Kamata e teuteu ki he langa e ‘Ofisi Fakapule’anga St George Palace Featured
Pangai Si'i lolotonga hono fakama'a kae kamata 'a e langa
Nuku'alofa, 12 'Aokosi 2015. Kuo kamata ‘a e teuteu ki he langa ‘o e ngaahi ‘ofisi ‘e ‘iloa ko e St George Palace ‘i he Mala’e Pangai Si’í ‘i he ‘aho Monite 10 ‘o ‘Aokosi 2015.
Kuo kamata ngāue ‘a e kau ngāue mei he Potungāue ki he Ngaahi Ngāue lalahi ‘a e Pule’angá ki hono tukuhifo e ngaahi fu’u ‘akau lalahi mo hono faka’ata’ata ‘a e ‘elia ko eni ‘oku ‘amanaki ke fakahoko ai ‘a e langá.
‘E kamata tau mai he ‘aho 11 ‘Aokosi 2015 ‘a e ngaahi koniteina ‘o e naunau langá ke fakahoko’aki ‘a e ngaué. ‘E faka’ilonga’i ‘a e kamata’anga ‘o e ngāué ni ‘aki ha polokalama tanupou ‘i he faka’osinga ‘o e mahina ní.
Ko e polokalama ngāue langa ko ení ‘oku fakafuofua ‘e pa’anga ‘e lauimiliona hono mahu’ingá pea‘oku fakapa’anga ia he tokoni mei he Lepupilika ‘o e Kakai ‘o Siainá ki he Pule’anga Tongá. Ko e langá ni na’e fokotu’utu’u ke kamata ‘i Nōvema 2014 pea toloi mei ai ki he mahiná ni kae ‘oua leva kuo kakato ‘a e kātoanga Hilifaki Kalauni ‘o ‘Ena ‘Afifió.
Ko e ngāué ‘e fakahoko ‘e he Kautaha Langa Shanghai Construction Group mei he Lepupilika ‘o e Kakai ‘o Siainá pea ‘oku fakafuofua ‘e fakahoko ‘a e langá he mahina ‘e 20.
Ko e ‘Ofisi Fakapule’anga ni ‘oku funga vaka fā, pea ka kakato ‘a e ngāué ‘e ngaue’aki ‘e he ngaahi Potungāue ‘a e Pule’angá, kau ki ai ‘a e ‘Ofisi ‘o e Palēmiá; Potungāue Pa’angá mo Palani Fakafonuá; Potungāue ki Muli mo e Fefakatau’akí. ‘Oku ‘i he palani ‘o e falé mo e ngaahi ‘ofisi pehē ki he ngaahi loki fakataha’anga ke ngāue’aki ‘e he Pule’angá.
NGATA’ANGA
Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62. Tel: (676) 24 644
4 comments
-
Kautangata mo e kau ta'ahine kuo si'i puli e fale ne langa 'e he si'i kakai Tonga 'aki honau kakava mei he mataka ke fakamanatu 'aki si'i kakai ne to tau he tau lahi. Kuo puli e ki'i fale ia 'o loto Nuku'alofa. 'Oku 'ikai ke kovi e langa fakalakalaka ka 'oku 'iai e me'a ko e manatu ki he kuohili. 'Oku ou tui ka na'e to'o lelei pe 'o 'ave 'o to e langa mai ha tuliki 'i Pangi si'i pe ko Pangai lahi , Ka kuo ala ta'e'ilo kiai 'a Lavu ia 'o to'o.
Malo
Paula -
Koe me'a ni 'oku 'ikai ha toe feitu'u ia ke fai atu kiai e langa?
Fefe fau e fie ofi 'a Akilisi ki he Palasi.... hoi koe tevolo e nofo pangaisi'i.... -
Me'a eni 'oku ui koe to 'ehe poto kae holoki 'ehe vale ..... mei lava e senituli e tu'u 'ae 'ulu toa moe 'ulu 'akai 'i Pangai si'i, na'e to 'ehe kakai poto ke fakamalumalu ai e kakai mo faka matamatalelei'i'aki e fonua, kae tu'u atu koe Lavu 'o pulutousa'i kotoa ... me'apango koe vale na'e 'ikai mole ha fo'i pinati 'ene kui hono to ha fu'u 'akau ..... koe manu maumau 'oku tonu ke faka'auha faka'aufuli
-
Tau faka'amu pe ke tokanga mu'a e Pule'anga ke fakahaofi 'a e ki'i fale ifi ne langa 'e he kakai Tonga 'i loto Pangai si'i ke hiki ke tu'u ki ha feitu'u. Na'a hanga 'e Lavu 'o pulutousa'i si'i fale tupu'a ni.
Malo