Lakalaka Motu‘a Mei Vava‘u ^Featured

1. Si‘i matangi ni kuo tokelau

Fai leva ‘eku faka‘ānau
Ta‘ahine keta laka keu hoko ‘o mamata
Foki tama keta laka bea laka fakataha

2. Vaka ‘a‘alo ‘i tu‘a Hunga
Koe ake mai ki Foelifuka
Ta‘ahine keta laka keu hoko ‘o mamata
Foki tama keta laka bea laka fakataha

3. Ta tu‘u ‘i Hangaitokelau
‘O fai fatai ai keta fā‘eu
Ta‘ahine keta laka keu hoko ‘o mamata
Foki tama keta laka bea laka fakataha

Koe ki‘i fakamatala nounou.

Na‘e fatu ‘ae ta‘anga lakalaka motu‘a malie ni ‘ehe punake ta‘e‘iloa mei Vava‘u Lahi he ngaahi ta‘u 1890 tupu si‘i. ‘Oku nounou pē ‘ae ta‘anga, ‘aia ‘oku ne talamai ‘ae tupu‘anga moe kei tupulaki ‘ae lakalaka koe faiva pē ‘e taha ‘a Tonga na ‘e fanua ‘i mo fa‘u ‘i Tonga. ‘Oku ngalingali koe ta‘anga pē moe hiva kae te‘eki ai ke haka, ‘aia na‘e toki tanaki mai ki mui.

‘Oku kupu / veesi 3, kohi / laini 4 ‘ae lakalaka, ‘o hangē na‘e hoko ‘ae kohi / laini 3-4 ‘oe kupu / veesi kotoa ‘e 3 koe tau, ‘aia na‘a ne fakatautau / fakakaikaitau ‘ae langi, ‘o kamata hono tafunaki mo pao-mo-toloaki ‘ae māfana moe vela koha fa‘ahinga ivi moe afi mo tumutumu he tauelangi. ‘Oku kehekehe ‘ae kohi / laini 1-2 ‘oe kupu / veesi ‘e 3 kotoa ‘oe ta‘anga.

‘Oku ngalingali koe punake mei Hunga, ‘aia ‘oku hanga mai kiai ‘a Foelifuka, ‘o ne ngāue‘aki lelei ‘ae heliaki fakafetongiaki, heliaki fakafekauaki moe heliaki fakafonuaki, ‘aia ‘oku vaka mai he laumātanga, ‘o tefito he faka‘ofo‘ofa ‘oe ‘Otumotulalo ‘o Vava‘u, ‘aia ‘oku fakangalongata‘a mo fakaholomamata hono matangi māfana, ‘o kate ka tu’u he Hangaitokelau.

ANFF leva e malanga kae tau,
‘Ofa ma‘u moe ‘ānau,
Ka tau toki hoko atu