Fakamalōlō'i Komisiona Polisi 'a Fisi
Komisiona Polisi 'a Fisi kuo fakamaloloo'i Sitiveni Qiliho
30 Sanuali, 2023. Kuo tu'utu'uni 'e he Palesiteni 'o Fisi Wiliame Katonivere'o makatu'unga 'i he fale'i 'a e Komisoni Konisitutone 'a Fisi ke fakamalōlō'i fakataimi 'a e Komisiona Polisi 'a e fonua Sitiveni Qiliho kae fakahoko ha fakatotolo fekau'aki moia.
'Oku kau foki 'i hono fakamalōlō'i mo e Komisiona Pilisone Francis Kean pea na'e tu'utu'uni ke fakahoko hono fakamalōlō'i kinaua he vave taha.
Ko e tu'utu'uni ko'eni na'e fakahoko 'i he 'aho Tu'apulelulu uike kuo'osi pea kuo fokotu'u mo e Fakamaau'anga makehe kenau fakahoko 'a e fakatotolo ko'eni.
'I he taimi tatau kuo fokotu'u 'e he Palesiteni Wiliame Katonivere 'a e Tokoni Komisiona Polisi 'a Fisi Juki Fong Chew mo Salote Panapasa ko e Tokoni Komisiona Pilisone kena le'ole'o he ongo lakanga mahu'inga ni kae fakahoko 'a e ngāue fakatotolo ko'eni.
Mei Hema: Komisiona Polisi Sitiveni Qiliho mo e Komisiona Pilisone Francis Kean 'a Fisi kuo fakamalōlō'i kinaua
Na'e fakahoko foki 'a e tu'utu'uni ko'eni 'a e Palesiteni lolotonga 'a e fakataha 'a Komisoni Konisitutone 'a e fonua pea na'e ta'efiemalie heni 'a e Palēmia malōlō Frank Bainimarama ko e taki 'o e Faha'i Fakaanga mo e tokotaha na'a ne fili ki he Komisoni 'o lue ki tu'a mei he fakataha.
'Oku mahino mai foki koe konga 'eni 'o e fokotu'utu'u 'a e Pule'anga fo'ou 'oku Palēmia ai 'a Sitiveni Rabuka pea koe laka hake 'eni he mahina 'e taha 'enau taki 'a e fonua mo 'enau fakalelei mo fakafo'ou 'a e tu'unga 'oku 'i ai 'a Fisi.
