Ko e hā ka fua ai ‘e he fonua ‘a e hia ‘a e tokosi’i ‘oku nau palani ke tamate’i e Facebook? ^Featured

‘Etita,

‘Oku ou fakatumutumu pea 'oku 'ikai ke lava 'o tui ki he ‘ai ke fua ‘e he tokolahi ‘o e kakai ‘o e fonua ‘oku ‘ikai ha'anau kovi ‘a e hia ‘a e tokosi’i mo e ki’i kulupu na’a nau fa’ufa’u mo fakataumu’a ke hoko hono tamate’i ‘o e feisipuka.

‘Oku ou fakapapau kia Sihova ‘oku ‘ikai ke mama’o ‘a e tukuaki’i ‘oku fakahoko ‘i he mitia fakasosiale fekau’aki mo kinautolu na’a nau fakahoko ‘a e ngāue pango ko’eni pea ‘oku ‘oku tau ‘osi ‘ilo pe ki he ngaahi hingoa kuo tuku mai ‘i he mitia faka-sosiale.

‘Oku toe fakaoli he ko Piveni Piukala pe ‘eni mo e Minisitā Polisi ‘oku tamu’omu’a ‘i hono faka’eke’eke mai ‘i he ngaahi mitia muli (Radio NZ) ‘o tala tokoua ‘oku ‘ikai kenau lava ‘o mapule’i ‘a e fanga tevolo tokua “we can’t control the demons” ‘oku nau nau laukovi ki he Tu’i.

Ko hai ‘a e fanga demons ‘oku ‘uhinga kiai?. ‘Oku ‘ikai puli ‘i Tonga ni mo mamani koe Palēmia pe mo hono kau poupou pehe ki he’ene paati PTOA ‘oku nau nofo ‘o tukuhifo mo fakalumoluma’i ‘a e Hou’eiki mo e Tama Tu’i pea fakakata ‘aki 'i he ngaahi peesi ‘a e kau poupou ‘o kau ai ‘enau poupou mo share holo ‘a e lau ‘a e peesi na'e 'iloa ko Mo’oni mo Totonu.

Ko e me’a ia na’e fakahoko lau ta’u ‘e he Minisitā Polisi tapu ange moia ka tau ngāue'aki 'a e lea mo'oni mo mahino lolotonga ‘ene ‘Etita ‘i he Nusipepa Kele’a ko hono fakaanga'i mo tukuhifo 'a e pule 'a e Tu'i pea kuo lea ta tu’o lahi ‘a Piukala na’a ne pole’i e ‘ulu ‘o Tupou V tukukehe ange ‘a ‘enau fakafepaki ki he Tu’i mo hono fale he'enau ngaahi peesi facebook.

‘Oku ‘ikai ke vale 'a e kakai 'o e fonua he koe fonua ako mo maama pea lotu ‘a Tonga ni kenau sio atu pe kae fai mai pe ‘a e langatoi mai he loto ‘ata’atā. ‘Ai ke ngali poto hono fai e me’a koe fa’u he kuo mahino ‘a e fepakipaki ‘a e va’e hema mo e mata’u.

‘Oku mole ‘a e tauatāina ‘a kimautolu e kakai ‘o fonua ‘Etita ‘i he fa’ahinga founga fakapāpeliane ko ‘eni pea kuo tau a’usia ‘a e ma’ulalo taha ‘o e fai tu’utu’uni mo e fakalele Pulela’anga ‘i hotau kuonga.

‘Ikai koe ololalo pe ‘ena ‘a e poupou ‘a e kakai ki he Pule’anga mo ‘ilo ‘a e ngaahi faihala ‘oku hoko ‘i he fonua kuo fai ai ‘a e fo’i fa’ufa’u ko’eni ke to’o ‘etau tau’atāina ke fakahā hotau loto.

Ka na’e tuku e feinga ke to’o e mafai e Tu’i ka e fa’u ha lao kene fakafepaki’i ‘a e fa’ahinga ngāue pango ko’eni na’e mei malava pe ke ta’ota’ofi ka kuo mahino mai 'oku matamata koe me’a ni na’e palani’i pe ke hoko.

‘Etita ‘oku ou mate ‘ofa he fonua mo ‘etau tau’atāina na’e foaki ‘e he ‘Uluaki Fā mo e Konisitūtone ‘o Tonga kuo fakahangahanga ke to’o koe ‘uakai mafai ‘a e tokosi’i ‘oku ‘ikai kenau sio loloa ki ha Tonga ‘e melino mo tu’uloa.

Tau tu’u ki ‘olunga ‘o lea mo fakafepaki’i ‘a hono fa’ao fakamalohi’i ‘etau totonu mo ‘etau tau’atāina pea tau lotu ke tokoni mai 'a Sihova.

Faka’apa’apa Atu,

Hala Taufa’āhau

Nuku’alofa