Lo'au, Tufunga Fonua mo e Tala 'o e Kava ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava’u Academy for Critical Inquiry and Applied Research [VACIAR] &
Tonga International Academy [TIA]

‘Alu ke lahi ke ma’u hao anga,
faikava ke lahi ke ma’u hao tala
Lea Tonga heliaki/Lea Tonga paloveepi

Mate ma’a Tonga
Kaveinga/moto ‘a e Kolisi Tonga

Ko e tonu mo’oni ‘o e ‘ofa ia
Ke hūmataniu ai ē pekia
Mei he ta’anga hiva kakala

Uisa! Kuo ifonoa ‘a e mate
He’ete mo’ui mamahi pehē
Mei he ta’anga hiva kakala

Na’a ma lave mo Helu Dr Siosaia Langitoto Helu he lea ‘Ingilisi, he ‘atikolo 10, ki he tohita’anga mo e tohitapu he’ene felāve’i mo e heliaki mo e fakatātā, ‘o hangē ko hono ngāue’aki lelei ‘e he ongo punake ‘iloa ko Ula-mo-Leka mo Kuini Sālote mo e faiako tālā ko Sīsū ko e ongo me’angāue hono liliu ‘a e ‘uhinga mei he felekeu ki he maau ke ma’u ‘a e potupotutatau mo e faka’ofo’ofa – ka te u talanoa heni, he ‘atikolo 11, ki hono tufunga ‘a e tala ‘o e kava ‘e Lo’au ko e tufungafonua ‘iloa he tala mu’a ‘o e fonua.

‘Oku taku he tala tupu’a ‘o Tonga ko Lo’au ‘a e fua tufungafonua, ‘o hangē ko ‘ene ‘iloa ko e vahe fonua ‘a Lo’au mo hono tufa ‘a e kau hou’eiki lalahi ko e kau tauhifonua fakataha mo e tala ‘o e kava mo hono oauau mo e hā fua. Na’e hoko ‘eni he kuonga ‘o e Tu’i Tonga 10 mo e 11 ko Momo mo hono ‘alo ko Tu’itātui, ‘a ia na’e kamata ke ngāngā’ehu ai ‘a e Pule’anga Hau ‘o e Tu’i Tonga, ‘o hoko ai hono fenāpasi ‘a e fepaki he fonua he funga ‘o e tatau mo e potupotutatau ke ma’u ‘a e faka’ofo’ofa mo e melino, ‘o liliu ‘a e fonua mei he tu’unga ‘o e felekeu ki he tūkunga ‘o e maau.

[Fakatokanga’i ange ‘oku kau ‘a e tufungafonua he tufunga – ‘a ia ko e tufunga tufungafonua – ka e kau ‘a e tauhifonua he faiva – ‘a ia ko e faiva tauhifonua – ‘o hangē pē ko ia na’a ku fa’a lave lahi ki ai he ngaahi mu’aki ‘atikolo. ‘Oku fua tufunga ‘e he tufungafonua ‘a e fonua pea toki tuku atu ki he tauhifonua ke ne faiva’aki hono tauhi – ‘a ia ko e faiva tauhifonua. ‘Oku pehē pē hono tufunga ‘e Lo’au ‘a e fonua – pea toki tuku ki he tauhifonua ke tauhi ko honau faiva – ‘o hangē ko ‘ene ‘asi he kupu ‘o e maa’imoa ta’anga lakalaka mālie ‘a Kuini Sālote ‘oku lea ‘o pehē: Tuku atu ē fonua mo e tala, Lauaki ē Motu’apuaka].

Na’e makatu’unga hono tufunga ‘e Lo’au ‘a e tala ‘o e kava he tuifio ‘a e faiva fakamamahi mo e faiva fakaoli, ‘a ia ko e fa’ahinga ia ‘e ua ‘o e ngaahi faiva tupu’a ‘a Tonga, ‘a ia ‘oku pehē hono tala he fananga mo e talatupu’a:

‘Oku lau na’e hifo atu ki moana/tahi ‘a e Tu’i Tonga ko Momo mo ‘ene kau toutaivaka he ‘aho ‘e taha mei Heketā ko e fai ‘enau ‘alo’atu ka e pehē na’e ‘ikai ke ola lelei ‘a e toutai – ‘o tupu ai ‘enau halifoea mo hālofia – pea nau foki leva ki ‘uta. Na’a nau tomu’a afe he ki’i motu ko ‘Eueiki – ‘a ia na’e hake atu leva ki ‘uta ‘ene kau toutai ko e hahalu ha’anau punusalulu ka e taula pē honau vaka ‘i taulanga mo papa pē ‘a Momo he fu’u kape ‘i fanga – ‘o lolotonga/lotolotonga ko ‘eni na’e tō ‘a e fu’u hongevale he motu.

