Fokotu’u ‘o ha ‘Akatemī (Academy) ‘Akapulu ma’a Tonga Featured
Nuku'alofa
'Aho 11 Mē, 2015
‘Oku ‘amanaki ke folau mai ki Tonga ni ‘a e kautaha ko e Essentially Group (NZ) Limited mei Nu’usila ‘i ha fengaue’aki mo e Kautaha Lao Edwards Law ke fakahoko ha fakataha fekau’aki mo hano fokotu’u ha ‘Akatemī (Academy) ‘Akapulu ma’a Tonga. ‘Oku faka’amu ‘a e kautaha ni ke fakahoko ‘a e ngaue ni ‘i he ta’u ni 2015 ‘o faka taumu’a ke ako’i mo teuteu’i ‘a e fānau taleniti’ia ‘i he faiva ‘akapulu.
Ko e kautaha ‘iloa foki ‘eni pea ‘oku ‘ikai sola kiai ha taha ‘i he māmani ‘o e ‘akapulu. ‘Oku nau nau pule’i mo fakalele ‘a e faiva ni pea ‘oku nau hoko koe pule ki he kau tangata ‘iloa ‘o hangē ko Richie McCaw mo Dan Carter ‘a ia ‘oku na lolotonga fakafofonga’i ‘a e Timi Hau ‘a e All Blacks. ‘Oku nau toe fakangāue’i foki mo e kau faiako tu’u kimu’a mo taukei ‘o hangē ko e ongo faiako ‘Akapulu ‘iloa ko Craham Henry mo Wayne Smith ‘a ia na’a na fakatou faiako ‘i he Timi Hau ‘a e All Blacks.
‘Oku faka’amu ‘a e kautaha ni ke fakahoko ha talatalanoa mo e Kau Puleako pehē ki he kau Talēkita Sipoti ‘a e ngaahi ako’anga ‘a Tongatapu ni fekau’aki mo ‘enau vīsone mo tokoni ko’eni. Ko e ‘akatemī ko’eni ‘oku taumu’a ia ki he fānau ‘i he vaha’a ‘o e ta’u motu’a koe 12 ki he 17.
‘Oku fokotu’utu’u ke fakahoko ‘a e fakataha ko ‘eni mo ‘oange ai ha faingamālie ki he kautaha ke fakahoko atu ‘enau fokotu’utu’u, vīsone mo ‘enau taumu’a ‘i he ‘aho Tu’apulelulu 4 ‘o Sune ‘o fakafuofua ki he taimi 1 ki he 2 Efiafi ‘i Nuku’alofa pe.
‘Oku te’eki ke fakapapau’i ha feitu’u ke fakahoko kiai ‘a e fakataha ni ka ‘e fakahoko heni hano talaki ‘e he kau ‘ofisiale mei he kautaha ni ‘a ‘enau vīsone mo e palani ki he ngāue ni. ‘E foaki foki mo e faingamalie ki ha fefakafetongi’aki fakakaukau mo e kau ma’u fakataha pe ko hano fakama’ala’ala ‘a e ngaahi tamu’a ‘a e kautaha ni.
Na’e fakaha ‘e William Clive Edwards ‘oku nau fakafofonga’i ‘a e kautaha ‘i Tonga ni ‘i he’enau ngaahi fiema’u fakalalo mo tokoni ki hono fokotu’utu’u ‘o ‘enau polokalama fakataha ‘i Tonga ni. “Ko e kaveinga mahu’inga ‘eni ia pea ‘oku ‘i ai ‘a e ‘amanaki lelei ‘e hoko ‘a e vīsone ko’eni ‘o mo’oni he ‘e lelei ia ki he hakotupu ‘o e fonua,” koe fakamatala ia ‘a Edwards.
‘Oku faka’ataa ‘a e fakataha ko’eni ki he ngaahi ako’anga kotoa ‘oku nau kau ki he fe’auhi va’inga ‘akapulu ‘i Tongatapu ni.
