Tau 'eva ‘o mata māhina hopo ^Featured

1. Tau ‘eva ‘o mata mahina hopo
Fala he toa ko Tangi mo e Loto
Tapu fanafana kae sīlingo
Na’a houhau ‘a e Tu’i Matoto
Hoko atu ā ‘a e takimamata
Fanongo he ‘okani ‘o e vaha
To’oa he ngalu ‘o ‘Utmamana
Fasi ‘i he liku ‘i Sōtiaka

2. Lanu ai ‘i Vai’utukakau
Tau hake kuo longolongo ‘a e valu
Hake 'i he fā ko Avahungalu
Ke kahoa si’a kafo he fekau
Mulu he maile fio he lilifa
Teuteu ki he Langi ‘o Talafaiva
Tekiteki he toa ‘i Teisina
Kae tonu ha’o fakamalinga

3. ‘Oiauē Tala kei Kapa
Ki he tēvolo ‘o e ‘Otu Mala
Tapu ke momoi Tavakefai’ana
Kae fai ha’amo fakatokanga
Pelu lā pea ke heka ke ma’u
He ‘e tō ‘a e faka-Talau
Sia ko Kafoa ‘ene Laukau
'O ‘afio he ‘alofi ‘o e Hau

4. Mapu ‘a Tonga Kilikilitefua
Fai’anga ‘o e tu’anaki’auka
‘Otufangavalu kene fakahā
Ko e matangi ia e lapa
Hoani e tolofi ‘o Noa
Hala-ki-Pulotu kuo ‘iloa
‘Ave ai ‘a e afi ki maama
Teke ‘a e langi kae ‘eva e tangata

Fakamatala Nounou:

Ko e fa'u 'eni 'a e punake 'iloa 'o Vava'u na'a ne toki pekia pe he ngaahi ta'u ki mui ni mai ko Sunia Tu'ineau 'o Talau Vava'u. Ko e takimamata 'eni ki Vava'u mo e viki hono ngaahi matanga faka'ofo'ofa. Ko e natula pe 'eni mei fuoloa 'o e kau punake Vava'u pea 'oku fakatalutalu 'aki pea 'ikai puli 'o a'u ki he 'aho ni 'a e manakoa 'o Vava'u 'e he folau'eve'eva.

'Oku kamata 'a e ta'anga ni mei he mata'anga mahina 'i Tu'anekivale 'o vilo takai ki he fakahihifo 'o Vava'u mo hono ngaahi matanga ' afe ki he 'otu motu lalo mo hono ngaahi matanga pea faka'osi mai ki 'uta Vava'u ki he Kilikilitefua 'o hala palavi atu ai pe ki Ha'afuluhao ki Koloa ki he Hala-ki-Pulotu.