Na’e ‘ikai ha kakai ‘i ‘Eueiki ka ko e ongo mātu’a pē ko Fevanga mo Fefafa mo ‘ena tama ko e ta’ahine ko Kava, ‘a ia na’e mo’ua he mahaki ko e kilia. Na’e feleleaki ‘a e ongo mātu’a mo na feleleaki holo he’ena ‘ilo kuo tu’uta ‘a e Tu’i Tonga mo ‘ene kau toutai ke kumi ha me’a ke fua’aki hona fatongia ki he Tu’i Tonga – ‘o na feto’oi atu ki fanga ke tā/ta’aki mai ‘a e fu’u kape pē ‘e taha na’e toe he motu – ‘a ia na’a na toki ‘ilo ai tā kuo papa mai ai ‘a Momo mo fakafalala ai ‘enau naunau toutai – ‘a ia na’e tupu ai ‘ene tapu ke na to e ala ki ai.

Na’e to e fetuli mai ‘a e ongo mātu’a mei fanga ‘i tahi ki hona fale ‘i ‘uta, ‘o nau fesiofaki pē mo hona ‘ofefine, ‘a ia na’e papau leva ke tamate’i ai ‘a Kava ke fai’aki honau fatongia ki he Tu’i Tonga. Na’e taonakofea leva ‘e he ongo mātu’a ‘ena tama, ‘o na faka’afu leva ‘a e ‘umu, ‘a ia na’a na ta’o ai ‘a Kava ke fua’aki honau fatongia mo fai’aki ‘enau holo mo e hala ki he Tu’i Tonga. Na’e ongo atu ki a Momo ‘a e felaulau tōmatakakano ‘a e ongo mātu’a, ‘o ne fekau leva ke ‘oua to e fuke ‘a e ‘umu ka e tuku ai pē ko e fa’itoka ‘ena tama.

Na’e hokohoko atu pē hono tengihia mo tauhi ‘e he ongo mātu’a ‘a e fa’itoka ‘ena tama ‘ofa’anga. Na’e ‘i ai ‘a e ‘aho ‘e taha na’a na tokanga’i na’e tupu hake ha ongo fu’u ‘akau ‘e ua hono funga ‘i va’e mo ulu. Na’a na to e tokanga’i ‘oku lele mai ‘a e ki’i kumā – ‘o ne ‘uusi/ū’usi ‘a e fu’u ‘akau he va’e mo lele sipesipa ki he fu’u ‘akau he ‘ulu – ‘o ne to e ‘uusi/ū’usi pea lele hangatonu – ‘o toki mahino ai tā ‘oku kona ‘a e fu’u ‘akau he va’e ka e melie ‘a e fu’u ‘akau he ‘ulu – pea toki ‘ilo ai tā ko e fu’u kava ē ‘i va’e ka e fu’u tō ē ‘i ‘ulu.

‘Oku mālie, loloto mo ma’ongo’onga fau hono tufunga ‘a e tala ‘o e kava ‘e he tufungafonua ongoongoa ko Lo’au – ‘a ia ‘oku makatu’unga he faiva fakamamahi mo e faiva fakaoli hono fakafelavai ‘a e kona mo e melie – ‘o tefito he kava mo e tō. Na’e kona ‘a e me’a kotoa, ‘o hangē ko e ta’eola ‘a e toutai ‘a Momo mo ‘ene kau toutai – ‘a ia ne iku ‘o nau halifoea mo hālofia – ‘o ‘ikai lau taha ki he hongevale ‘a e motu na’a nau afe ki ai ko e kumi hūfanga mo hala ha me’akai ke nau ma’umo’ui mei ai.

Na’e to e hoko ‘o kona ‘a e feingavale ‘a e ongo mātu’a ha me’a ke fua’aki honau fatongia ki he Tu’i Tonga – ‘a ia na’e tumutumu he’ena taonakofea hona ‘ofefine – ‘o hoko ‘ene mate ko e feilaulau ma’ae fonua mo e tala. Na’e tupu mei he feilaulau hona ‘ofefine hono tufunga ‘e Lo’au ‘a e ouau ‘o e kava – ‘a ia ‘oku tolonga mai he vaha’akuonga ko e fakanofonofo’anga ‘o e fonua mo hono tala – ‘o fai ai hono fakafenāpasi ‘a e fepakipaki he nofo – ‘a ia ‘oku liliu ai ‘a e kona ke melie – ‘o hoko leva ‘a e vākovi mo e vātau ko e vālelei mo e vāmelino.

