Ikuna ‘e he timi ‘a e Mu’a Saints Ipu Jason Taumalolo ^Featured

Ko e ikuna ‘eni ‘e he timi ‘a e Mu’a Saints ‘a e timi fefeka ‘a e Ha’ateiho Spartans ‘aki ‘a e kai koe 24 ki he 23 ‘i he fainolo ‘a e kalasi ‘uluaki ‘i he mala’e ‘akapulu Kolisi Ko Tupou ‘i Toloa ‘i he ‘aho Tokonaki 12 ‘o Me 2018.

Na’e ikuna ‘a e Saints ‘aki ‘a e poini ‘e taha ‘i he tataaiku ‘a e taimi ‘i he tau matu’aki fakaholomamata mo fefeka mo’oni.

Na’e ‘i Tonga ni foki ‘a e faiako ‘a e timi Mate Ma’a Tonga Kristian Woolf pehe ki he Palesiteni ‘a e Komiti Liiki Fakafonua ‘a Tonga Semisi Sika ke foaki ‘a e ngaahi pale ki he ongo Kalasi na’a nau kau atu ki he fe’auhi pea na’e anga pehe ni leva ‘a e tu’u ‘a e fe’auhi:

Kau ikuna ‘i he ongo Kalasi:

Kalasi ‘Uluaki (First Division):

1st Place: TOP$5000 (sponsored by TCC) - Mu'a Saints

2nd Place: TOP$3500 - Ha'ateiho Spartans

3rd Place: TOP$2500 - Toloa Old Boys

4th Place: TOP$2000 - Vaini Doves

Kalasi 2 (2nd Division):

1st Place: TOP$3500 - Makaunga Titans

2nd Place: TOP$2500 - Fatumu

3rd Place: TOP$1800 - Kolomotu'a Eagles

4th Place: TOP$1200 - Fasi Ma'ufanga Vikings

‘Oku mahino foki koe ikuna ko’eni ‘a e Saints tenau folau atu ki Ha’amoa ke kau atu ki he fuofua tunameni ‘a e Ipu ‘a Polinisia (Polynesian Cup) ‘a ia ‘oku fokotu’utu’u ke fe’auhi fakata’u kiai ‘a Tonga mo Ha’amoa.

“I ha fakamatala mmei he Kautaha Liiki ‘a Tonga, ko e fokotu’utu’u ko’eni ke va’inga ‘a e timi hau ‘i he fe’auhi ‘a Ha’amoa moe hau ‘i he fe’auhi ‘a Tonga ni fakata’u pe ‘oku ‘amanaki ke fakahoko mai ki Teufaiva ‘i he ta’u kaha’u.

‘Oku lolotonga lele foki ‘a e fe’auhi tatau ki he Ipu ‘a Melanisia (Melanesian Cup) ‘i he vaha’a ‘o Fisi mo Papaua Niukini pea koe ta’u ‘aki foki ‘eni ‘e 3 ‘ene lele mai.

Ko e konga foki ‘eni hono teke ‘o e fakalakalaka ‘a e ‘Akapulu Liiki ‘i Tonga ni hili ‘a e ola lelei ‘a e kau atu ‘a e timi Mate Ma’a Tonga ‘i he ta’u 2017 ki he Fe’auhi Ipu ‘a Mamani.