Vilitaki e Palēmia ke ‘oua ‘e fakahoko e Sipoti 2019: Laumalie nai 'eni 'o e Fakaaoao? ^Featured

‘Oku fakaloloma ki he tokolahi ‘o e fonua ‘a e ‘initaviu na’e fakahoko ‘e Laumanu Petelō mo e Palēmia ‘Akilisi Pohiva fekau’aki mo e sipoti Pasifiki 2019 ‘a ia ‘oku ‘amanaki ke fakahoko mai ki Tonga ni.

Na’e mahino lelei mei he polokalama ko’eni ‘a e ‘ikai loto ‘a e Palēmia ke fakahoko mai ‘a e Sipoti ki Tonga ni. ‘Oku ne tukuaki’i ‘a e Pule’anga ‘o Tu’ivakanō ki hono feinga’i ke fakahoko mai ‘a e sipoti ki Tonga ni mo e ‘ikai malava ‘enau ngaahi vīsone ngāue tokua koe ngāue ‘a e teuteu ki he sipoti.

‘I he fakamatala ‘a e Palēmia na’e hū mai ‘a e Pule’anga ko’eni mo e taumu’a ngāue ke fakahoko ka ‘oku fakafe’atungia’i ‘e he sipoti ia ‘a e ngaahi palani ngāue na’a nau hūmai ke fakahoko. ‘Oku ‘uhinga tokua he koe konga ‘o e koloa ‘a e fonua ‘oku tuku ia ki he sipoti.

‘Oku malie ‘eni he ‘oku mahino mai foki na’e hū mai pe ‘a e Pule’anga ‘o ‘Akilisi ‘o muimui ‘i he fokotu’utu’u ‘a e Pule’anga motu’a ‘i he patiseti mo e palani ngāue ‘a ia ‘oku kei hokohoko lelei mai pe ‘o a’u ki he ‘aho ni. ‘Oku te’eki ke ho’ata mai ha vīsone fo’ou tukukehe ange ‘a e ngaahi palopalema kuo hoko ki he fonua ‘a ia kuo lau’ilo kiai ‘a e fonua.

‘Ikai ngata ai ka koe angamaheni pe foki ia ‘o e liliu Pule’anga kuo pau ke muimui he fokotu’utu’u lolotonga he ‘oku ‘i ai ‘a e Lao mo e tu’utu’uni ngāue na’a ne fakamafai’i ‘a e fokotu’utu’u kuo fakahoko ‘o fakatatau ki he palani ngāue fakata’u 5 ‘a e fonua mo 'ene ngaahi taumu'a pea kau tu kiai mo e sipoti.

‘Oku ho’ata mai mei he fakamatala ‘a e Palēmia ‘a e ‘ikai ke fale’i lelei ia he ‘oku tu’u lavea ngofua ‘ene fakamatala pea ‘oku ne faka’ikai’i ‘a e ngaahi fokotu’utu’u na’e fakahoko ‘o fakatatau ki he Lao Sipoti 2012.

Ko e me’a ‘oku mahino mei he ‘initaviu ko’eni ‘oku fakapolitikale’i ‘a e me’a kotoa pea ‘oku ho’ata mai pe foki ia koe fokotu’utu’u kotoa ‘a e ngaahi Pule’anga ki mu’a ‘oku ‘ikai ke lelei ia ‘o fakatatau ki he ngaahi ‘uhinga ‘oku fokotu’u mai ‘e he Palēmia.

‘Oku mahino foki ‘oku ‘i ai ‘a e ngaahi vā faka politikale mei he kuo hili pea ‘oku ho’ata mai pe foki ia he toutou ‘oho kuikui ‘a e Palēmia tapu ange mo ia ke kaunoa ‘i he ngaahi fokotu’utu’u kuo fakalao’i pea iku ki hono fakahalaki ‘e he Fakamaau’anga hangē koia na’a ne fakahoko kia Lord Sevele pea fakamahino ‘e he Tu’i Fakamaau Lahi ‘oku hala.

‘Oku mahino foki ki he tokolahi ‘a e founga ‘a e Palēmia mo ‘ene ngaahi fokotu’utu’u kuo fakahoko ki he fonua pea ‘oku mahino ‘a e hokohoko seini ‘a e ngaahi tu’utu’uni ‘oku ‘ikai ke fakapotopoto pea mole ai ‘a e koloa ‘a e fonua tukukehe ange ‘a hono maumau’i ‘o e lao mo e tu’utu’uni ngāue.

Ko e vilita’e’unua ko’eni ‘a e Palēmia ke tu’u hono loto ‘e hoko ai ‘a hono tukuange ‘o e faingamalie ko’eni ma’a e fonua mo e kaha’u ‘o e hako tupu ‘o e fonua ‘i he mala’e ‘o e sipoti.

Ko e ta’u ‘aki ‘eni ‘e tolu ‘a e teuteu pea kuo fakamole mo e pa’anga lahi kiai pea fo’u mo hono lao pea kuo poupou’i lahi ‘ehe Kosilio Sipoti ‘a e Pasifiki. Kuo mahino mo hono tokateu ‘a e ngaahi tokoni mei muli ka ko’eni kuo mahino mai mei he ‘initaviu ko’eni ‘a e loto ‘o e Palēmia tukukehe ange ‘a e hā ngavaivai ‘a e ngaahi makatu’unga ‘oku ne taukave’i.

Ko e kakai ‘oku nau fakahoko ‘a e ngaahi ngāue ni ‘oku nau poto mo taukei pea ‘oku nau ‘ilo ‘enau me’a ‘oku fai.

Kapau tetau fakatatau ki he ‘uhinga mo e tu’unga faka fakaukau ‘oku tuku mai ‘e he Palēmia ‘i he ‘initaviu na’a ne fakahoko mo Laumanu Petelō ‘i he Televisone Tonga pea ‘oku mahino mai leva ‘a e halafononga ‘oku hu’u atu kiai ‘a e fonua.