Na’e tefito hono tufunga ‘a e ouau ‘o e kava hono tomu’a inu ‘a e kava ka e toki kai ‘a e tō – ‘o hangē pē ko hono fua ū’usi ‘a e kava mo toki ū’usi ‘a e tō ‘e he kumā hono tufunga ‘a e tala ‘o e kava – ‘a ia ‘oku tuhu ki he ngāue tolonga mo faka’ofo’ofa kotoa pē ‘oku tomu’a inu ‘a e kona ka e toki kai ‘a e melie –  ‘o hangē tofu pē ko e faiva ako – ‘a ia ‘oku tomu’a kavahia mo konahia ka e toki ma’u ‘a e ‘ilo mo e poto ‘oku mohu mo fonu – ‘o lahi ‘ene faka’ofo’ofa, tolonga mo ‘aonga. ‘Oku tuki ‘a e kava kona ‘o inu ka e ‘oua leva ke melie, ‘o hangē pē ko hono inu ‘a e kava kona, ‘a ia ko hono lēsoni ko e mohe pē ke melie!

‘Oku fetu’otu’ani mālie ‘a e tala ‘o e lotu Kalisitiane ‘oku humaki he tala masani ‘o e kolosi mo e ‘akaufakalava mo e tala ‘o e fonua ‘oku hunuki he tala fungani ‘o e kava – ‘o na tumutumu fakatoulōua he mate, mo hoko ‘a e feilaulau hono tukifa’oa mo hokataoa ‘a Sīsū – ‘a ia na’a ne hifo mei taloni ‘o Langi ki he kinoha’a mo e ngaoha’a ‘o mamani ke kilala ‘a e angahala ‘a e fa’ahinga ‘o e tangata na’e papau ki he mate mo e mala’ia ta’engata – ka e tupu mei he feilaulau hono taonakofea ‘a Kava ko e fakanofonofo’anga ‘o e fonua mo e tala.

‘Oku ‘asi ‘eni ko e lea mālie ‘o e ta’anga hiva/himi ‘oku pehē: He na’a ne kumi au ‘e Sīsū ki he ‘akau, Pea kuo ne hanga ‘o ‘ilo he mata ‘o e tao [mo e fa’o] mo e: Ha’u ‘o inu ‘i he vai mo’ui na’e tafe, ‘I hono nima mo hono va’e, Tafe ‘i hono vakavaka. ‘Oku makatu’unga heni ‘a e lava ke ta u pehē ko e sakalamēniti ko e kava ia ‘a e lotu Kalisitiane, ‘o kai ‘a e sino ‘o Sīsū ko e mā mo inu hono toto/ta’ata’a ko e uaine – ka ko e kava ko e sakalamēniti ia ‘a e fonua, ‘a ia ‘oku tomu’a inu ‘a e toto/ta’ata’a ‘o Kava ko e kava pea toki kai hono sino ko e tō.

‘Oku to e fotu mai ha me’a mālie mei he tala fungani ‘o e kava – ‘o tatau tofu pē mo e tala masani ‘o e kolosi mo e ‘akaufakalava – ‘a ia ko e me’a lelei, faka’ofo’ofa mo tolonga kotoa pē ‘oku ma’u ia he mo’ui feilaulau ‘oku tumutumu ma’u pē he mate [‘a ia ko e moto/kaveinga ia ‘a e Kolisi Tonga] – ‘o hangē ko e mate ‘a Kava hono taonakofea mo e mate ‘a Sīsū hono tukifa’oa mo hokataoa – ‘a ia ‘oku hoko ai ‘a e feilaulau ‘a Kava ko e fakanofonofo’anga ‘o e fonua mo e tala ka e hoko ‘a e feilaulau ‘a Sīsū ko e fakamolemole’anga ‘o e angahala ‘a e fa’ahinga ‘o e tangata.

‘Oku hoko ‘a e Pule’anga – ‘o tefito he vaetolu lalahi ‘o e mafai – ‘a ia ‘oku takitaha ngāue tau’ataina fakataha ai ‘a e Falealea ko e fa’u lao mo e tu’utu’uni, Kapineti [mo e Fakatahatokoni] ko e fakamo’oni lao mo e tu’utu’uni mo e Fakamaau’anga ko e fakahoko lao mo e tu’utu’uni ko e tufungafonua fo’ou – ‘o toki tuku mai ke tauhi ‘e he fonua – ‘a ia ‘oku kaveinga ma’ae lelei lahi fakalukufua ‘a e fonua – ‘o hangē pē ko e hoko ‘a e Potunague Ako ko e tufungaako fo’ou – ‘a ia ‘oku toki tukumai ki he kau faiako ko e kau tauhiako fo’ou – ‘o taumu’a kotoa ki he lelei lahi fakakātoi ‘a e fonua.

Ta u toki hoko atu.