Tā ‘Uluafi ‘a Lo‘au Vaivaipētoa ^Featured

1. Tapu moe tangata‘i fonua ‘o Vaihi
Mo e fale lalava ‘o Maui Kisikisi
Haleakalā ‘oku kei moto mo fisi
He koe tākanga ‘a e kau Tongafisi

2. ‘E ha‘a ako mo ha‘a fifili
Si‘i mātu‘a mo e kau ako vivili
Ta u fekeli, vavalo mo vakili
Ki he tā-vā kuo fokifokihi

3. Lo‘au Vaivaipētoa kuo ke tafi mala‘e
Pea ke tā ‘uluafi he Funga Paepae
Tanupou mo langa turangawaewae
Ke holoki ‘a e fasitanunu moe fakatovave

4. Fakalakalaka ko e kaveinga fakaonopō
Fakahopo mo fakatoka mei he Hihifo
Mafola ko e ‘auha‘anga ‘o e tukufakaholo
He ko e taumu‘a ne fa‘u fakaoloolo

TAU: Tā mo e vā ke mo hū he fihi
‘O vete mo tatala ē taalafili
Huluhulu pea mo kinikini
Ka e maamangia hotau hala fihifihi

KOE KI‘I FAKAMATALA NOUNOU

Na‘e fatu ‘e Maui-Tāvā-He-Ako Palōfesa Dr Tēvita Ō. Ka‘ili ‘a e faiva ta‘anga viki mālie ni ko e konga ‘ene lea fakafe‘iloaki ‘o Hūfanga Palōfesa Dr Ōkusitino Māhina he‘ene seminā he 2005 he kaveinga ko e “Tā moe Vā: Towards a Time-Space Philosophy/Theory of Economic Development” he Maui Community College, ‘aia koe va‘a ‘oe University of Hawai‘i.

‘Oku fakatou ngāue‘aki lelei ‘e Maui-Tāvā-He-Ako Palōfesa Dr Ka‘ili he ta‘anga ‘ae ongo heliaki fakafetongiaki (qualitative, epiphoric heliaki), ‘o hangē koe kau Tongafisi kihe kau ako moe kau mataotao, moe heliaki fakafekauaki (associative, metaphoric heliaki), ‘o hangē koe Haleakalā (fale ‘oe la‘ā) kihe motu ko Maui mo Maui he‘ene tauhele la‘ā.

‘Oku tala ‘o pehē na‘e hopo mo tō fakavave ‘ae la‘ā he ‘aho kotoa, ‘o ta‘elava fai ha ngāue ‘ae kakai, ‘o tupu ai hono sia ‘e Maui hono kupenga ‘o tauhele‘aki ‘ae la‘ā, ‘aia na‘e toki hopo mo tō māmālie leva, ‘o toki lava ai ‘enau ngāue, ‘aia ‘oku ‘uhinga ki hono fakatau‘atāina ‘e Maui ‘ae kakai mei he pule fakaleveleva ‘ae kau taula moe hou‘eiki.

‘Ofa lahi moe hūfaki,

Hūfanga Palōfesa Dr ‘Ōkusitino Māhina
Professor of Art, Culture & Critical Anthropology
Tonga International Academy &
Vava‘u Academy for Critical Inquiry & Applied Research