 ‘Akapulu ma’a Tonga "Pin It")
2 comments
-
![Okusitino Mahina [Hufanga]](https://secure.gravatar.com/avatar/3faef0c7fca480e4d3fd4ffffa7a37c4?s=48&default=https%3A%2F%2Fnepituno.to%2Fcomponents%2Fcom_k2%2Fimages%2Fplaceholder%2Fuser.png)
Si'oto'ofa,
'Oku fakafiefia atu mo fakamafana fau 'a e fakakaukau 'oku lau mo e fokotu'utu'u 'oku fatu -- 'o hange ko e tanumaki mo e pouaki kuo feia 'e S. Tataliatu -- 'a ia ko hono talanga'i mo teuaki ke fokotu'u ha 'Akatemi 'Akapulu 'a Tonga [Tonga Rugby Academy]. Ko ia ai, 'oku tekaki atu 'a e fakamalo mo'oni ki he talaki mo teuaki 'o e ngaue lahi ni, 'a ia 'oku 'ikai ngata pe he'ene fonu he mamafa. fihi mo faingata'a ka e to e mohu he faka'ofo'ofa, ma'uhinga mo e 'aonga.
'Oku ho'ata mai he langangaue ni ko e talanga'i mo teuaki ke fokotu'u ha "'apiako" 'akapulu. 'a ia 'oku fakataha'i fakatouloua 'a e "fakakaukau" [thinking; theory; conception] mo e "fakahoko" [doing; practice; action] 'o e 'akapulu, 'o 'ikai tefito pe he "fakahoko" 'o e 'akapulu. 'E hoko hono fokotu'u ha 'apiako 'akapulu ke tefito 'a e ako 'akapulu fakatou'osi he "fakakaukau" mo e "fakahoko" 'o e 'akapulu, 'o mu'omu'a ma'u pe 'a e 'uluaki ka e muimui ma'u pe 'a e ua, 'a ia 'oku tau'aki huluhulu 'e he taha 'a e taha.
'Oku toki mo'oni he langa-nague faka'ofo'ofa, ma'uhinga mo 'aonga fau ko 'eni 'a e lea heliaki 'Ingilisi malie ko e: "Back to basics," 'a ia 'oku ala liliu ko e: "Foki ki he tefito," 'o tautefito ki he fiema'u vivili ke fakalelei / fakafenapasi 'a e tu'unga felekeu 'oku 'i ai 'a e 'akapulu 'a Tonga 'i Tonga ki he tukunga maau he'ene foki ki he tefito, 'a ia ko hono fakataha'i fakatouloua 'a e "fakakaukau" 'o e 'akapulu mo e "fakahoko" 'o e 'akapulu. ['O hange pe ko ha to e tufunga, nimamea'a mo e faiva pe, 'a ia 'oku 'ikai ngata pe hono ngaohi mo fa'u ke tonunga mo 'aonga ki he nofo ka 'oku to e fa'u ke tatau, potupotutatau mo faka'ofo'ofa ki he sio mo mafana, vela mo tauelangi ki he loto mo e ongo].
'Oku kau heni 'a e foki ki he tefito 'o e fakakaukau / teoli fakaTonga 'o e ako, 'a ia ko e liliu fakata-va, fakafuo-uho mo fakangaue 'a e 'atamai mei he vale [ignorance] ki he 'ilo [knowledge] mo e poto [skill]. Na'e makatu'unga 'a e ako fakaTonga he ngaahi mala'e / vahevahe fakaha'a lalahi 'e tolu [three general forms of social activity], 'a ia ko e ha'a tufunga, ha'a nimamea'a mo e ha'a faiva, 'o to e 'iloa he lea 'Ingilisi ko e material [tufunga], fine [nimamea'a] and performance [faiva] arts, 'a ia 'oku fa'oaki 'a e 'ilo mo e poto he fonua / culture mo fakafetu'utaki kinautolu he tala / lea / language, 'o hange ko e tufunga langafale [material art of house-building], nimamea'a koka'anga [fine art of bark-cloth-making] mo e faiva fanifo [performance art of surfing (that is, wave-sliding)] mo e ha fua. ['Oku 'ange'ange 'a e felekeu 'a e faiva 'akapulu 'i he felekeu 'a e faiva ako ko e 'ikai ke foki ki he tefito, 'o tau mo'unofoa kitautolu he ako ki he ngaahi 'ilo mo e poto fakaUesite ka e fakasi'esi'aki 'a e 'ilo mo e poto tupu'a. mohu mo loloto fakaTonga ['a ia na'e tefito hono ako'i he fakaha'a ko e tufunga, nimamea'a mo e faiva], 'a ia 'oku to e foki mai ki ai 'a e Uesite ka tau ke i mo'umo'ua 'alua ai pe kitautolu].
