Princess Ashika ^Featured

 1. Malu efiafi ka u fakalau

He ‘ikai ngalo he‘eku manatu
‘Etau fekita ka mou folau
Ko e ‘alu na ‘ikai to e ha‘u
‘Ikai te u ‘ilo ko ho maka kafu
‘A e peau tā ‘o e vaha folau
Nofo ni fe‘ofa‘aki ‘a kakau
Langa ‘o uhu ‘i si‘oku mafu

2. ‘E Tonga ‘Eiki ‘otu Ha‘apai
Ongo Niua mo Vava‘u Lahi
Kuo motuhia e hala ‘i tahi
Hoko ko e mala ‘ete ‘amanaki
‘Ikai mea‘i ‘e he pule‘anga ni
Ko e kōfini e fu‘u vaka ni
Tō tau ai si‘ono kakai
‘O fonua loto he kilisitahi

3. Si‘ete hanu ni tuku ki a hai
Ka e taumaiā ‘e to e mafai
‘A e ipu vai kuo mahua ni
‘E to e lava hono tānaki
Tuku ai ā ki a Sātai
‘A e totongi ‘etau angafai
Ka u tengihia pē mou tangi
‘I he hulu fau hoku te‘ia ni

4. Funga Tokelau ki Muifuiva
Tonumea ē mo Kelefesia
Funga Tonga ē tu‘u ‘o talia
‘A e fehu‘i ni ‘oku ‘ife‘ia?
Si‘i fāmili mo e kāinga?
Kelekele‘aki e potu tahi na
‘Aho mo e pō ‘utu‘utufia
He mavae ni ta‘e‘amanekina

5. Hoto tu‘a‘ofa atu ki maama
Ki he toka‘anga hoku ‘ofa‘anga
‘Isa ‘oku ongo pea faingata‘a
Ke fakangalo‘i e fakaevaha
Hoto loto fonu he faingata‘a
Ko hoto fe‘ao ki he iku‘anga
‘Ikai ke u lava ‘ikai te u lava
Ho telio‘anga ‘ikai te u lava

Tau: ‘Osi ‘eku tumu ho‘o ta‘e‘ofa
‘E Princess Ashika
Ho‘o puke tu‘u ‘eta koloa
He peau mita ‘o e moana
‘Ete mata ika ki he pupu‘a
Ē manako maka ki Tofua
‘Ikai ha ‘utu ‘e hakea
Te u vale au ia he ‘ofa

Ko e ki‘i fakamatala nounou:

Na‘e fakafatu mo fakafasi/ fakaafo ‘a e “Princess Ashika” ko e ta‘anga hiva tengihia/ fakatangi (kohi/ laini 8, kupu/ veesi 6) ‘e he punake ko Talifolau Kinikini hili ‘a e fakatamaki, ‘a ia na‘e ngoto ai he potutahi ‘o Ha‘apai ‘i ‘Ᾱkosi he ta‘u 2009 he‘ene folau ki he ‘Otu Motu Tokelau, ‘o pekia ai ha toko 74 ko e kau folau/ pāsese ‘e toko 70 mo e kau kauvaka ‘e toko 4.

‘Oku to e tefito ‘a e talanoa fakaloloma ‘o e ta‘anga hiva tengihia/ fakatangi ni he faiva fakamamahi, ‘o ala lava lau ‘oku tolu ‘a e faiva ‘oku tufunga ‘e he punake, ‘a ia ko e faiva ta‘anga (performance art of poetry), faiva hiva (performance art of music) mo e faiva fakamamahi (performance art of tragedy), ‘o makatu‘unga kotoa he ongo mo e loto mamahi.

‘Oku nau tefito kotoa he ongo mo e loto mamahi ko e tupu mei he mate, ‘a ia ‘oku nau fehangahangai kotoa mo e mo‘ui, ‘o tupu mei he ongo mo e loto fiefia, ‘a ia ‘oku na nofo fakatoulōua he mafu/ fatu, ‘o kehe mei he ‘atamai mo e fakakaukau, ‘a ia ‘oku na nofo fakatoulōua he ‘uto pea to e nofo fakatoulōua ‘a e mafu/ fatu mo e ‘uto he sino.

Neongo ‘oku ma‘ama‘a pē ‘a e lea ‘o e talanoa fakamamahi ni, ‘o hangē pē ko e tu‘otu‘atatau ‘a e lea ‘o e ta‘anga kuo fakafatu mo e ongo ‘o e hiva kuo fakafasi/ fakaafo ‘e he punake ka ‘oku fihitu‘u mo fepakitu‘u ‘a e loloto mo e maokupu ‘o e mamahi ‘a e ongo mo e loto ‘oku ‘alu hake mei loto he mafu/ fatu, mo to e ‘ilo ‘e he ‘atamai mo e fakakaukau mei loto he ‘uto.

‘Oku ngāue‘aki lelei ‘e he punake ‘a e ongo heliaki fakafetongiaki (epiphoric, qualitative heliaki) mo e heliaki fakafekauaki (metaphoric, associative heliaki), ‘o hangē ko e matamatanoa ha ika he pupu‘a, faka‘amunoa ha maka ki Tofua mo e uiuinoa ki Muifuiva, Tonumea mo Kelefesia ke talia mai ‘a e fehu‘i pē ‘oku ‘ifē nai si‘i ngaahi fāmili mo e kāinga kuo mole.