia ‘o hange koia na’a tau a’usia ‘i he ta’u 2007 mo e 2011.

‘Oku ‘i ai ‘a e tukuhua ‘a e kauleka he taimi mapu ‘oku pehe; “muimui pe ‘a kai mapu” ‘a ia ‘oku ‘uhinga ia ‘oku faka’aki’akimui pē ka tene fai e me’a lahi. ‘Oku tau ‘amanaki ‘oku toka pē ‘etau fu’u ‘Ikale ‘o teuteu kene kapapuna ‘i Polata’ane pea kene toe ‘omi ha fiefia ki he fonua hangē koia na'a tau anga kiai.

Talamonū atu ki he Poate 'Akapulu 'a Tonga pehē ki he Timi ‘Ikale Tahi mo e ngaahi fokotu’utu’u kotoa ‘oku teuaki ki he Ipu ‘a Mamani 2015.