Ikuna ‘Ikale Tahi ‘a Namibia 35-21 Featured
Kapakau Fika 11 Telusa Veainu 'i he taha 'o 'ene ngaahi lele'i pulu 'o fakahoko ai 'ene tata'o. ('Ata 'a e BBC)
Nuku'alofa, 30 Sepitema 2015. Ko e ongoongo fungani ia ke kamata ‘aki ‘a e ‘aho Pulelulu ko hono 30 ‘o Sepitema ‘a hono ikuna ‘e he ‘Ikale Tahi ‘a e timi ‘a Namibia ‘i he’ena fetaulaki ‘i he pongipongi ‘o e ‘aho ni.
Ko e kai foki ‘o Tonga na’e ma’u ia mei ha tata’o ‘e 5 ‘a 'ai na'e ma'u ai 'a poini ponasi. Ko e tatao ‘e 2 ‘a e Kapakau Fika 11 Telusa Veainu, tata'o 'e 2 ‘a e Peleki'auei Fika 7 Jack Ram pea tata'o 'e 1 ‘a e Feesi Fika 10 Latiume Fositā. Na’e ‘akahi ai ‘o hū ‘a e ‘aka fakahū ‘e 2 ‘e he Le'okolo Fika 15 Vungakoto Lilo pehē ki he ‘akatautea ‘e 2 ‘a ia na’e takitaha ‘a Lilo mo Morath 'a ia na'a ne toki hū Feesi fetongilavea atu 'i he Fika 22.
Ko e kai ‘o Namibia na’e ma’u ia mei he’enau tata’o ‘e 3 ‘a ia na’e hū kātoa ‘a e ngaahi ‘aka.
‘Oku nga’unu hake ai ‘a e Tonga ‘o Fika 2 ki Nu’usila ‘i he pulu C (Pool C) ‘a ia koe tu’u ‘eni ‘a e lau poini ‘i he pulu (Pool C) ko’eni:
New Zealand poini ‘e 9
Tonga poini ‘e 6
Argentina poini ‘e 5
Georgia poini ‘e 4
Namibia poini ‘e 0
‘Oku mahino mai mei he feinga ko’eni ‘etau fānau ‘oku kei tu’u faingamālie pē ‘a e feinga ke tau a’u ai leva ki he Kuatafainolo ‘a ia ko’etau fuofua a’u eni kiai kapau ‘e hoko ‘a e faka’amu ko’eni. Kaikehe ko e ‘amanaki ‘oku ‘ikai tuka pea ‘oku kau atu pe kiai mo e fiema’u ketau lotua ‘etau fānau va’inga.
3 comments
-
Malo e malohi 'a e 'Ikale ke si'i toe asi honau hingoa he ongoongo.. ikuna moe 'ikai ikuna 'oku mau kei poupou atu pe fanau ki he va'inga oku mou fakahoko...moe talamonu atu ki he ngaahi feinga tau 'oku toe....
-
Fakamafana 'Ikale.....tukuhifo ai leva 'a 'Asenitina katau toki fakapa'ulu e 'Olopeleki. Poupou atu moe lotu.
-
Maloo e va'inga malie, pea ko hotau loto ia kotoa ke tau a'u kihe kuata fainolo. Talamonuu atu khe ng feinga tau 'oku toe he koe fepaki moe ongo Laione 'oe va'inga akapulu. Ka ko hai ? tene 'ilo 'ae me'a fk'ofo 'e hoko !!!!!!!!!!!!!!.......".'Oua na'a puna 'ae 'Ikale Tahi 'o Siutaka he Kolope he RWC 2015"