Lahi e mate he halapule'anga Featured
Tohi ki he 'Etita
Lahi e mate he halapule'anga
15 Akosi 2016
'Etita
Nepituno Tonga
Nukualofa
Tangata’eiki,
Kuo lahi ‘a e kau mate ‘i he hala pule’anga ‘i hengaahi 'aho ni pea 'oku ne 'omai 'a e fekau ki he kakai 'o e fonua 'a ia ko hono fafangu ketau toe 'a'a ange 'o sio ki he ngaahi me'a 'oku hoko hotau 'atakai. 'Oku fekaukau'aki heni 'a e ngaahi tafa'aki hange ko e Pule'anga, Siasi, Famili, Fakataautaha mo e ngaahi ta'au 'o e fakalakalaka 'oku hoko koe ngaahi pole ki he'etau fononga.
‘Oku fakafuofua ki he kau mate/pekia fakakatoa ‘e toko 14 ‘i he’ene a’u mai ko ia ki he mahina ko Akosi ni ‘aia ‘oku kau ki ai ‘a e fa’ahinga ne mate/pekia lolotonga ‘a e fakatu’utamaki pea pehe ki he fa’ahinga ne nau toki mate/pekia mei he Falemahaki Vaiola ka ‘oku mahino pe foki ‘oku te’eki ke ‘osi ‘a e ta’u ni 2016.
Na’e ‘iai foki ‘a e ongo fakatu’utamaki lalahi ‘e ua ‘i he feitu’u kehekehe ‘i he halapule’anga ka na’e fakahili uike ‘a ‘ene hoko pea na’e pekia ai ‘a e toko 6 fakakatoa. ‘Oku pehe mei he fakamatala kuo ma’u ko e ongo fakatu’utamaki ko ‘eni na’e fakatupunga kotoa ‘e he ma’u kavamalohi tapu ‘a e ongo faka’uli fakatou ‘osi.
Ko e ta ‘eni ‘oku ongo fakamamahi ki he fonua pea mo ‘ene lelei fakalukufua pea 'oku 'ikai ketau tuhu ki ha tafa'aki ka 'oku 'i ai 'a e ngaahi fatongia 'o e ngaahi kupu fekau'aki ke fakakakato. 'Oku totonu ki he Pule'anga ke toe fakafekefekeange 'a hono fakamalohi'i 'a e pule 'a e lao tautautefito ki he kavamalohi pea ki he kau takilotu ke fakama'opo'opo 'a e fanga sipi pehe ki he ngaahi famili ke toe vaofi ange 'a e fetauhi'aki kae lava e fakasi'isi'i 'a e hoko 'a e palopalema ni he 'oku fu'u 'ilonga 'ene hoko.
'Oku toe ongo ange 'a e lavea mo e pekia noa'ia 'a e si'i kakai tonuhia 'i he ngaahi fakatu'utamaki ko'eni 'a ia 'oku mo'oni ai 'a e lau 'a e Komisiona Polisi Cardwell hili 'a e ongo fakatu'utamaki he faka'osinga 'o e uike ko e me'a 'eni 'oku ui k oe "siokita" he 'oku mole noa'ia mo nounou 'a e ngaahi 'aho 'o e kakai tonuhia he ngaue 'a e siokita.
'Oku tau faka'amu pe 'e to'o mamafa 'e he Pule'anga 'a e fakatokanga 'oku 'omai 'e he faka'ilonga ko'eni he 'oku hoko pea kuo tu'olahi.
Faka’apa’apa atu,
Eliesa Ffifta-Tufuenga/Kolomotu’a
3 comments
-
Kataki atu koe Eliesa ko e mate pe ia akinautolu heenau ta'etokanga, pea fielau kapau nau sii toki fie mate pe kinautolu he taimi Palemia a Akilisi kohai ia tene toe lava ke ta'ofi. Mahalo koe fakalea ia ;oku totonu, ko e kaiha'a 'oku ikai lava ke mapule'i 'e he Potungaue Polisi mo 'enau Minisita Polisi. Koia ai tau tokoni atu ke oatu ha founga ke fakasiisii e tafa'aki koia. Pea kapau oku lahi e accident tau tokoni atu ke fakasiisii mo e tafaaki koia na kuo taimi ke omai ha uta hoosi ke foki e kakai o heka hoosi oku safe e!
-
'Oku 'ikai keke ngali koe mo e fakakovi 'Eliesa, tuku e fakakovi ia mo e fakakona ko e me'a pe ia 'a 'Akilisi mo hono famili mo enau nusipepa Kele'a pehe ki honau kau POUPOU, oku ikai toe fiema'u ia ke fai e ha taha kehe fo'i me'a koia, tuku pe kanautolu ko honau mala 'onautolu mei heli. Koia aiii fetukutuku leva mei he kalasi 'ulungaanga koia. Ofa koe hoo Fanau.
-
Tamasi'i 'Eliesa, ko e mate mo e mo'ui ko e pule ia 'a Sihova. Kou fakamalo atu 'oku ke fai e ngaue na'e fai 'e 'Akilisi, 'a hono fakapipiki e kovi kotoa ki he founga taki, ka ke 'ilo, 'oku 'ikai a'u ho'o founga 'au ia ki he founga 'a 'Akilisi. 'Ofa atu 'Eliesa ee!