Tototonu Ke Tautea Mamafa: Hiko Veve Sapate Ko Hono Maumau’i Ia ‘O e Konisitutone & Lao Featured
'Eliesa Fifita 'o Tufuenga, Kolomotu'a
Kolomotu'a,
5 'Aokosi, 2015.
Tangata'eiki,
Kataki mu’a kae tu’u atu mu’a ‘a ‘eku hoha’a lahi ki hono mamau’i ‘o e Konisitutone mo e Lao ‘o e ‘o e fonua ‘e he Minisita Ki he Ngaahi Ngaue Lalahi ‘Etuate Lavulavu. ‘Oku ou tui ta’e toe veiveiua 'oku totonu, tuha mo taau ke faka’ilo leva pea tautea mamafa he koe maumau lao lahi ‘eni ki he fonua mo e lotu 'a ia 'oku fa'u 'aki 'etau nofo.
‘Oku fakalilifu ‘a e me’a ‘a e tokotaha ko’eni ‘oku fakahoko pea kuo ne ‘osi kole fakamolemole mai he letio pehe ki he ongoongo mei he’ene Potungaue pea ‘oku mahino lelei mei he’ene kole fakamolemole na’a ne mamau’i ‘a e tu’utu’uni ‘a e Konisitutone mo e Lao ‘o e fonua. ‘Oku ‘ikai ha toe ‘uhinga ia ke kalo holo ai he kuo ne ‘osi vete hia ki he kakai pea kuo mahino ko e hia na’e fai ‘i he ‘ilo’ilo pau.
'Oku 'ikai totonu ke tau to'o ma'ama'a 'eni he koe sipinga 'eni 'oku ne taki 'a e fonua ki he mala pea 'oku 'ikai ufi 'a e tokotaha ko'eni ki he lao pea ko e lotu telee 'eni 'oku tau mo'ui 'aki mo 'apasia kiai 'oku 'ikai tene pehe mai koe ha. ‘Oku ‘ikai koha me’a si’i ‘eni ‘i he fonua hono va’inga ‘aki ‘a e Konisitutone mo e Lao pea ‘oku anga ‘a e tokotaha ko’eni kene va’inga ‘aki ‘a e Lao ‘o e fonua pea toki fai e tangi moe kole fakamolemole.
Na’e fakahoko ‘e he Pule Polisi ‘o Vava’u ha’a ne tohi ‘i he uike ni ‘i he mitia ‘o fakamatala ‘a e loi na’e fakahoko ‘e he Minisita ko’eni ‘i Vava’u ‘o fakafou mai he’ene fefine ngaue ke fakangofua mu’a ‘a e pausa ke ‘utu e loli ke fetuku e vai ki Palasi he 'oku 'ikai ha vai tokua ai. Ne toki 'ilo ki mui 'o 'asi pe he hahanu 'a e Pule Polisi ko e fetuku ‘a e loli vai ‘e 7 nai ki he 9 ki he ngaahi kolo ki ‘uta. Ko e toe fo’i maumau Sapate mata’a’a moia ‘e taha pea kuo hoko ‘a e mamau lao ia ko hono kakano.
'Oku fakakauleka 'a e ngaahi 'uhinga 'oku 'omai hili 'ene kole fakamolemole ka koe poini mahu'inga heni ko hono maumau'i 'a e lao moe Konisitutone 'e he Minisita. Kapau 'e tukuange 'eni ta 'oku totonu ke tau maumau lao pe pea tau toki kole fakamolemole mo 'ai ha ki'i mihimihi he kae fakahaofi kitautolu.
‘Oku ou faka’amu ke fakahoko ‘e he Pule’anga ko’eni ha ngaue ki he Minisita koeni he kuo lahi lahi ‘e he ‘ai’ainoa’ia pea ‘oku ‘alu ‘a e taimi ke toe fakalalahi ange.
Faka’apa’apa Atu,
‘Eliesa Fifita
Kolomotu’a
3 comments
-
Kuo ha ke tautea e kau kaukautahi ko'ena 'i Pangaimotu moe otu mataatahi.. koe kii ngaue lelei 'ena ia ko hono hiko pea e fai atu ai pe Tonga 'etau lotu loi ke a'u ki fe... koe faka'alinga lelei ai pe moe fakatau ma Sapate ke a'u ki fe??? koe ki'i hiko 'oe veve oku 'ikai koe houa e 8 oe 'aho Sapate ka koe pogipogi pe ke ma'a 'a loto Nuku'alofa hili e kau paati o e Tokonaki... mahalo ko 'enau ngaue totongi e.. na'e tafi pe 'a Meli Visa he 'aho kotoa a'u ki he Sapate koe ha ne 'ikai ta tikite ai ia... Tonga 'oua 'ai ketau mo'ua he fakangalingali lelei ki mamani...
-
ko e me'a mahu'inga 'oku miss heni ko e ngaue'aki 'e Lavu 'a e huafa 'o e Tu'i ke mauamau'i 'a e Sapate. 'Oku tele 'eni ia he Talisone pea 'oku fu'u mahu'inga 'aupito ke fai ha ngaue ki ai 'a e Minisita Polisi. Ko fee 'a Vava'u 'oku 'ikai ke nau hiki tikite ai 'a e hia ko 'eni he kuo monuka 'a e huafa 'o e Tu'i?
-
Mokomoko pe Eliesa he kuo maau hono tautea 'ona mei langi, koe me'a pe ke fai ketau hufia e tangata ni ke ofi ofi mai ki mamani 'ene sipinga ... ko e ki'i tokoni pe ...