Hake Kātaki Pule-Faiako Utah Warriors, Chris Latham, Māhanga 20-20 Featured
Ko Kalolo Tuiloma (matatolu to‘omata‘u; #18) na‘e tata‘o mōmeniti faka‘osi ma‘á e Utah Warriors ki he māhanga, 20-20, mo e Austin Gilgorins, ‘i Texas. (Faitā: US Major League Rugby).
Hake Kātaki Pule-Faiako Utah Warriors,
Chris Latham, Māhanga 20-20
Fa‘utohi: Sione Ake Mokofisi
Austin, Texas (Feb. 22, 2020) – Ko hai ia e faiako ‘akapulu ‘e ta‘e fakapo‘uli ‘i he anga‘aki ‘e he timí ‘a e foaki e mālohí ‘i he faka‘osi‘osi ‘o e taú? Kuo kamata fefeka ma‘upē ‘a e Utah Warriors ‘o nau taki kai ‘i he mālōlō – kau ai ‘a e fe‘auhi uiké eni hono tolú – ka e ‘osi angé kuo nau tōlalo ma‘upē ‘i he konga hono uá.
“‘Oku ou ta‘e fiemālie ‘aupito ‘i he ola ko ená,” ko pule-faiako Chris Latham ia ‘i he ‘osi ‘enau māhangá, 20-20, mo e Austin Gilgronis na‘e fai ki Texas. Hangē ko ‘enau taki kai ‘i he mālōlō ‘i he tau eni ‘e tolu hokohokó, ka e fakamoleki ‘i he tu‘u hono uá.
Hili ‘enau taki, 10-3, ‘i he mālōlō ‘o e ‘ahó ni – mei he tata‘o ‘a kapiteni Dwayne Polataivao (#9) mo e ‘aka fakahū ‘a Hagen Schulte (#10) – na‘e vave ‘a e tulikai ‘a Austin ‘o nau fa‘oa ‘a e takikaí, 17-10. Pea nau taki aipē, 20-13, ‘i he ‘osi ‘a e taimí, ka e monū‘ia ‘a e Warriors ‘i he tānaki mai ‘o e taimi laveá.
Latham: Kovi Tali Tangatá
“Neu ongo‘i na‘e fe‘unga ‘emau tokonaki fefeka ‘i he ‘uluaki tu‘ú ke toe ‘akahi atu ki mu‘a ‘a e tu‘u hono uá,” ko e ‘analaiso ia ‘a pule-faiako Latham ‘i he ‘osi ‘a e taú.
“Ka e pangó, na‘a mau toe fakatōoki aipē kimautolu ‘e he tu‘unga fakakaukau takitaha, mo e kovi ‘a e tali-tangatá. ‘Osi totonu kemau leleiange,” hokoatu ‘a Latham.
Pea fakamālō ki he sū ‘aka-fakahū ‘o feesí-5/8, Hagen Schulte (#10), ‘i he‘ene fetongi ‘aka tautea mo e haafe ‘a Austin, Marcelo Torrealba (#9) ‘o nau takikai ai 20 ki he 13 ‘a e Warriors. A‘u o ‘osi e taimí, na‘e kei taki pē ‘a Austin, 20-13. Ka e tōmai e fo‘i monū‘ia ‘i hono tānaki mai ‘a e miniti fakalōlōa-laveá.
Hao Ki He Fafangú
Na‘e teke‘i ai ‘a e molo ‘a e Warriors mei he laine‘auti mita-10 ‘o Austin. Fakafokifā kuo makape hake ‘a e matatolu talilavea ko Kalolo Tuiloma ‘o tata‘ó, pea sila‘i ‘e he sū ‘o Schulte ‘a e māhangá, 20-20.
“Na‘e ‘ilonga e loto-to‘a ‘a e kau va‘ingá ke keli‘i hake fo‘i taha ko ‘ení,” tānaki mai ‘a Kapiteni Polataivao ki he lau ‘a Latham. “Kā ko homau filí pē kimautolu ‘i he mōmēnití ni…”
Ko e monū ‘o e māhanga ko iá, ‘oku tu‘u ai honau lekootí, 1-1-1, ‘i he ta‘ú ní, pea ‘oku nau fika tolu ‘i he Konifelenisi Hihifó ‘o e MLR. ‘I he uiké ni, ‘oku nau fou mai ‘i he Colorado Raptors, Denver, pea tenau fokimai ‘o fakaava ‘i honau mala‘é ‘i Salt Lake City (Zion’s Bank Stadium), ‘i he Tokonaki uike kitu‘á, Mā‘asi, 7.
UTAH WARRIORS
(1) Franco van den Berg, (2) Veremalua Vugakoto, (3) Angus MacLellan, (4) John Cullen, (5) Matt Jensen, (6) Bailey Wilson, (7) Thomas Tu’avao, (8) Jurie van Vuuren, (9) Dwayne Polataivao (capt.), (10) Hagen Schulte, (11) James Vaifale, (12) Calvin Whiting, (13) Tyler Fisher, (14) Gannon Moore, (15) Robbie Povey.
Kau talilaveá: (16) Ricky Tu’ihalangingie, (17) Huluholo Mo’ungaloa, (18) Kalolo Tuiloma, (19) Puna Vuli, (20) Saia Uhila, (21) Michael Baska, (22) Jared Whippy, (23) Dom Toluono.
AUSTIN GILGRONIS
1 Jamie Mackintosh, 2 Tiaan Erasmus, 3 Mason Pedersen, 4 Maikeli Mudu, 5 Potu Leavasa, 6 Dominic Akina, 7 Moe Abdelmonem, 8 Lino Saunitoga, 9 Marcelo Torrealba, 10 Zinzan Elan-Puttick (capt.), 11 Rodrick Waters, 12 Gabe Farley, 13 Peni Tagive, 14 Corey Jones, 15 Rodrigo Silva.
Kau talilavea: 16 Brendan Rams, 17 Juan Echeverría, 18 LaRome White, 19 Luca Tani, 20 Stewart Morris, 21 Colby Stevens, 22 Sione Fangaiuiha, 23 Frank Halai.
Ngaahi Ola Uike #3
Utah Warriors, 20; Austin Gilgorins, 20
San Diego Legion, 30; New England, 21
New York, 22; Atlanta ATL Rugby, 19
Toronto Arrows, 39; Seattle Seawolves, 17
Washington DC, 22; Houston Saber Cats, 13
New Orleans LA, 27; Colorado Raptors, 20
