Talamonū ki ha ta’u 2019 monū’ia mo ola foki Featured
‘Oku tau fakafeta’i ki he ‘Otua ‘i he’ene taulamahao ‘o tau toe a’usia ai ‘a e ta’u 2019 koe ta’u fo’ou mo fakakoloa ki Tonga.
Kuo fai e situ’a ki he ta’u 2018 pea neongo na’e ‘i ai hono ngaahi pole ‘i he tapa kotoa ‘o e mo’ui pea na’e ‘i ai mo e kau tō tau ‘i he fononga’anga ka ‘oku mahino ‘a e ‘ikai ke liliu pea tu’uma’u ‘a e ‘ofa ‘a e ‘Otua ki Tonga mo hono kakai.
Ko e halafononga ‘o e mo’ui ‘oku tau fekuki mo e ngaahi pole kehekehe ‘o e mo’ui pea fihi mo hono ngaahi faingata’a ka ‘oku ‘ikai totonu ke tau loto si’i ke talia ‘a e ngaahi ‘ahi’ahi ‘o e fononga’anga pea ‘oku fakanatula ke fou ‘a e tangata kotoa ‘i he halafononga tatau.
‘Oku ‘i ai ‘a e ngaahi fakahinohino fakalaumalie ‘oku fatongia’aki ‘e he kau Taula’eiki mo Ha’a Lotu pea ‘oku mahino pe foki ‘a e ngaahi talatalaifale faka tukufakaholo mo fakafonua tukukehe ange ‘a ‘api mo hono faka’olunga ‘a e fānau ‘i he kaliloa pea ‘oku mahino pe foki mo e tu’utu’uni ‘a e lao.
‘I he’ene pehe leva ‘oku nau hoko koe ngaahi poutuliki ‘i hono pukepuke ‘a Tonga ke hoko koe fonua malu pea toki fakamaama ‘e he ako ‘a e fonua ke maama mo mahino ‘a ‘enau faka’uhinga ‘a e ngaahi me’a ‘i honau ‘atakai.
Neongo ‘oku tau kehekehe ‘i he tui mo e fakakaukau pea kehe mo ‘etau faka’uhinga ki he ngaahi me’a ‘oku hoko he fonua ka ‘e kei tu’u ma’u pe ‘a e lotu pea ‘e kei mo’oni pe ‘a e mo’oni pea ‘e kei ma’olunga pe ‘a e pule ‘a e lao.
‘Oku mahu’inga ketau langa ‘i he’etau kehekehe pea langa ‘i he’etau tatau pea ke hoko ai pe ‘a Tonga koe fonua ‘oku kei mu’omu’a ‘a Sihova pea malu ai mo ‘etau nofo ‘o hangē koe Tonga ‘oku tau faka’anaua ma’u pe kiai.
Ko e me’a kotoa ‘oku liliu ka koe me’a ‘oku lelei taha mahu’inga mo tolonga ‘i he mo’ui ‘oku liliu māmālie pea koe mo’oni ia ‘oku ta’eue’ia mo tolonga.
‘Oku tau ‘amanaki te tau ma’u ha ta’u 2019 ‘oku fonu he kelesi mo e tapuaki pea ke ola foki ‘a ‘etau ngaahi ngāue mo e faka’amu ‘oku fakamohe mei ‘ulu ‘i he fonua, siasi, fāmili mo e tokotaha taautaha kotoa ‘i Tonga.
‘Oku ‘oatu fakataha ia mo e talamōnū ki he Hau ‘o e fonua Tama ko Tupou VI mo e Fale ‘o Ha’a Moheofo, Hou’eiki ‘o e fonua, Ha’a Matāpule, Palēmia mo e Hou’eiki Minisitā ‘o e Kapineti, Sea ‘o e Fale Alea mo e Hou’eiki Memipa, Ha’a Takilotu mo e kakai ‘o e fonua ‘ofa ke tau ma’u ha ta’u 2019 monū’ia mo ola foki.
