Tau Faka’amu ki ha Ta’u 2020 Ngāue Fakataha mo Ola ^Featured

Kuo tau situ’a atu ki he ta’u 2019 pea koe ta’u na’e mohu he faingata’a pea na’e lahi pea fele mo fafo hono ngaahi pole pea 'oku "'ikai ketau lau kafo ka 'oku tau lau lava".

‘Oku ‘ikai foki ketau faka’ikai’i ‘a e mo’oni koia ‘oku tau fononga he fononga’anga ‘oku mohu fili mo faingata’a pea neongo ‘a e ngaahi fakafele’au ‘o e fononga’anga ka ‘oku tau ‘ilo kotoa pe koe kau mo Sihova pea tetau ikuna noa.

Ko e ngaahi pole ‘o e ta’u kuo tau situ’a kiai ‘i he mala’e ‘o e politikale, ‘ikonomika, sosiale, tukufakaholo, sipoti, lotu, famili, ako mo e hā fua ‘i he ngaahi tapa ‘o e mo’ui ‘oku ne ‘omai ‘a e ngaahi ako kiate kitautolu ke tau to’o ‘o laka atu moia.

‘Oku ‘uhinga ia ke to’o ‘a e me’a ‘oku lelei mo taau pea ‘e tokoni ia ki hono langa hake ‘a e fonua 'i he tafa'aki 'o e 'ikonomika, politikale, moe sosiale pea ke tau lotu 'o hufekina mo ngāue'i fakamatoato 'i he funga 'o e faitotonu kae ma’u ha ola ‘oku lelei.

Ko e ngaahi akonaki koia ‘o e ta’u kuotau situ’a kiai ‘oku fiema’u ke tau ako mei ai pea ke tau foua ‘a e ta’u fo’ou ni 2020 pea tau fakaalaala mei he ngaahi fehalaaki ‘o e mo’ui ‘a ia ‘oku hoko koe makatukia’anga ki he’etau fononga.

‘Oku ‘ikai ke puli ia pe unga koe sosaieti ‘oku fa’u’aki ‘a e ngaahi tefito’i tui ‘oku kehekehe honau natula he ‘oku ‘ikai ke tatau ‘a e fakakaukau mo e tui ‘a e kulupu pe tangata takitaha ka ‘oku tau tukulolo ma’u pe ki he me’a ‘e lelei, tolonga mo tu’uloa ki he fonua mo e tokolahi pea koe me’a ia ketau fakahoko.

Kuopau ke tau tukulolo kotoa ki he pule ‘a e Konisitūtone mo e Lao pea ke tau ako ketau mahino’i ‘a e ngaahi me’a ‘oku hoko ‘i hotau ‘atakai ‘i he funga ‘o e mahino mo e mo’oni ka ‘oku ‘ikai ko hano fakakouna’i kitautolu.

‘Oku ‘ikai toe veivei ua ko e lotu mo e ako ‘a e ongo me’angāue tena tokoni lahi ki hono fakamaama hotau kakai ke tonu ‘enau faka’uhinga pea maama ange ‘enau fakakaukau mo ‘enau faitu’utu’uni ki he’enau mo’ui.

Kapau ‘e malava ‘e he tangata mo e fefine takitaha ‘o ‘ilo ia mo hono ngata’anga, hala ‘oku totonu ke fou ai mo e laini ke nofo mo tauhi kiai pea ‘e si’isi’i ange leva ai ‘a e palopalema ‘i he nofo.

Ketau takitaha tu’u hono fatongia mo e me’a ‘oku ne malava kae malava ke fakapalanisi lelei ‘a e anga ‘etau nofo ‘i he sosaieti pea hangē koe faa’i kavei koula ‘a e nofo ‘a e Tonga koe faka’apa’apa, tauhi vā mamahi’i me’a mo e loto tō.

‘E ‘ikai ketau Faifekau pe tetau Fakafofonga Fale Alea, Loea, ‘Enisinia, Toketā, Ngoue mo e hā fua kotoa pē ka ‘oku ‘i ai hotau malohinga mo e me’a ‘oku tau fai lelei'i, poto mo taukei ai pea tau nofo taha leva kiai.

‘Oku fiema’u ke holoki ‘a e ngaahi ‘ā vahevahe, fetaufehi'a'aki mo e fakafa’afa’ahi katau tu’u fakataha ke langa ha Tonga ‘e melino, tu’umalie mo tu’uloa pea ‘e kei faka’apa’apa’i ai ‘a Tonga koe siueli ‘o e Pasifiki.

Neongo hono faingata’a ka ‘e ‘ikai ke tuku e vaka kae fai ha kakau pea hange koe lea ‘oku fakatukutuku’au mai he hisitōlia “Na’e “ikai langa ‘a Loma ha ‘aho pe ‘e taha” ka na’e tuku e taimi kiai ‘i he funga ‘o e vīsone mo e kalusefai pea sio lōlōa ki he kaha’u.

‘E fakama’opo’opo kotoa ‘a ‘etau ‘amanaki ‘e he’etau lotu mo ngāue pea ke kei fakamu’omu’a ‘a e ‘Otua he me’a kotoa ‘i he funga ‘o e lotu mo’oni mo e ngāue malohi.

‘Oku tau faka’amu ke tau ma’u ha ta’u 2020 ‘e fakamovete'i ai ‘a e ngaahi tō kehekehe 'i he tapa kotoa tautautefito ki he politikale pea tau takitaha tu'u hono tu'unga katau langa ha Tonga ‘e tu’uloa mo ola foki.

Talamonū atu mo e fakatauange ke tau ma'u ha ta'u 2020 monū'ia.