'Oku fakamamafa hono ako'i 'a e takitaha 'o e tufunga, nimamea'a mo e faiva kotoa honau ngaahi makatu'unga taautaha, 'o hange mata [eye] pe, hono tatau, ava [hole] 'o e toki he tufunga langafale, mata pe ava 'o e kupesi he nimamea'a koka'anga mo e mata pe ava 'o e ngalu / peau he faiva fanifo ['o hange pe ko e heliaki he faiva ta'anga, tu'akauta he faiva hiva mo e hola, kaiha'asi pe haka-funga-haka he faiva haka].
'Oku 'i ai 'a e ngaahi 'aati fo'ou kuo hu mai ki Tonga, 'o hange ko e tufunga tongiukamea [material art of steel-cutting], nimamea'a tuimatala'i'aku [fine art of embroidering] mo e faiva 'akapupu [performance art of rugby-playing]. Ko ia ai, 'e lava ke to e ui he 'uhinga ko ia 'a e 'Akatemi 'Akapulu Tonga [Tonga Rugby Academy] ko e 'Akatemi Faiva 'Akapulu Tonga [Tonga Performance Art of Rugby-Playing Academy].
'O hange pe ko e kotoa 'o e tufunga, nimamea'a mo e faiva, 'oku tefito 'a e faiva 'akapupu he sino he'ene fakahu 'a e pulu he mata pe ava, 'o tatau pe 'a e sikalamu, laini-'auti, paasi, lele'i, molo, ulaki, 'aka-fakato, 'aka-fakatotolo, 'aka-tolopukiki, tata'o, 'aka-fakahu mo e ha fua -- 'o hange pe ko e makatu'unga 'a e faiva fanifo he sino he'ene fakahu 'o e papafanifo 'o fakaheke he mata pe ava 'o e ngalu / peau, 'a ia 'oku kamata mei he fasi-e-ngalu / ngalu-e-fasi ki he tuku-e-ngalu / ngalu-e-tuku, 'o fai toka'one mo e lau-kai. ['Oku ma'u mei heni 'a e lea Tonga heliaki ko e: "Tokanga he ko e ngalu 'e fasi!" 'Oku makatu'unga 'eni hono fakataha'i 'a e "fakakaukau" 'o e faiva 'akapulu mo e faiva fanifo mo e "fakahoko" 'o e faiva 'akapulu mo e faiva fanifo, 'a ia 'oku tefito he tatau mo e potupotutatau mo e faka'ofo'ofa / malie, 'o fakaola ko e mafana, vela mo e tauelangi.
Te u tatau atu ka e fai ha afe 'o lepatu'u pe mei tu'angalu he funga 'o e fakakaukau mo e manatu.
'Ofa lahi mo e hufaki,
Hufanga
Tt. 'Oku malie ma'u pe 'etau fakatoknga mo fakakaukau ki he langiloa hono fakahuafa 'a e Sitetiume Fakafonua 'o Tonga ko "Teufaiva"! -
Fakamafana ka hoko e fakakaukau ko'eni. Malo mo si'i feinga 'a e ngaahi kolisi ka kuo taimi ketau 'unu atu ki he fakakaukau ko'eni.