Ko e hā ngāue ‘a e Pule’anga ki he lahi hū ta'efakalao mai ‘o e me’atau? Featured
25 Siulai, 2019. Lolotonga ‘a e tofanga ‘a e fonua ‘i he faingata’a ko feinga ke tau’i ‘a e faito’o konatapu kuo toe fakalalahi 'a e hā mai mo hono ma’u ‘a e ngaahi me’atau kuo hū ‘ikai fakalao mai ki he fonua ni.
‘Oku mahino pe foki ‘oku ‘ikai ke fa’a mavahevahe ‘a e faito’o konatapu mo e me’atau he ‘oku ngāue’aki foki ‘e he ni’ihi ‘oku nau fetuku holo ‘a e faito’o konatapu ‘a e me’atau ke malu’i aki kinautolu.
‘I he taimi tatau ‘oku hū ta’efakalao mai ‘a e ngaahi me’atau ko e taumu’a ke fakatau atu ki he ni’ihi ko’eni he ‘oku mahino pea ‘ikai toe veiveiua ‘a e hoko ‘a e faito’o konatapu koe palopalema vivili taha ia ‘i he fonua ni.
Ko e me’a ‘oku hoko 'i he ngaahi ‘aho ni ‘i he fonua ‘a e mahino mai ‘oku lahi ‘a hono ma’u ‘o e ngaahi me’atau ‘oku hū ta’e fakalao mai ki he fonua pea ‘oku lahi leva ‘a e ngaahi fehu’i ‘oku ‘ikai mahino hano tali ‘a ia kuo taimi ke ‘asi mai kimu’a ‘a e kau ma’u mafai heni he ‘oku hoha’a ‘a e kakai ‘o e fonua pea ‘oku ne langa heni ha ‘ātakai ‘oku tailiili ‘a e nofo ‘a e kakai.
‘Oku lahi mo hono ‘ohake ‘e he mīia fakasoasiale ‘a e ngaahi ongoongo tokua ‘oku ‘i ai ‘a e liukava ‘oku palani ke fakahoko ‘i he fonua ni pea neongo ‘oku ‘ikai ke fakapapau’i ‘a e ongoongo mo e fetalanoa’aki ko’eni ‘i he mītia faka-sosiale ka ‘oku ‘i ai ‘a e lea ‘oku pehe; “ko e feitu’u pe ‘oku ‘asi mei ai ha kohu ‘oku mahino ‘e ‘i ai e afi”
‘I he’ene pehe leva ‘oku ‘ikai totonu ke tukunoa’i ‘a e kaveinga ko’eni pea ‘oku ‘i ai ‘a e tui ‘oku totonu ke ‘asi mai ‘a e kau ma’u mafai ‘o fakamahino mai ki he kakai ‘a e tu’unga malu ‘oku ‘i ai ‘a e fonua pea ke tatala ‘a e tala’a mei he kakai ‘o e fonua.
‘Oku ki’i fuofuoloa mai ‘a hono toutou ‘ohake ‘o e kaveinga ko’eni pea ‘oku ‘i ai ‘a e tui ‘oku mahu’inga ke tā pe lango kei mama’o pea ‘oku mahu’inga ‘a e fetokoni’aki ‘a e kakai ‘o e fonua ‘o ‘ikai fakafa’afa’ahi kae ngāue fakataha ke tau’i mo e palopalema ko’eni telia ‘a e malu ‘a e fonua.
Ko e fatongia mahu'inga foki 'eni ki he kau fa'u lao kenau fakakaukau'i ha ngaahi tautea 'oku mamafa mo malohi tene malava kene ta'ota'ofi 'a e kakai mo e ni'ihi 'oku nau loto lahi ke fakahoko 'a e fa'ahinga ngaue pango pehe ni.
Kaikehe ko e poini mahu'inga 'oku fakamamafa'i ia heni koe fiema'u ke 'omai 'a e le'o 'o e kau ma'u mafai kenau fakahoko mai ki he fonua pe koe hā koā 'a e me'a 'oku hoko fekau'aki mo e kaveinga ni pea 'oua 'e to'o ma'ama'a 'eni he koe tahi 'oku hu'a mai.
