Mālohi Utah Warriors, 33-31; Faka-'aonga'i faiako Latham "Trojan Horse" ^Featured

TUKWILA, WASHINGTON (Mā‘asi 7, 2020) – Ko e timi “Trojan Horse” ‘a e Utah Warriors (2-2-1) na‘e ‘ohake ‘e faiako Chris Latham ‘o nau vevela‘i, 33-31, ‘a e hau lolotongá, Seattle Seawolves (1-4). Ko e ikuma mahu‘inga taha eni ‘a e Warriors 'i he ta'ú ni.

Na‘e tokolahi ‘enau kau kafó ‘i he uiké ni ‘o hangē ko Kapiteni Dwayne Polataivao (#9) pea mo e feesí, Hagen Schulte (#10). Na‘á nau hangē ha timi ‘o e fanga “dingo” ‘Aositeléliá kuo nau lavelaveá ‘i he ‘enau tū‘uta ‘i Tukwilá, Washington.

Pea ko e pōlepole‘anga ‘o faiako Latham ke faka-ilifia‘i ‘aki ‘a e Seawolves ko e tangata Fisi tautua‘ā ongoongoa na‘e mētali-koula ‘i he Olimipiki 2016, Vatemo Ravouvou (#15). Na‘e toki tū‘utamai ke teteki ai ‘a e tautua‘ā ‘a e Seawolves.

“TROJAN HORSE” FAKAPULIPULÍ

“Ko ‘emau tangata tu‘ukimu‘a tau-toko-fitú, Vatemo Ravouvou, na‘e taumai ‘i he uike kuo ‘osí, oku mau faingamālie ai ‘i he uiké ni, pea ‘e tu‘u le‘okoló,” fakamatala ‘a Latham.

Pea ‘oku mahino koe‘uhí ko Latham ko e le‘okolo tu‘uloa ‘a e Wallabies, ‘e faka-tu‘utāmaki ‘aupito ‘a Ravouvou ‘i ha‘á ne faka-tokolahi mai ‘a e tautua‘ā ‘a e Warriors. Kuo pau ke tokanga‘i makehe lahi ‘aupito ‘a Ravouvou ‘e he Seawolves.

“Talu eni kuo kātoamai ‘emau kau aleapaú fo‘oú, ‘oku mau lava leva ‘o fe‘auhi toe fefekaange. Pea ‘e lava leva ke mou mamata ‘i he ngaahi va‘inga mālié,” ka e ‘ikai pē ke fakahā ‘e Latham ‘a ‘enau mahafu fakapulipuli – “Trojan Horse”.

KAUKAUA, MĀNAVA LAHI FOUETÍ

‘Osi e miniti ‘e 80, tānaki mo e taimi laveá – hokomai mo e toutou ‘ohofi ‘e he Warriors ‘a e laini tata‘ó, ngaahi tautea, sikalanu, laine‘auti, mo e toutou vilomai ‘a e pulú ko hono tali fefeka‘imai ‘e he malukolo ‘a e Seawolves – kuo toki hāmai ‘a e fakapulipuli “Trojan Horse” ‘a Latham.

Lolotonga ‘oku kei tulikai ‘a e Warriors, 26-31, kuo tautea kaati engeenga ‘a e huka talilavea, Stephen Goetzee (#16) ‘a e Seawolves. Pea mahuamai ai ‘a e mālohi‘anga ‘o e fouetí mei he kete ‘o e “Trojan Horse” ‘o lolomi ‘a e Seawolves ki he kelekelé ke ‘ikai kenau toe lava ‘o tu‘ú.

Kuo toho ‘a e minite taimi laveá ‘e he foueti ‘a e Warriors ‘o minite lōlōa ‘e valu (8) ‘o ‘ikai mole pulú. Ka e hangē kuo lau houá ‘a e feinga tafe faingatā‘iá ‘a e Seawolves. Tuai ‘enau kemo, kuo to‘o ‘e senitā Calvin Whiting (#12) ‘o e Warriors ‘a e pulú mei he lele ‘a e kapakaú Tyler Fisher (#13) ‘o tëkolo‘i. Pea tata‘o ai ‘a Whiting pea hū e ‘aká ke fakapapau‘i ‘enau fakalaka kai ‘o nau mālohí, 33-31.

KAU VA‘INGÁ

UTAH WARRIORS
1. Franco van den Berg (17 Huluholo Mo‘ungaloa, 51’); 2. Veremalua Vugakoto (16 Sama Malolo, 61’); 3. Angus MacLellan (18 Kalolo Tuiloma. 51’); 4. John Cullen (capt.); 5. Matt Jensen (20 Puna Vuli 70’); 6. Bailey Wilson; 7. Ara Elkington; 8. Jurie van Vuuren (19 Saia Uhila 61’); 9. Michael Baska; 10. Robbie Povey, 11. Josh Whippy; 12. Calvin Whiting; 13. Tyler Fisher; 14. Gannon Moore; 15. Vatemo Ravouvou.

Not used: 21. Dwayne Polataivao; 22. Dom Toluono; 23. Jared Whippy.

SEATTLE SEAWOLVES
1. Djustice Sears-Duru (17 Kellen Gordon 60’); 2. Mike Shepherd (16 Stephan Coetzee 45’); 3. Tim Metcher (18 Jake Ilnicki 60’); 4. FP Pelser (19 Jérémy Lenaerts 45’); 5. Brad Tucker; 6. Vili Toluta‘u; 7. Nakai Penny (20 Eric Duechle 45’); 8. Riekert Hattingh (capt.). 9. JP Smith; 10. Ben Cima (21 Ryno Eksteen 63’); 11. Peter Tiberio (22 Suli Tamaivena 48’); 12. Shalom Suniula (23 Joey Iosefa 66’); 13. David Busby; 14. Brock Staller; 15. Mat Turner.

MATCH OFFICIALS

Referee: Henrique Platais (Brazil)

Assistants: Austin Reed (USA) & Denny Russell (USA)