Hulu‘i Ongo Hele‘uhila “The legend of Kava Tonga” mo e “‘Aho‘eitu” ‘i ‘Aokalani, Nu‘usila, he Kātoanga Uike Lea FakaTonga Featured
Penolo Fehu'i-moe-Tali; mei hema ki mata'u: Nanai Jeremiah Tauamiti; Vea Mafile'o; Emily Mafile'o; Palofesa Hufanga Dr 'Okusitino Mahina
12 Sepitema, 2016. Na‘e hulu‘i ‘a e ongo hele‘uhila ko e “The legend of Kava Tonga” (Fananga ‘o e Kava Tonga) mo e “‘Aho‘eitu” he fale faiva (theatre) ‘o e Mangere Arts Centre ‘i ‘Aokalani, Nu‘usila, he ma‘alali ‘a e Uike Lea FakaTonga he ‘aho Tokonaki 10 ‘o Sepitema, 2016.
Na‘e fakatefua ha kainga Tonga mo e kau muli tokolahi hono mamata‘i ‘a e ongo hele‘uhila mālie mo fakaholomamata ni pea na‘e me‘a ai ‘a ‘Eiki Va‘etapu ‘Ahome‘e ko e Fakaafe Fakalangilangi ‘o e kātoanga.
Na‘e fa‘u ‘a e ongo hele‘uhila ‘e he ongo ‘ātisi Tonga ko Vea Mafile‘o, Emily Mafile‘o mo e ‘ātisi Ha‘amoa ko Nanai Jeremiah Tauamiti pea mo e kau Tonga kotoa ‘a e kau ‘eti (fakatātā) faiva he malumalu ‘o e kautaha ko e Malosi Pictures Limited.
Na‘e fai ‘e Faifekau ‘Ikilifi Pope ‘ae lotu fakaava mo e lotu tāpuni pea fai ‘e Palōfesa Hūfanga Dr ‘Ōkusitino Māhina ‘a e lea he ongo hele‘uhila hili hono hulu mo to e kau fakataha mo e kau talekita mo e kau polotiusa ‘a Vea, Emily mo Nanai he pēnolo fehu‘i-moe-tali.
Na’e fai ‘e he Afo Mīnoa ‘O Tonga ‘a e fakame‘ite ‘a ia na‘e kau ai hono faka‘ali‘ali ‘o e ngaahi me‘alea tu‘ufonua ‘a Tonga kuo ofi ke mole ‘a e ni‘ihi (‘o hange koe fangufangu mo e lali) ka e mole ‘a e ni‘ihi ha ngaahi ta‘u ‘e 200 tupu (‘o hange koe mimiha mo e tukipitu).
Na‘e fakamamafa‘i ‘e Palōfesa Hūfanga ‘a e fo‘ou mo mālie ‘a e ngāue lahi mo mā‘uhinga ni ‘a ia ko hono to e hiki ‘a e ngaahi faiva tupu‘a ‘a Tonga hange ko e tufunga fananga, tufunga talanoa, faiva fananga / faiva talanoa ki ha tu‘unga fo’ou ‘e taha hange tufunga hele‘uhila, tufunga talanoa, faiva hele‘uhila mo e faiva talanoa.
Na‘e kau foki ki ai mo e faiva fakamamahi (‘a ia ‘oku ‘iloa ko e tragedy) na‘e tufunga ‘e Lo‘au mo e kau mohu ‘atamai ‘o e maama motu‘a ‘o hange koe “Tala ‘o e Kava (mo e Tō)” na ‘e tefito he fetukuaki / felalavai ‘a e “kona” (bitterness) mo e “melie” (sweetness) mo e “Tala ‘o ‘Aho‘eitu” na‘e makatu‘unga he fetukuaki / felalavai ‘a e “fepaki” (conflict) mo e “fenāpasi” (order).
‘Oku ma‘uhinga fau ‘a e ngāue ‘a e tokosi‘i ‘o e kau ‘ātisi Tonga ‘o hange ko Vea, Emily mo Nanai hono to e hiki ‘a e ngaahi tufunga mo e faiva tu‘ufonua ‘a Tonga ki he ngaahi tufunga mo e faiva fo‘ou ‘o hange ko e tufunga hele‘uhila (film-making) mo e faiva hele‘uhila (film-acting). ‘Oku toe ‘eni ke hiki ‘e ha kau ‘ātisi Tonga (playwrights; tragedians; comedians) ko e ngaahi tufunga mo e faiva fo‘ou ki he ngaahi fale faiva (theatres).
‘Oku fe‘auhi‘auhi mo fetukituki mālie atu ‘a Lo‘au mo e kau tufunga moe faiva fakamamahi (tragedians) ‘ilo‘ilo tupu‘a ‘o Tonga mo e kau tufunga mo e faiva fakamamahi tu‘ufonua ‘o Pilitānia mo Kalisi ‘o hange ko e ongo tufunga mo e faiva fakamamahi (tragedies) ko e “Lomiō mo Sulieti” he fetukuaki / felalavai ‘a e “‘ofa” (love) mo e “mate” (death) ‘a Sekisipea mo e “‘Otipusi” he fetukuaki / felalavai ‘a e “popula” (pre-determinism) mo e “tau’ataina” (free-will) ‘a Sofokilisi.
